ໃນໂອກາດເຂົ້າຮ່ວມ ກອງປະຊຸມສະໄໝາສາມັນເທື່ອທີ 4 ຂອງສະພາປະຊາຊົນ ແຂວງສະຫວັນນະເຂດ ຊຸດທີ II ທີ່ໄດ້ຈັດຂຶ້ນວັນທີ 24 ມັງກອນ 2023, ທ່ານ ໄຊຍະເດດ ຜຸຍຍະວົງ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13, ທັງເປັນສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງວິລະບູລີ ສະເໜີໃຫ້ພະແນກແຮງງານ ແລະ ສະຫວັດດີການສັງຄົມແຂວງ ສົມທົບກັບສະຫະພັນກຳມະບານແຂວງ ເພີ່ມຄ່າແຮງງານໃຫ້ກຳມະກອນຢູ່ໃນໂຮງຈັກ, ໂຮງງານພາຍ ໃນແຂວງສະຫວັນນະເຂດ ເນື່ອງຈາກວ່າ ທຸກປະເພດສິນຄ້າທີ່ສົ່ງອອກຂອງໂຮງຈັກ, ໂຮງງານດັ່ງກ່າວ ຄິດໄລ່ເປັນເງິນຕາຕ່າງປະເທດ. ສະນັ້ນ, ຄ່າແຮງງານຂອງກຳມະກອນ ກໍຄວນຄິດໄລ່ຂຶ້ນຕາມອັດຕາສ່ວນຂອງອັດຕາແລກປ່ຽນຈຶ່ງຈະສົມມາພາຄວນ.
ທ່ານ ໄຊຍະເດດ ຜຸຍຍະວົງ ໃນນາມເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ ໄດ້ປະກອບຄຳເຫັນໃສ່ບົດລາຍງານ ກ່ຽວກັບແຜນພັດທະນາເສດຖະກິດ-ສັງຄົມ ຂອງແຂວງສະຫວັນນະເຂດ ເຊິ່ງເຫັນໄດ້ວ່າໃນປີຜ່ານມາ ກໍຄື ປັດຈຸບັນ ສະຫວັນນະເຂດ ກໍຄື ທົ່ວປະເທດແມ່ນໄດ້ປະເຊີນກັບຄວາມຫຍຸ່ງຍາກທາງດ້ານເສດຖະກິດ-ການເງິນ, ບັນຫາເງິນກີບອ່ອນຄ່າ, ລາຄາສິນຄ້າ ແລະ ນ້ຳມັນເຊື້ອໄຟສູງຂຶ້ນ ແຕ່ກົງກັນຂ້າມຄ່າແຮງງານຂອງກຳມະກອນ ຍັງຄືເກົ່າບໍ່ມີການປ່ຽນແປງ ເຊິ່ງເປັນສາເຫດສົ່ງຜົນກະທົບຢ່າງໜັກໜ່ວງ ຕໍ່ການດຳລົງຊີ ວິດຂອງປະຊາຊົນ, ກຳມະກອນຜູ້ອອກແຮງງານ ລວມເຖິງພະນັກງານລັດຖະກອນ ກໍລ້ວນແຕ່ປະສົບບັນຫາເຊັ່ນດຽວກັນ.
ທ່ານ ໄຊຍະເດດ ຜຸຍຍະວົງ ຍັງໄດ້ສະເໜີຕື່ມອີກວ່າ: ດ້ານວຽກງານຕານ່າງການບໍລິການທາງດ້ານສັງຄົມ ກໍຄວນເອົາໃສ່ພັດທະນາ ປັບປຸງທາງດ້ານຄຸນະພາບໃຫ້ດີຂຶ້ນຕື່ມ ໂດຍສະເພາະການບໍລິການໃນຕານ່າງ ວຽກງານສາທາ ລະນະສຸກ ເຊິ່ງປະຊາຊົນລາວ ປະກອບມີຫລາຍອາຊີບ ມີທັງກຳມະກອນ, ຊາວໄຮ່ນາ ແລະ ອາຊີບອື່ນໆ. ສະນັ້ນໃນເວລາທີ່ເຂົາເຈົ້າເຈັບເປັນ ເຂົ້າໄປຫາແພດໝໍ ກໍຄວນໃຫ້ບໍລິການເຂົາເຈົ້າ ດ້ວຍຄວາມຍິ້ມແຍ້ມແຈ່ມໃສ ເຮັດຄືກັບບໍລິການຄົນໃນຄອບຄົວດຽວກັນ ເພາະເງິນເດືອນຂອງພະນັກງານ ແມ່ນໄດ້ມາຈາກການປະກອບສ່ວນຂອງປະຊາ ຊົນ ສະນັ້ນຈຶ່ງບໍ່ຄວນເລືອກປະຕິບັດ ໃນເວລາໃຫ້ບໍລິການ.
ຂ່າວ: ອັກສອນສິນ
