ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ໄດ້ຊີ້ແຈງຕໍ່ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດຊຸດທີ IX ໃນວັນທີ 7 ທັນວາ 2022 ກ່ຽວກັບການຈັດຕັ້ງເປັນກຸ່ມບ້ານຢູ່ຂັ້ນທ້ອງຖິ່ນວ່າ:ອີງຕາມກົດໝາຍ ວ່າດ້ວຍການປົກຄອງທ້ອງຖິ່ນ ສະ ບັບເລກທີ 68/ສພຊ ທີ່ໄດ້ກໍານົດການປົກຄອງທ້ອງຖິ່ນຂອງ ສປປ ລາວ ອອກເປັນ 3 ຂັ້ນຄື: ຂັ້ນແຂວງ, ຂັ້ນເມືອງ ແລະ ຂັ້ນບ້ານ.
ສະນັ້ນ, ກຸ່ມບ້ານຈຶ່ງບໍ່ແມ່ນຂັ້ນໜຶ່ງຂອງການປົກຄອງທ້ອງຖິ່ນ ໃນຕໍ່ໜ້າຈຶ່ງເຫັນວ່າຄວນມີການປັບປຸງ ໃຫ້ສອດຄ່ອງກັບກົດໝາຍ ແລະ ນິຕິກໍາທີ່ກ່ຽວຂ້ອງ. ຕໍ່ກັບບັນຫາດັ່ງກ່າວນີ້ເພື່ອໃຫ້ສອດຄ່ອງຕາມລັດຖະທໍາມະນູນ ແລະ ກົດໝາຍການປົກຄອງທ້ອງຖິ່ນ ໂດຍລວມແລ້ວຄວນລົບລ້າງ ການຈັດຕັ້ງກຸ່ມບ້ານ ໂດຍສະເພາະບ່ອນທີ່ມີເງື່ອນໄຂສະດວກໃນການນຳພາ-ຊີ້ນຳ ແລະ ການພົວພັນປະສານງານລະຫວ່າງເມືອງ ແລະ ບ້ານ ແມ່ນຕ້ອງໄດ້ລົບລ້າງ ເພື່ອບໍ່ໃຫ້ມີຄວາມສັບສົນ; ຖ້າເຫັນວ່າ ຍັງມີຄວາມຈຳເປັນຮັກສາ ຫລື ການສ້າງຕັ້ງກຸ່ມບ້ານຂຶ້ນ ເພື່ອຈຸດປະສົງເປົ້າໝາຍສະເພາະໃດໜຶ່ງ ຄວນກຳນົດເຂດໃຫ້ຈະແຈ້ງ,ອາດບໍ່ໃຫ້ເກີນ 5 ປີ . ເມື່ອແກ້ໄຂສຳເລັດແລ້ວ ກໍຄວນຫຍຸບເລີກ.ນອກຈາກນີ້, ເພື່ອຕອບສະໜອງ ການເຂົ້າເຖິງການບໍລິການຂອງພາກລັດຢູ່ ຂັ້ນທ້ອງ ຖິ່ນຮາກຖານ ກະຊວງພາຍໃນ ຈະໄດ້ສຸມໃສ່ການປັບປຸງຂອດບໍລິການຜ່ານປະຕູດຽວ ເພື່ອໃຫ້ປະຊາ ຊົນເຂົ້າເຖິງການບໍລິການຂອງລັດ ໃຫ້ສະດວກວ່ອງໄວຂຶ້ນ.
ກະຊວງພາຍໃນ ໄດ້ວາງຄາດໝາຍສູ້ຊົນຮອດປີ 2025 ຈະຂະຫຍາຍສູນບໍລິການຜ່ານປະຕູດຽວໃຫ້ໄດ້ 74 ແຫ່ງໃນຂອບເຂດທົ່ວປະເທດ ປັດຈຸບັນມີແລ້ວ 52 ແຫ່ງ, ສໍາລັບເມືອງຫ່າງໄກສອກຫລີກ ໃນອະນາຄົດ ແມ່ນຈະຄົ້ນຄວ້າ ການບໍລິການປະຕູດຽວແບບເຄື່ອນທີ່ (ODSC Mobile) ເພື່ອນຳເອົາການບໍລິການ ຂອງລັດລົງໄປຫາປະ ຊາຊົນໃນຊຸມຊົນເຂດຫ່າງໄກ ແລະ ຊົນນະບົດ ເປັນຕົ້ນແມ່ນການຈົດທະບຽນການເກີດ, ການຕາຍ, ການອອກບັດປະຈຳຕົວ, ສຳມະໂນຄົວ, ການອອກໃບຕາດິນ ແລະ ອື່ນໆ.
ຂ່າວ: ຂປລ
