ຂໍຊົມເຊີຍຢ່າງສຸດໃຈ! ກະຕໍ້ຄູ່ຍິງ ສປປ ລາວ ຊະນະ ອິນໂດເນເຊຍ ຄວ້າແຊ້ມໂລກມາຄອງຢ່າງສະຫງ່າງາມ.
ການແຂ່ງຂັນກິລາກະຕໍ້ຊິງແຊ້ມໂລກ ຊິງຂັນພະຣາດຊະທານ ຄິງຄັບ ຄັ້ງທີ 35 ທີ່ສູນການຄ້າແຟຊັ່ນໄອສແລນ, ນະຄອນຫລວງບາງກອກ, ປະເທດໄທ ໃນວັນທີ 24-31 ກໍລະກົດ 2022.
ປະເພດຄູ່ຍິງ ຮອບຊິງຊະນະເລີດ ຄູ່ຍິງຈາກລາວເຮົາ ຜົນງານຍັງເດັ່ນຕ່ໍເນື່ອງ ເອົາຊະນະ ອິນໂດເນເຊຍ 2-0 ເຊັດ: 21-18, 21-19 ພິຊິດແຊ້ມໂລກມາຄອງ ເປັນຄັ້ງທຳອິດ, ຫລຽນທອງຮ່ວມເປັນຂອງ ມຽນມາ ແລະ ມາເລເຊຍ.
ກະຕໍ້ຄູ່ຍິງລາວເຮົາ ຜົນງານດີມາຕັ້ງແຕ່ຮອບແບ່ງກຸ່ມ ຊະນະລວດ, ຊະນະ ມາເລເຊຍ, ເນປານ, ອີຣານ ແລະ ໄຕ້ຫວັນ, ມາໃນຮອບ 4 ທີມສຸດທ້າຍ ກໍເອົາຊະນະ ມຽນມາ 2-0 ເຊັດ: 22-20, 21-13 ແຕ່ລະນັດ ຄວ້າໄຊແບບບໍ່ເສຍເຊັດ ຄວ້າແຊ້ມໂລກມາຄອງຢ່າງສະຫງ່າຜ່າເຜີຍ ເປັນແຊ້ມໂລກສະໄໝທີ 2 ຕໍ່ຈາກປີ 2018.
ຂະນະທີ່ ຄູ່ຊາຍລາວເຮົາ ຮອບຊິງເສຍໃຫ້ ເສືອເຫລືອງ ມາເລເຊຍ ແບບຫວຸດວິດ 1-2 ເຊັດ: 24-25, 21-14, 18-21 ໄດ້ຫລຽນເງິນ ຫລື ຮອງແຊ້ມໂລກ, ຫລຽນທອງຮ່ວມ ມຽນມາ ແລະ ອິນໂດເນເຊຍ.
ສຳລັບຜົນງານໃນຮອບແບ່ງກຸ່ມຂອງ ກະຕໍ້ຄູ່ຊາຍຈາກລາວ ຊະນະ 2 ນັດລວດ, ຊະນະ ໂອມານ 2-0 ເຊັດ: 21-7, 21-10 ແລະ ຊະນະ ນິວຊີແລນ (ນູແວນເຊລັງ) 2-0 ເຊັດ: 21-6, 21-13 ມາໃນຮອບ 4 ທີມສຸດທ້າຍ ເອົາຊະນະ ມຽນມາ 2-0 ເຊັດ: 21-13, 21-18.
ການແຂ່ງຂັນກິລາກະຕໍ້ຊິງແຊ້ມໂລກ ຊິງຂັນພະຣາດຊະທານ ຄິງຄັບ ຄັ້ງນີ້ ມີ 23 ປະເທດເຂົ້າຮ່ວມ ສຳລັບ ສປປ ລາວ ສົ່ງຄະນະນຳ, ຄູຝຶກ ແລະ ນັກກິລາເຂົ້າຮ່ວມທັງໝົດ 40 ຄົນ ຮ່ວມແຂ່ງຂັນ 6 ລາຍການເຊັ່ນ: ກະຕໍ້ລອດບ້ວງ ປະເພດທີມຍິງ, ທີມຊາຍ, ຄູ່ຍິງ, ຄູ່ຊາຍ, ທີມຊຸດຍິງ ແລະ ທີມຊຸດຊາຍ. ເຊິ່ງເຈົ້າພາບກຳນົດແຕ່ລະທີມສົ່ງໄດ້ບໍ່ເກີນ 6 ລາຍການຈາກທັງໝົດ 11 ລາຍການເຊັ່ນ: ກະຕໍ້ລອດບ້ວງ ປະເພດທີມຍິງ, ທີມຊາຍ, ຄູ່ຍິງ, ຄູ່ຊາຍ, ທີມດ່ຽວຍິງ, ທີມດ່ຽວຊາຍ, ທີມຊຸດຍິງ, ທີມຊຸດຊາຍ, ທີມຍິງ 4 ຄົນ, ທີມຊາຍ 4 ຄົນ ແລະ ທີມປະສົມຍິງ 4 ຄົນ.
ສູ້ໆ ພັດທະນາຕໍ່ໄປເດີ!! ລາວສູ້ໆ!!!
Info & Image: Jai Keophaserd
