ຕາມການໃຫ້ສຳພາດຂອງ ທ່ານ ສີທອງ ສີອໍາພອນ ກໍາມະການພັກເມືອງ ຫົວໜ້າຫ້ອງການສຶກສາ ທິການ ແລະ ກິລາເມືອງຊະນະສົມບູນ ໃນວັນທີ 16 ພຶດສະພາ 2022 ນີ້ວ່າ: ປັດຈຸບັນເມືອງຊະນະສົມບູນ ແຂວງຈຳປາສັກ ແມ່ນໄດ້ເລີ່ມການການສອບເສັງເລື່ອນຂັ້ນພາກຮຽນ 2 ໃນຊັ້ນຮຽນປະຖົມ, ມັດທະຍົມຕອນຕົ້ນ ແລະ ຊັ້ນມັດທະຍົມຕອນປາຍ ທົ່ວເມືອງປະຈຳສົກຮຽນປີ 2021-2022 ຢ່າງເປັນຂະບວນການຟົດຟື້ນ.
ໂດຍພາຍໃນເມືອງມີຈຸດສອບເສັງຊັ້ນປະຖົມທັງໝົດ 82 ແຫ່ງ, ມີ 45 ໜວດ,ຊັ້ນມັດທະຍົມຕົ້ນມີ 16 ແຫ່ງ ໃນນັ້ນມີ ຊັ້ນມໍປາຍຢູ່ 5 ແຫ່ງ,ສຳລັບປະຖົມນັບແຕ່ຊັ້ນ ປໍ1 – ປໍ4 ແມ່ນຈະໄດ້ດໍາເນີນການສອບເສັງໄປເປັນເວລາ 2 ວັນຄື: ນັບແຕ່ວັນທີ 16 – 17 ພຶດສະພາ 2022 ຈຶ່ງຈະໃຫ້ສຳເລັດ,ໂດຍປະກອບມີ 4 ວີຊາສອບເສັງ ຄື: ວິຊາຄະນິດສາດ,ວິຊາພາສາລາວພາກຂຽນ, ວິຊາພາສາລາວພາກຫັດແຕ່ງ ແລະ ວິຊາໂລອອມຕົວວິທະຍາສາດ,ລວມມີນັກຮຽນເຂົ້າຮ່ວມສອບເສັງເລື່ອນຂັ້ນຕົວຈິງທັງໜົດ 5.481 ຄົນ,ຍິງ 2.829 ຄົນ ສ່ວນ ຊັ້ນມັດທະຍົມຕອນຕົ້ນ ແລະ ມັດທະຍົມຕອນປາຍ ນັບແຕ່ຊັ້ນ ມໍ 1 – ມໍ 3 ແລະ ຊັ້ນມໍ 5 – ມໍ 6 ແມ່ນຈະໄດ້ດໍາເນີນການສອບເສັງໄປເປັນເວລາ 3 ວັນຄື: ນັບແຕ່ວັນທີ 16 – 18 ພຶດສະພາ 2022 ຈຶ່ງສຳເລັດ, ໂດຍໃນຊັ້ນມໍຕົ້ນມີ 6 ວິຊາສອບເສັງຄື: ວິຊາພາສາລາວ – ວັນນະຄະດີ,ວິຊາຄະນິດສາດ,ວິຊາສຶກສາພົນລະເມືອງ,ວິຊາວິທະຍາສາດ – ສັງຄົມ,ວິຊາວິທະຍາສາດທຳມະຊາດ ແລະ ວິຊາພາສາອັງກິດ , ຊັ້ນມໍປາຍມີ 9 ວິຊາສອບເສັງຄື: ວິຊາພາສາລາວ – ວັນນະຄະດີ,ວິຊາຄະນິດສາດ,ວິຊາສຶກສາພົນລະເມືອງ, ວິຊາພາສາອັງກິດ,ວິຊາພູມສາດ,ວິຊາປະຫວັດສາດ,ວິຊາເຄມີສາດ,ວິຊາຟີຊິກສາດ ແລະ ວິຊາຊີວະສາດ ໂດຍມີນັກຮຽນລວມທັງຊັ້ນມໍຕົ້ນ ແລະ ຊັ້ນ ມໍປາຍເຂົ້າຮ່ວມສອບເສັງເລື່ອນຂັ້ນທັງໜົດ 3.178 ຄົນ,ຍິງ 1.664 ຄົນ.
ເພື່ອເຮັດໃຫ້ການສອບເສັງເລື່ອນຂັ້ນປະຈໍາສົກຮຽນປີ 2021 – 2022 ຄັ້ງນີ້: ຮັບປະກັນໃຫ້ໄດ້ທັງປະລິມານ ແລະ ຄຸນນະພາບ ທ່ານ ສີີທອງ ສີອຳພອນ ຫົວໜ້າຫ້ອງການສຶກສາທິການ ແລະ ກິລາເມືອງ.ໄດ້ຮຽກຮ້ອງໃຫ້ຄະນະກຳມະການທີ່ຮັບຜິດຊອບ ແລະ ຄູອາຈານທີ່ກ່ຽວຂ້ອງ ພ້ອມກັນເອົາໃຈໃສ່ຄອບຄຸມໃນການປະຕິບັດລະບຽບການສອບເສັງຢ່າງເຂັ້ມງວດ ແລະ ຕໍ່ກັບລູກຫຼານນັກຮຽນກໍ່ຕ້ອງໄດ້ພ້ອມກັນເອົາໃຈໃສມາຮ່ວມສອບເສັງຕາມວັນ,ເວລາທີ່ໄດ້ກຳນົດໄວ້ບໍ່ໃຫ້ຂາດ
ຂ່າວ-ພາບ : ທ.ແຫຼມສີນໄຊ ສໍປະເສີດ ຫ້ອງການ ຖວທ ເມືອງຊະນະສົມບູນ
