ໃນສັງຄົມປະຈຸບັນ ບັນຫາ ລັ ກ ຊັບພົນລະເມືອງ, ຍັງເກີດຂື້ນຫຼາຍຢູ່ບັນດາບ້ານ, ເມືອງ, ແຂວງໃນຂອບເຂດທົ່ວປະເທດ ເຊິ່ງບັນຫາດັ່ງກ່າວມັນໄດ້ສ້າງຄວາມບໍ່ສະຫງົບ ທັງເປັນການກົດໜວ່ງຖວ່ງດຶງການສ້າງສາພັດທະນາປະເທດຊາດ ແລະ ຍັງສ້າງຄວາມເສຍຫາຍໃຫ້ແກ່ຊັບສິນຂອງລັດ ແລະ ຂອງລວມໝູ່ ກໍ່ຄືຂອງບຸກຄົນ, ເຖິງແມ່ນວ່າໄລຍະຜ່ານມາ ທາງເຈົ້າໜ້າທີ່ໄດ້ເອົາໃຈໃສ່ສະກັດກັ້ນ ແລະ ແກ້ໄຂຫຼາຍປານໃດກໍ່ຕາມແຕ່ບັນຫາດັ່ງກ່າວກໍ່ຍັງເກີດຂື້ນຢູ່ ດັ່ງທີ່ພວກເຮົາໄດ້ຮູ້ໄດ້ເຫັນທາງໂທລະພາບ, ເຟສບຸກ ແລະ ສື່ຕ່າງໆ ສະເພາະ ຢູ່ເມືອງທຸລະຄົມ ແຂວງວຽງຈັນ ກໍ່ເກີດມີ ການລັກຊັບພົນລະເມືອງ ຜ່ານການລົງກວດກາຊັນນະສູດສະຖານທີ່ເກີດເຫດ ຂອງເຈົ້າໜ້າທີ່ ເຫັນວ່າມີມູນຄວາມຈິງ ຈຶ່ງໄດ້ຂື້ນບັນຊີເປົ້າໝາຍ ແລະ ຕິດຕາມເປົ້າໝາຍ ໃຊ້ເວລາ 2 ວັນ ຈຶ່ງສາມາດຈັບຕົວເປົ້າໝາຍໄດ້ 1 ຄົນຊື້ ທ້າວ ສອນ ອາຍຸ 29 ປີ, ກໍາມະກອນ, ຢູ່ບ້ານນາແກ່ວ ເມືອງທຸງລະຄົມ ແຂວງວຽງຈັນ ໃນຄັ້ງວັນທີ 2 ມີນາ 2022 ຜ່ານມານີ້ໃນຂໍ້ຫາລັກຊັບພົນລະເມືອງ ມາດຳເນີນການສືບສວນ-ສອບສວນ.
ຜ່ານການສືບສວນ-ສອບສວນ ຂອງເຈົ້າໜ້າທີ່ ກອງບັນຊາການ ປກສ ແຂວງວຽງຈັນ ທ້າວສອນ ໃຫ້ການຮັບສາລະພາບວ່າ: ໃນວັນທີ 1 ມີນາ 2022 ເວລາ 13 ໂມງ ຜູ້ກ່ຽວແມ່ນໄດ້ມາສະໜັກເປັນກຳມະກອນເຮັດວຽກນຳຮ້ານຂາຍເຄື່ອງກໍ່ສ້າງ ບ້ານໂພນແຮ່ ເມືອງທຸລະຄົມ ໃນເວລານັ້ນມີຜູ້ຊາຍ 2 ຄົນຢູ່ຮ້ານ ຜູ້ກ່ຽວເວົ້າວ່າ ມາສະໝັກ ເຮັດວຽກ ພວກກ່ຽວໄດ້ຕອບວ່າຄົນເຕັມແລ້ວບໍ່ຮັບ ຈາກນັ້ນ ທ້າວ ສອນ ໄດ້ຍ່າງອອກຈາກຮ້ານໄປໄດ້ປະມານ 10 ແມັດ ເຫັນລົດຮຸນໃດ , ສີປອນເງີນ ປ້າຍທະບຽນ ກຈ 0751 ກຳແພງນະຄອນ ເຊິ່ງລົດຄັນດັ່ງກ່າວແມ່ນລົດສົ່ງເຄື່ອງກໍ່ສ້າງຂອງຮ້ານດັ່ງກ່າວ ຈອດຢູ່ໜ້າຮ້ານ ສັງເກດເຫັນປະຕູລົດທັງສອງເບື້ອງບໍ່ໄດ້ອັດແວ່ນ ເຫັນກະແຈລົດຊູບຄາຢູ່ ຈຶ່ງມີແນວຄິດຢາກໄດ້ລົດຄັນດັ່ງກ່າວ ຈາກນັ້ນກໍ່ໄດ້ໄຂປະຕູ ຕິດຈັກລົດແລ້ວຂັບລົດໜີໄປຈອດປະໄວ່ແຄມທາງ ບ້ານນາກາງ ເມືອງທຸລະຄົມ ແຂວງວຽງຈັນ
ຈາກນັ້ນໄດ້ປົດປ້າຍລົດອອກ ແລ້ວຍ່າງໄປຊື້ເອກະສານ ໃບຊື້ຂາຍລົດມາຂຽນພ້ອມທັງໃສ່ພະຍານເພື່ອປອມແປງເອກະສານ ພາຍຫຼັງເອກະສານແລ້ວ ກໍ່ໄດ້ຍ່າງໄປນອນພັກຢູ່ເຮືອນຂອງຜູ້ກ່ຽວ ຢູ່ບ້ານນາແກ່ວ ຮອດເວລາປະມານ 5 ໂມງ ຂອງວັນທີ 2 ມີນາ 2022 ຜູ້ກ່ຽວຈຶ່ງຂັບລົດຄັນດັ່ງກ່າວເພື່ອຈະກັບໄປບ້ານເກີດ ຢູ່ບ້ານໃຫຍ່ ເມືອງທົ່ງມີໄຊ ແຂວງໄຊຍະບູລີ ເມື່ອເດີນທາງມາຮອດດ່ານບ້ານດົງ ເຈົ້າໜ້າທີ່ຕຳຫຼວດຈາລະຈອນ ປກສ ແຂວງວຽງຈັນ ລັດກວດກາເບີ່ງເອກະສານລົດ ທ້າວ ສອນ ຈອດລົດແລ່ນຫຼົບໜີ ຈາກນັ້ນເຈົ້າໜ້າທີ່ຕຳຫຼວດຈຶ່ງໄດ້ໄລ່ນຳຈັບທັນແລ້ວກັກຕົວຜູ້ກ່ຽວພ້ອມດ້ວຍລົດຮຸນໄດຄັນດັ່ງກ່າວມາດຳເນີນຄະດີຕາມລະບຽບກົດໝາຍ
ຜ່ານການສັງເກດຕີລາຄາຂອງເຈົ້າໜ້າທີ່ຕຳຫຼວດເຫັນວ່າ ທ້າວ ສອນ ແມ່ນມີເຈດຕະນາລັກຊັບພົນລະເມືອງ ຢ່າງແທ້ຈິງ ເຊິ່ງການກະທໍາດັ່ງກ່າວແມ່ນຜິດຕໍ່ກົດໝາຍອາຍາ ໃນມາດຕາ 231 ຂອງກົດໝາຍອາຍາສະບັບປັບປຸງ ໃນປີ 2017 ປະຈຸບັນໄດ້ເກັບກູ້ລົດຮຸນໄດຄັນດັ່ງກ່າວ ມາໄວ້ກອງບັນຊາການ ປກສ ແຂວງວຽງຈັນ.
ນັກຂ່າວ ປກສ ແຂວງວຽງຈັນ
