ໃນຕອນບ່າຍຂອງ ວັນທີ 6 ເມສາ 2022 ນີ້ ທ່ານ ບຸນເລືອມ ມະນີວົງ ຮອງເຈົ້າແຂວງໆຫຼວງພະບາງໃຫ້ກຽດຕ້ອນຮັບຄະນະຊ່ຽວຊານຈາກສູນມໍລະດົກໂລກ ແລະ ອົງການອີໂກໂມສ (ICOMOS ) ພ້ອມດ້ວຍຄະນະ ກຳມະການລະດັບທອງຖິ່ນເພື່ອມໍລະດົກໂລກ ທີ່ໄດ້ລົງເຄື່ອນໄຫວຕິດຕາມ ກວດກາສະພາບ ການປົກປັກສາເມືອງມໍລະດົກໂລກແຂວງຫຼວງພະບາງ ແລະຕິດຕາມການເຄື່ອນໄຫວກອງທຶນມໍລະດົກໂລກ.
ຈຸດປະສົງຂອງການພົບປະໃນຄັ້ງນີ້ແມ່ນ ເພື່ອແນໃສ່ໃນການຮ່ວມມື, ປົກປັກຮັກສາວັນທະນະທຳ ພາຍໃນແຂວງຫຼວງພະບາງໃຫ້ເປັນມໍລະດົກໂລກ ຄະນະຊ່ຽວຊານຈາກ ສູນມໍລະດົກໂລກເຊິ່ງເປັນທີ່ປຶກສາ ຂອງອົງການອຸຍແນັສໂກ (UNESCO) ຈະມາປະເມີນຕິດຕາມ, ກວດກາສະພາບການປົກປັກຮັກສາເມືອງມໍຣະດົກໂລກຫຼວງພະບາງ ຢ່າງຮອບດ້ານ ເປັນຕົ້ນແມ່ນການປະຕິບັດນະໂຍບາຍການອານຸລັກມໍຣະດົກໂລກ, ລະບຽບການທີ່ກ່ຽວຂ້ອງ ການເຄື່ອນໄຫວກອງທຶນມໍຣະດົກໂລກ ແລະ ບັນດາໂຄງການພັດທະນາພື້ນຖານໂຄງລາງເຊັ່ນ: ເຄື່ອນໄຟຟ້ານ້ຳຂອງແຂວງຫຼວງພະບາງ, ໂຄງການກໍ່ສ້າງຕາຝັ່ງກັນເຈື່ອນແຄມນ້ຳຄານ, ໂຄງການບູລະນະຂົວນ້ຳຄານເກົ່າ ແລະວຽກງານອື່ນອີກ.
ໃນການພົບປະຄັ້ງນີ້ທ່ານຮອງເຈົ້າແຂວງໄດ້ຕີລາຄາສູງຕໍ່ການມາຢ້ຽມຢາມແຂວງຫຼວງພະບາງຂອງຄະນະຊ່ຽວຊານ ຈາກສູນມໍຣະດົກໂລກ ທີ່ໄດ້ເປັນຫ່ວງເປັນໃຍຕໍ່ການພັດທະນາຂອງແຂວງກໍຄືການພັດທະນາເຂດມໍລະດົກໂລກ ໃຫ້ຢູ່ໃນກອບຂອງອົງການອົງການອຸຍແນັສໂກກໍານົດໄວ້. ພ້ອມນີ້ ອຳນາດການປົກຄອງແຂວງຫຼວງພະບາງຕ້ອງໄດ້ເອົາໃຈໃສ່ເປັນພິເສດຕໍ່ກັບພາລະບົດບາດຂອງການເປັນມໍຣະດົກໂລກ. ເຊິ່ງທາງຄະນະຊ່ຽວຊານຈະຊ່ວຍລະດົມທຶນ ທາງດ້ານງົມປະປານ ໃຫ້ຫ້ອງການມໍລະດົກໂລກ ໂດຍສະເພາະກົນໄກກອງທຶນມໍຣະດົກໂລກ ຊ່ວຍ ສປປ ລາວ ໂດຍສະເພາະກໍແມ່ນເມືອງມໍລະດົກໂລກຫຼວງພະບາງ ແລະ ໃນຕອນທ້າຍພິທີ ທ່ານຮອງເຈົ້າແຂວງ ຍັງໄດ້ມອບຂອງທີ່ລະນຶກ ໃຫ້ແກ່ທາງຄະນະຊ່ຽວຊານຕື່ມອີກ.
ພາບ-ຂ່າວ: ສີສຸວັນ – ທິບພາພອນ ສຸດທິໂວຫານ
