ແຫລ່ງຂ່າວຈາກ ເມືອງເງິນ ແຂວງໄຊຍະບູລີ ໃຫ້ຮູ້ວ່າ: ວັນທີ 10 ມັງກອນ 2022 ນີ້, ໂຄງການດີບຸກບໍລິຈາກ ໄດ້ມອບປຶ້ມອ່ານເກືອບ 5.000 ຫົວ ເຂົ້າຫ້ອງອ່ານຢູ່ໂຮງຮຽນ 16 ແຫ່ງທົ່ວເມືອງເງິນ ລວມມູນຄ່າ 124 ລ້ານກວ່າກີບ, ເຊິ່ງພິທີມອບ-ຮັບໄດ້ຈັດຂຶ້ນຢູ່ຫ້ອງການສຶກສາທິການ ແລະ ກິລາ ເມືອງເງິນ, ຕາງໜ້າມອບໂດຍ ທ່ານ ນາງ ບຸນຊ້ອນ ໄຊວຸດທິ ເຈົ້າຂອງຮ້ານປື້ມດີບຸກ.
ທ່ານ ນາງ ບຸນຊ້ອນ ໄຊວຸດທິ ໄດ້ໃຫ້ຮູ້ວ່າ: ໂຄງການດີບຸກບໍລິຈາກ ໄດ້ເປີດຮັບບໍລິຈາກປຶ້ມ ຢູ່ຮ້ານປຶ້ມດີບຸກ ບ້ານຕານມີໄຊ ເມືອງໄຊທານີ ນະຄອນຫລວງວຽງຈັນ ໂດຍເລີ່ມປະກາດຮັບບໍລິຈາກແຕ່ວັນທີ 17 ທັນວາ 2021 ເປັນຕົ້ນມາ, ເຊິ່ງປື້ມດັ່ງກ່າວ ແມ່ນປື້ມນິທານ ແລະ ປື້ມຄວາມຮູ້ທົ່ວໄປ ໂດຍໄດ້ຮັບຈາກບັນດາຜູ້ໃຈບຸນທັງຫລາຍ ເປັນຕົ້ນ ສຳນັກພິມດອກເກດ, ສະມາຄົມນໍ້າໃຈເດັກນ້ອຍລາວ, ມູນນິທິເຈືອງສົມບູນຂັນ ແລະ ພາກ ສ່ວນອື່ນໆ.
ໂອກາດນີ້, ທ່ານ ບຸນເລື່ອນ ບົວໄລ ຮອງເຈົ້າເມືອງໆເງິນ, ຜູ້ຊີ້ນຳວຽກງານຂົງເຂດວັດທະນະທຳ-ສັງຄົມຂັ້ນເມືອງ ໄດ້ສະແດງຄວາມຍ້ອງຍໍຊົມເຊີຍ ແລະ ຂອບອົກຂອບໃຈມາຍັງໂຄງການດີບຸກບໍລິຈາກ ແລະ ບັນດາທ່ານຜູ້ໃຈບຸນທັງຫລາຍ ທີ່ໄດ້ນຳເອົາປື້ມມາມອບໃຫ້ຫ້ອງອ່ານຂອງແຕ່ລະໂຮງຮຽນໃນຄັ້ງນີ້. ພ້ອມທັງຢືນຢັນວ່າຈະນຳເອົາປື້ມດັ່ງກ່າວໄປມອບໃຫ້ໂຮງຮຽນປະຖົມ, ມັດທະຍົມທີ່ຢູ່ຫ່າງໄກສອກລີກ ທີ່ຍັງຂາດເຂີນປື້ມອ່ານ ຢ່າງທົ່ວເຖິງ.
ຂ່າວ: ອິນແປງ ແຫວນຄຳ
