ແຫລ່ງຂ່າວຈາກ ເມືອງອາດສະພອນ ແຂວງສະຫວັນນະເຂດ ໃຫ້ຮູ້ວ່າ: ເມື່ອບໍ່ດົນມານີ້, ທ່ານ ສີວິໄລ ສີທຳມະວັນ ຮອງເຈົ້າເມືອງອາດສະພອນ ແລະ ທ່ານ ແຫວນທອງ ສິງທຳມະວົງ ປະທານສະຫະພັນກຳມະບານເມືອງ ລົງຕິດຕາມ ແລະ ຊຸກຍູ້ການກໍ່ສ້າງເສັ້ນທາງເບຕົງເສີມເຫລັກ ຂອງປະຊາຊົນບ້ານນາຮັງນ້ອຍ ພາຍຫລັງເລີ່ມລົງມືກໍ່ສ້າງແຕ່ວັນທີ 3 ມັງກອນ 2022, ເຊິ່ງໄລຍະທຳອິດເລີ່ມແຕ່ສາມແຍກທາງເຂົ້າບ້ານຫາແຍກທາງເຂົ້າວັດ ມີຄວາມຍາວ 250 ແມັດ, ກວ້າງ 5 ແມັດ, ໜາ 15 ຊັງຕີແມັດ ຄາດວ່າຈະນຳໃຊ້ງົບປະມານ ໄລຍະທຳອິດ 35 ລ້ານກີບ ໂດນນຳໃຊ້ເງິນກອງທຶນບ້ານ ສົມ ທົບກັບການປະກອບສ່ວນຂອງ ພໍ່ແມ່ປະຊາຊົນພາຍໃນບ້ານນາຮັງນ້ອຍ ແລະ ພາກສ່ວນຕ່າງໆໃນສັງຄົມ.
ທ່ານ ບຸນຫລົບ ວົງຫາຈັກ ນາຍບ້ານນາຮັງນ້ອຍ ໄດ້ໃຫ້ຮູ້ວ່າ: ການສ້າງເສັ້ນທາງ ໃນຄັ້ງນີ້, ໄດ້ຕົກລົງເຫັນດີເປັນເອກະພາບກັນ ໃນການສ້າງສາພັດທະນາບ້ານຂອງຕົນໃຫ້ມີໃບໜ້າອັນໃໝ່ ໂດຍສະເພາະແມ່ນການສ້າງພື້ນຖານໂຄງລ່າງ ຖະໜົນຫົນທາງພາຍໃນບ້ານ ໃຫ້ມີຄວາມສະດວກສະບາຍ ແລະ ມີຄວາມຮັບປະກັນດ້ານຄຸນນະພາບ, ເຊິ່ງແຮງງານທີ່ປະກອບສ່ວນເຂົ້າໃນການກໍ່ສ້າງ ແມ່ນແຮງງານຂອງພໍ່ແມ່ປະຊາຊົນ ພາຍໃນບ້ານ ທັງໝົດ ໄດ້ຜັດປ່ຽນກັນເຮັດໃນແຕ່ລະວັນ, ວັນໜຶ່ງປະມານ 30 ກ່ວາຄົນ ໂດຍມີການປະສານສົມທົບກັບການນຳຂອງເມືອງ ແລະ ຫ້ອງການ ຍທຂ ເມືອງ ລົງຕິດຕາມຢ່າງໃກ້ສິດຕິດແທດໃນດ້ານວິຊາການເປັນຫລັກ.
.
ຂ່າວ: ຖວທ ເມືອງອາດສະພອນ
