ຜູ້ຕິດເຊື້ອພະຍາດໂ ຄ ວິ ດ ຢູ່ແຂວງສາລະວັນ ຈໍານວນ 10 ຄົນ ຍິງ 3 ຄົນ. ໃນນັ້ນ, ມີເດັກອາຍຸຕໍ່າກວ່າ 10 ປີ ຈໍານວນ 2 ຄົນ ຍິງ 1 ຄົນ ໄດ້ຮັບການປີ່ນປົວຫາຍດີ ແລະ ຈັດສົ່ງກັບບ້ານແລ້ວຄື: ເມືອງຄົງເຊໂດນ 8 ຄົນ ແລະ ເມືອງລະຄອນເພັງ 2 ຄົນ ຊຶ່ງແມ່ນກໍລະນີແຮງງານນໍາເຂົ້າ ທີ່ໄດ້ກວດພົບເຊື້ອໃນວັນທີ 17 ກໍລະກົດ 2021 ແລະ ເຂົ້າຮັບການປິ່ນປົວຢູ່ໂຮງໝໍພາກສະໜາມ ໂຮງຮຽນສາມັນກິນນອນຊົນເຜົ່າ ແຂວງສາລະວັນ.
ທີມງານແພດໝໍ ເອົາໃຈໃສ່ປິ່ນປົວ ແລະ ຕິດຕາມອາການຢ່າງເປັນປົກກະຕິ, ຜ່ານການກວດຫາເຊື້ອພະຍາດໂ ຄ ວິ ດ ຈໍານວນຫຼາຍຄັ້ງ ບໍ່ພົບເຊື້ອ ແລະ ບໍ່ມີອາການຕ່າງໆສະແດງ, ໂຮງໝໍແຂວງສາລະວັນ ຈຶ່ງໄດ້ຢັ້ງຢືນ ແລະ ຈັດສົ່ງກັບໄປຈໍາກັດບໍລິເວນຕົນເອງ 14 ວັນ ຢູ່ສູນຂອງເມືອງ ພ້ອມທັງແນະນຳໃຫ້ເຂົາເຈົ້າ ບໍ່ໃຫ້ພົວພັນກັບຄົນໃນຄອບຄົວ ຫຼື ເດີນທາງໄປມາຫາສູ່ກັນພາຍໃນຊຸມຊົນ-ສັງຄົມຢ່າງເດັດຂາດ ເພື່ອສືບຕໍ່ຕິດຕາມອາການຂອງຕົນເອງຕື່ມອີກ ແລະ ຕ້ອງປະຕິບັດຕາມມາດຕະການປ້ອງກັນພະຍາດໂ ຄ ວິ ດ ຢ່າງເຄັ່ງຄັດ.
ພິທີຈັດສົ່ງຈັດຂຶ້ນໃນທ້າຍເດືອນກໍລະກົດນີ້ ທີ່ສູນຈໍາກັດບໍລິເວນ ໂຮງຮຽນສາມັນກິນນອນຊົນເຜົ່າ ແຂວງ ໂດຍມີ ທ່ານ ສົມໝາຍ ແກ້ວມະນີ ຮອງຜູ້ອໍານວຍການໂຮງໝໍແຂວງ, ທ່ານ ອຸດົມສັກ ສີສະນະ ຮັບຜິດຊອບໂຮງໝໍພາກສະໜາມ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
(ພາບ-ຂ່າວ: ທິດລານີ ໂຄດໂຍທາ).
ກົດລິ້ງນີ້ເພື່ອສັ່ງອາຫານ ແລະ ຮັບສ່ວນຫຼຸດທັນທີ
