ພິທີປະກາດພະນັກງານການນຳ ສະພາປະຊາຊົນແຂວງ ອັດຕະປື ອອກພັກການ-ຮັບອຸດໜູນບຳນານ ແລະ ແຕ່ງຕັ້ງຕຳແໜ່ງພະນັກງານເຂົ້າໃນພະແນກກະສີກຳ ແລະ ປ່າໄມ້ແຂວງໃນວັນທີ 23 ກໍລະກົດ 2021 ນີ້.
ພາຍໃຕ້ການເປັນປະທານຂອງທ່ານ ເລັດ ໄຊຍະພອນ ກຳມະການສູນກາງພັກ, ເລຂາພັກແຂວງ, ເຈົ້າແຂວງອັດຕະປື, ມີທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ, ປະທານ ສະພາປະຊາຊົນແຂວງ, ມີບັນດາທ່ານຄະນະປະຈໍາພັກ, ກຳມະການພັກແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທີ ໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການອະນຸມັດໃຫ້ ທ່ານ ເພັດແກ້ວ ເຮືອງປັນຍາ ອະດີດກຳມະການພັກແຂວງ, ປະທານສະພາປະຊາຊົນແຂວງ ອອກພັກການ-ຮັບອຸດໜູນບຳນານ, ຜ່ານຂໍ້ຕົກລົງຂອງເຈົ້າແຂວງ ວ່າດ້ວຍການແຕ່ງຕັ້ງ ທ່ານ ກົງໃຈ ສີດາວົງ ເປັນຮອງຫົວໜ້າພະແນກກະສີກຳ ແລະ ປ່າໄມ້ແຂວງ,ຜ່ານຂໍ້ຕົກລົງຂອງເຈົ້າແຂວງ ວ່າດ້ວຍການອະນຸ ມັດໃຫ້ ທ່ານ ແກ້ວວົງວຽນ ບຸດສະວົງ ຮອງປະທານສະພາປະຊາຊົນແຂວງ ອອກພັກຜ່ອນລໍຖ້າຮັບອຸດໜູນບຳນານ.
ໂອກາດດັ່ງກ່າວ, ທ່ານ ເລັດ ໄຊຍະພອນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ພົ້ນເດັ່ນຕະຫລອດໄລ ຍະຜ່ານມາ ໃນການປະກອບສ່ວນຕໍ່ພາລະກິດ ການປະ ຕິວັດ ແລະ ປົກປັກຮັກສາ, ສ້າງສາງພັດທະນາປະເທດຊາດ, ທຸກຄົນລ້ວນແລ້ວແຕ່ແມ່ນຜູ້ທີ່ມີພະລະບົດບາດໜ້າທີ່ສຳຄັນໃນການຈັດຕັ້ງພັກ-ລັດ, ເຊິ່ງພວກເຮົາບໍ່ອາດຈະຫລົງລືມເຖິງຜົນງານ, ເຊື່ອໜັ້ນວ່າບັນດາທ່ານທີ່ໄດ້ອອກພັກການຮັບບຳນານໄປນັ້ນ ຈະສືບຕໍ່ເປັນກຳລັງແຮງສຶກສາອົບຮົມພະນັກງານຫລັກແຫລ່ງ, ລູກຫລານປະຊາຊົນທີ່ຕົນສັງກັດຢູ່ຮາກຖານທ້ອງຖິ່ນ ເຮັດໃຫ້ເຂົາເຈົ້າກາຍເປັນພະນັກງານສືບທອດປ່ຽນແທນ, ພະນັກງານຄຸ້ມຄອງ ແລະ ເປັນກຳລັງແຮງອັນສຳຄັນ ໃນການປະກອບສ່ວນເຂົ້າໃນພາລະກິດສ້າງສາພັດທະນາປະເທດຊາດ ໃນໄລຍະໃໝ່ດີຂຶ້ນເປັນກ້າວໆ.
ການຫັນປ່ຽນພະນັກງານ ແມ່ນບັນຫາສຳຄັນອີງໃສ່ຄວາມຮຽກຮ້ອງຕ້ອງການ ໃນພາລະກິດປ່ຽນແປງໃໝ່ ເພື່ອສ້າງໃຫ້ກຳລັງຖັນແຖວພະນັກງານມີຄວາມໜັກແໜ້ນເຂັ້ມແຂງ, ຈົ່ງຮັກພັກດີ. ຈັດຕັ້ງປະຕິບັດໜ້າທີ່ວຽກງານໃຫ້ມີຜົນສຳເລັດ.
(ພາບ-ຂ່າວ:ວິນັດ ສພຂ)
ກົດລິ້ງນີ້ເພື່ອສັ່ງອາຫານ ແລະ ຮັບສ່ວນຫຼຸດທັນທີ
