ນັບແຕ່ວັນທີ 16 ກໍລະກົດ 2021 ນີ້ເປັນຕົ້ນມາ, ຍ້ອນ ໄດ້ຮັບຜົນກະທົບຈາກຝົນຕົກໜັກ ຢູ່ 89 ເມືອງ 560 ກວ່າຕາແສງ ຂອງແຂວງເຫີນານ ປະເທດຈີນ ທີ່ມີປະຊາຊົນທັງໝົດ 1.240.737 ຄົນໄດ້ປະສົບໄພນ້ຳຖ້ວມຢ່າງຮ້າຍແຮງ, ຈົນເຮັດໃຫ້ມີຜູ້ເສຍຊີວິດ 25 ຄົນ ແລະ 7 ຄົນຂາດການຕິດຕໍ່.
.
ທ່ານ ສີຈິ້ນຜິງ ປະທານປະເທດຈີນ ໄດ້ໃຫ້ທິດຊີ້ນຳວ່າ: ປັດຈຸບັນໄດ້ເຂົ້າສູ່ໄລຍະສຳຄັນໃນການຕ້ານ ແລະ ກູ້ໄພນ້ຳຖ້ວມ ຕ້ອງຖືເອົາການຮັບປະກັນຄວາມປອດໄພດ້ານຊີວິດ ແລະ ຊັບສິນຂອງປະຊາຊົນເປັນອັນດັບໜຶ່ງຢ່າງສະເໝີຕົ້ນສະເໝີປາຍ, ຈັດຕັ້ງທຸກກຳລັງເຂົ້າໃນການປ້ອງກັນ ແລະ ກູ້ໄພນ້ຳຖ້ວມຢ່າງວ່ອງໄວ, ຈັດສັນຍົກຍ້າຍປະຊາຊົນຜູ້ປະສົບໄພໄປໄວ້ສະຖານທີ່ປອດໄພ ຢ່າງເໝາະສົມ, ປ້ອງກັນໄພທຳມະຊາດທີ່ເກີດຂຶ້ນຕາມຫລັງຢ່າງເຄັ່ງຄັດ, ຫລຸດຄວາມເສຍຫາຍດ້ານຊີວິດ ແລະ ບາດເຈັບ ກໍຄືຜົນເສຍຫາຍດ້ານຊັບສິນໃຫ້ໜ້ອຍລົງເທົ່າທີ່ຈະໜ້ອຍໄດ້.
.
ປັດຈຸບັນ, ຢູ່ທົ່ວແຂງເຫີນານ ໄດ້ຊ່ວຍເຫລືອປະຊາຊົນ 16.325 ຄົນໃຫ້ສາມາດອອກຈາກບ່ອນອັນຕະລາຍໂດຍໄວ ແລະ ຈັດສັນຍົກຍ້າຍປະຊາຊົນຈຳນວນ 164.710 ຄົນໄປໄວ້ສະຖານທີ່ປອດໄພ. ກະຊວງການເງິນຈີນ ໄດ້ຈັດສັນງົບປະມານເພື່ອກູ້ໄພສຸກເສີນ 100 ລ້ານຢວນ ເພື່ອໃຊ້ໃນການກູ້ໄພສຸກເສີນ ແລະ ຊ່ວຍເຫລືອຜູ້ປະສົບໄພ ພ້ອມທັງຟື້ນຟູການຜະລິດກະສິກຳ ແລະ ສ້ອມແປງສິ່ງກໍ່ສ້າງ ຊົນລະປະທານທີ່ຖືກທຳລາຍຍ້ອນນ້ຳຖ້ວມ ແລະ ວຽກອື່ນໆ.
.
ໄພນ້ຳຖ້ວມທີ່ເກີດຂຶ້ນຢູ່ແຂວງເຫີນານ ໄດ້ເຮັດໃຫ້ປະຊາຊົນ ທົ່ວປະເທດຈີນ ມີຄວາມເປັນຫ່ວງເປັນໃຍກັນຫລາຍທີ່ສຸດ. ກອງດັບເພີງ ຂອງແຂວງຕ່າງໆໄດ້ເດີນທາງໄປໃຫ້ຄວາມຊ່ວຍເຫລືອ ແຂວງເຫີນານ ຢ່າງຮີບດ່ວນ, ວົງການຕ່າງໆໃນສັງຄົມໄດ້ໃຊ້ຮູບການຕ່າງໆ ເຊິ່ງລວມທັງການບໍລິຈາກເງິນ ແລະ ວັດຖຸຈຳເປັນ ແລະ ໃຫ້ກຳລັງໃຈປະຊາຊົນ ແຂວງເຫີນານ ຜ່ານສື່ສັງຄົມອອນລາຍ.
.
ສະພາກາແດງຈີນ ໄດ້ສົ່ງຕູບຜ້າເຕັນ, ຖົງເຄື່ອງຊ່ວຍເຫລືອກູ້ໄພ ສຳລັບຄອບຄົວ ເສື້ອກັນຝົນ ແລະ ອື່ນໆໃຫ້ແຂວງເຫີນານ ຢ່າງຮີບດ່ວນ, ວິສາຫະກິດ ແລະ ບຸກຄົນຈຳນວນຫລວງຫລາຍ ໄດ້ໃຫ້ການຊ່ວຍເຫລືອຢ່າງຮີບດ່ວນແກ່ ແຂວງເຫີນານ, ອົງການຈັດຕັ້ງທາງສັງຄົມໄດ້ເປີດຊ່ອງທາງດ່ວນ ສຳລັບການບໍລິຈາກຜ່ານເຄືອຂ່າຍອິນເຕີເນັດທົ່ວປະເທດຈີນ, ໄດ້ແຈກອາຫານ ແລະ ເຄື່ອງໃຊ້ປະຈຳວັນໂດຍບໍ່ເກັບຄ່າ ໃຫ້ປະຊາຊົນຜູ້ປະສົບໄພ.
.
ເມື່ອເຫັນສະພາບການຊ່ວຍເຫລືອຄືແນວນີ້, ເຮັດໃຫ້ຜູ້ຂຽນຫວນຄືນເຖິງໄພທຳມະຊາດອັນຮ້າຍແຮງທີ່ເກີດຂຶ້ນຢູ່ຈີນ ໃນເມື່ອກ່ອນເຊັ່ນ: ໄພນ້ຳຖ້ວນຄັ້ງຮ້າຍແຮງພິເສດເມື່ອປີ 1998, ແຜ່ນດິນໄຫວຄັ້ງຮ້າຍແຮງທີ່ເກີດຂຶ້ນຢູ່ເມືອງເວີ້ນຊ່ວນ ແຂວງເສສວນ ໃນປີ 2008, ແຜ່ນດິນໄຫວຮ້າຍແຮງທີ່ເກີດຂຶ້ນຢູ່ເມືອງອີ້ຊູ້ ແຂວງຊິ່ງໄຫ ແລະ ບັ້ນຕ້ານການແພ່ລະບາດຂອງພະຍາດໂ ຄ ວິ ດ ຢູ່ອູຮັ້ນ ແຂວງຫູເປີຍ ປະເທດຈີນ, ເຫດການທັງໝົດເຫລົ່ານີ້ ລ້ວນແຕ່ມີສະພາບການທີ່ຄ້າຍຄືກັນ ຄື ປະຊາຊົນທົ່ວປະເທດ ເປັນເຈົ້າການຊ່ວຍເຫລືອເຂດປະສົບໄພ, ລັດຖະບານສຸມທຸກກຳລັງ ເພື່ອປົກປ້ອງຄວາມປອດໄພດ້ານຊີວິດ ແລະ ຊັບສິນຂອງປະຊາຊົນ ຢ່າງສະເໝີຕົ້ນສະເໝີປາຍ, ເຊິ່ງບໍ່ພຽງແຕ່ສະແດງໃຫ້ເຫັນເຖິງ ຄວາມສາມັກຄີຂອງປະຊາຊົນເທົ່ານັ້ນ, ທັງກໍໄດ້ສ່ອງແສງໃຫ້ເຫັນເຖິງທັດສະນະທີ່ຖືເອົາປະຊາຊົນສຳຄັນກວ່າໝູ່ຂອງລັດຖະບານຈີນ.
