ໃນຕອນເຊົ້າຂອງວັນທີ 16 ມິຖຸນາ 2021 ນີ້ ທາງກອງບັນຊາການປ້ອງກັນຄວາມສະຫງົບເມືອງ ວິລະບູລີ ໄດ້ຈັດພິທີມອບ-ຮັບເຄື່ອງຂອງກາງປະເພດແຮ່ຫີນຂຽວ ທີ່ກອງບັນຊາການປ້ອງກັນຄວາມສະຫງົບຂອງເມືອງ ໄດ້ກວດຢຶດ,ເກັບກູ້ ແລະ ທ້ອນໂຮມມາໄດ້ຈາກກຸ່ມຄົນບໍ່ດີຈໍານວນໜຶ່ງ ໃນໄລຍະທີ່ຜ່ານມາ ຄືນໃຫ້ແກ່ບໍລິສັດລ້ານຊ້າງ ມີເນໂຣນສ໌ລິມິເຕັດ ຫຼື ໂຄງການຂຸດຄົ້ນຄໍາ – ທອງແດງເຊໂປນ; ເຊິ່ງເປັນກຽດເຂົ້າຮ່ວມໃນພິທີດັ່ງກ່າວ ຂອງທ່ານ ຄໍາຜຸຍ ສີບຸນເຮືອງ ກໍາມະການພັກແຂວງ ເລຂາພັກເມືອງ ເຈົ້າເມືອງວິລະບູລີ, ມີທ່ານ ພັທ ບຸນເຫຼືອ ມະນີລາ ຮອງຫົວໜ້າກອງບັນຊາການປ້ອງກັນຄວາມສະຫງົບເມືອງ ພ້ອມດ້ວຍຄະນະ, ທ່ານ ນາມຊະນະ ໂພທິພັນ ຫົວໜ້າສາຍງານຂົນຂວາຍ ແລະ ພົວພັນພັກລັດ, ທ່ານ ສຸລິນພອນ ອິນທິສອນ ຫົວໜ້າສາຍງານປ້ອງກັນຄວາມສະຫງົບ ຂອງບໍລິສັດລ້ານຊ້າງ ມີເນໂຣນ ລິມິເຕັດ ພ້ອມດ້ວຍທ່ານ ພັທ ສຸກສໍາລານ ໝື່ນແກ້ວມຸງຄຸນ ຄະນະກອງຮ້ອຍເອກະລາດ ເຂົ້າຮ່ວມເປັນສັກຂີພິຍານ.
.
ສໍາລັບເຄື່ອງຂອງກາງປະເພດແຮ່ຫີນຂຽວທີ່ມອບ-ຮັບກັນໃນຄັ້ງນີ້ ແມ່ນມີນໍ້າໜັກລວມທັງໝົດຈໍານວນ 17.057 ກິໂລ ໂດຍແມ່ນເຈົ້າໜ້າທີ່ຕໍາຫຼວດຂອງກອງບັນຊາການປ້ອງກັນຄວາມສະຫງົບເມືອງ ວິລະບູລີ ສາມາດກວດຢຶດ, ເກັບກູ້ ແລະ ທ້ອນໂຮມມາໄດ້ໃນໄລຍະນັບແຕ່ຕົ້ນປີ 2021 ທີ່ຜ່ານມາຮອດປະຈຸບັນ ຈາກພວກກຸ່ມຄົນບໍ່ດີຈໍານວນໜຶ່ງ ທີ່ໄດ້ເຂົ້າລັກລອບເອົາ ໃນເຂດສໍາປະທານໂຄງການຂຸດຄົ້ນຄໍາ-ທອງແດງເຊໂປນ ຂອງບໍລິສັດລ້ານຊ້າງ ມີເນໂຣນສ໌ ລິມິເຕັດ ເຊິ່ງແມ່ນຜິດຕໍ່ລະບຽບກົດໝາຍຂອງບ້ານເມືອງ, ດັ່ງນັ້ນ, ຈຶ່ງໄດ້ມອບເຄື່ອງຂອງກາງເຫຼົ່ານີ້ ຄືນໃຫ້ແກ່ບໍລິສັດ ລ້ານຊ້າງມີເນໂຣນສ໌ລິມິເຕັດ ເພື່ອນໍາໃຊ້ຕໍ່ໄປ.
