ເວທີປະກວດ ມີສຢູນິເວີສ ຄັ້ງທີ 69 (Miss Universe 2020) ທີ່ຈັດຂຶ້ນຢູ່ລັດ ຟຣໍລີດາ ສະຫະລັດອາເມລິກາ ໄດ້ຜ່ານພົ້ນໄປແລ້ວ ເຊິ່ງສາວງາມຈາກລາວທີ່ໄປຂຶ້ນເວທີລະດັບໂລກຄັ້ງນີ້ ກໍ່ຄື ນາງ ຄຣິສຕີນາ ລາຊະສິມມາ ກໍ່ໄດ້ເດີນທາງມາຮອດມາເຖິງປະເທດລາວ ແຕ່ວັນທີ 29 ພຶດສະພາ ເຊິ່ງປັດຈຸບັນ ຄຣິສຕີນາ ກໍ່ພວມຈຳກັດບໍລິເວນຕົນເອງ 14 ວັນ ເພື່ອປະຕິບັດຕາມມາດຕະການເຝົ້້າລະວັງ ພະຍາດໂຄວິດ.
ການປະກວດປີ Miss Universe 2020 ຈົບລົງ ແຕ່ກະແສ ຫລື ຫາງສຽງຕ່າງໆ ຍັງຄົງມີມາບໍ່ຂາດສາຍ, ດັ່ງນັ້ນ ບໍລິສັດ ມີສລາວ ຈຳກັດ ເຊິ່ງເປັນ ຜູ້ຖືລິຂະສິດເວທີປະກວດມີສຢູນິເວີສ ລາວ ແຕ່ພຽງຜູ້ດຽວໃນປະເທດລາວ ນັບຕັ້ງແຕ່ປີ 2017 ເປັນຕົ້ນມາ ໄດ້ຕັ້ງໂຕະຖະແຫລງຂ່າວ ໃນເວລາ 15 ໂມງ ວັນທີ 1 ມິຖຸນາ 2020 ນີ້ ທີ່ນະຄອນຫລວງວຽງຈັນ ກ່ຽວກັບການແຕ່ງຕັ້ງທີມບໍລິຫານຈັດການໃໝ່ ຂອງໂຄງການປະກວດມີສຢູນິເວີສລາວ.
ທ່ານ ພິມມະເສນ ແສງມະນີ ຕາງໜ້າບໍລິສັດ ມີສລາວ ຈຳກັດ ໄດ້ແຈ້ງການໃນພິທີຖະແຫລງຂ່າວວ່າ: “ບໍລິສັດ ມີສລາວ ຈໍາກັດ ເຫັນດີເປັນເອກະພາບແຕ່ງຕັ້ງທ່ານນາງ ຈັນໂສ ຈິດຕິວົງ ຜູ້ອຳນວຍການ ຮ້ານເພັດພະໄທ ຈິວເວີລີ້ ແລະ ທຸລະກິດໃນເຄືອ ເປັນປະທານໂຄງການປະກວດມີສຢູນິເວີສລາວ ປີ 2021-2022 ຢ່າງເປັນທາງການ, ສ່ວນການປະສານງານກັບກອງປະກວດໃຫຍ່ຢູ່ສະຫະລັດ ອາເມລິກາ ແມ່ນຈະເປັນໄປຕາມລະບຽບກົດໝາຍ. ຂະນະທີ່ ເອກະສານໃນການຄັດເລືອກປະທານນີ້ ກໍເປັນໄປຕາມລະບຽບຫລັກການທີ່ຖືກຕ້ອງ”.
ໂອກາດນີ້, ທ່ານນາງ ຈັນໂສ ຈິດຕິວົງ ປະທານໂຄງການປະກວດມີສຢູນິເວີສລາວ ໄດ້ກ່າວໃນພິທີວ່າ: “ການມາຮັບໜ້າທີ່ທີ່ມີກຽດຄັ້ງນີ້, ຂໍສັນຍາວ່າ ຈະເຮັດໃຫ້ດີທີ່ສຸດ, ເອົາຄວາມຮູ້ຄວາມສາມາດ ສູງສຸດ ແລະ ທີມງານທີ່ມີຄຸນນະພາບຜ່ານການຄັດເລືອກມາຢ່າງດີ ພວກເຮົາພ້ອມທີ່ຈະເຮັດວຽກຢ່າງມີຄຸນນະພາບ ແລະ ຂໍຮັບເອົາຄໍາຕໍານິຕິຊົມຈາກທຸກພາກສ່ວນ ເພື່ອຖອດຖອນເອົາມາເປັນບົດຮຽນ.
ສໍາລັບ ການຄັດເລືອກສາວງາມ ໃນການປະກວດປີ 2021ນີ້ ຈະມີຂຶ້ນຢ່າງແນ່ນອນ ແລະ ເປີດກວ້າງໃຫ້ແມ່ຍິງລາວທຸກຄົນທີ່ມີເງື່ອນໄຂເຂົ້າຮ່ວມ, ຂໍຝາກໃຫ້ທຸກທ່ານຕິດຕາມຜົນງານທີມງານພວກເຮົາດ້ວຍ”.
ນອກຈາກ ປະທານໂຄງການແລ້ວ, ຍັງແຕ່ງຕັ້ງທີມງານບໍລິຫານຈັດການໃໝ່ຄົບຊຸດ ເປັນຕົ້ນ ຄັດເລືອກເອົາ ທ່ານ ເທບມະຫາວິໄຊ ໄຊທິລາດ ຜູ້ອຳນວຍການ ບໍລິສັດ ກ້າວໜ້າ ອໍການາຍເຊີ້ ຈໍາກັດ ແລະ ກຸ່ມທຸລະກິດໃນເຄືອ ຫລື ຕ້າ ເອແພັກ ເປັນຜູ້ອຳນວຍການໂຄງການປະກວດ General Director of Miss Universe Laos ພ້ອມດ້ວຍຕໍາແໜ່ງງານອື່ນໆ ທີ່ເປັນທາງການ.
ແນວໃດກໍ່ດີ, ຜູ້ທີ່ມີຄວາມນິຍົມໃນເວທີປະກວດນາງງາມ ບໍ່ວ່າຈະເປັນນັກທຸລະກິດ, ແຟນນາງງາມ ກໍ່ຄືມວນຊົນທົ່ວໄປ ຫວັງວ່າ ການດໍາເນີນງານຂອງທີມງານໃໝ່ນີ້ ຈະມີປະສິດທິພາບ ມີຄຸນນະພາບ ຈັດການບໍລິຫານ ຢ່າງເປັນມືອາຊີບ ເປັນຜູ້ໃຫຍ່ ແລະ ບໍ່ເຮັດໃຫ້ ກອງເຊຍຄົນລາວຕ້ອງຜິດຫວັງ.
Miss Universe Laos ມີສຢູນິເວີຣສລາວ
