ໃນຕອນເຊົ້າຂອງວັນທີ 1 ມິຖຸນາ 2021 ຢູ່ມະຫາວິທະຍາໄລແຫ່ງຊາດ (ມຊ), ຄະນະວິສະ ຖາປັດຕະຍະກຳສາດ ໄດ້ຈັດພິທີປູກຕົ້ນໄມ້ແຫ່ງຊາດຂຶ້ນ, ໂດຍການເຂົ້າຮ່ວມຂອງທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ, ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ອຸດົມ ພອນຄຳເພັງ ຮັກສາການອະທິການບໍດີ ມະຫາວິທະຍາໄລແຫ່ງຊາດ ແລະ ມີບັນດາ ຄູ-ອາຈານ ແລະ ນັກສຶກສາເຂົ້າຮ່ວມ ໃນຈຳນວນຈຳກັດຕາມມາດຕະການປ້ອງກັນໂຄວິດ.
ທ່ານ ອຸດົມ ພອນຄໍາເພັງ ໄດ້ກ່າວວ່າ: ເພື່ອເປັນການສ້າງຂະບວນການເນື່ອງໃນວັນປູກຕົ້ນໄມ້ແຫ່ງຊາດ ດັ່ງຄຳຂວັນ “ຮ່ວມແຮງຮ່ວມໃຈ ສ້າງວິທະຍາເຂດດົງໂດກ ໃຫ້ມີສີຂຽວ, ສະອາດງາມຕາ”. ສຳລັບການປູກຕົ້ນໄມ້ໃນຄັ້ງນີ້, ໄດ້ນຳເອົາຕົ້ນໄມ້ອຸດສາຫະກຳ (ໄມ້ດູ່) ຈຳນວນ 90 ຕົ້ນ ແລະ ຕົ້ນໄມ້ກິນໝາກອີກຈຳນວນໜຶ່ງ, ການປູກຕົ້ນໄມ້ ແມ່ນການສ້າງສະພາບແວດລ້ອມຂອງ ມຊ ໃຫ້ເປັນພື້ນທີ່ສີຂຽວ ເຮັດໃຫ້ວິທະຍາເຂດດົງໂດກ ກາຍເປັນພື້ນທີ່ປົກຫຸ້ມໄປດ້ວຍຕົ້ນໄມ້ນາໆພັນ ແລະ ເປັນການຄືນປ່າທີ່ມີດັງເດີມໃຫ້ກັບມາ, ທັງເປັນການປູກຈິດສຳນຶກໃຫ້ແກ່ພະນັກງານ, ຄູ-ອາຈານ ແລະ ນັກຮຽນ-ນັກ ສຶກສາ ໃຫ້ມີຈິດສຳນຶກຕໍ່ສິ່ງແວດລ້ອມ.
ນອກຈາກນັ້ນ, ມຊ ຍັງໄດ້ຈັດພື້ນທີ່ຈໍານວນໜຶ່ງ ເປັນສວນສາທາລະນະ ເພື່ອໃຫ້ພະນັກງານ, ຄະນະຄູ-ອາຈານ ແລະ ນັກຮຽນ-ນັກສຶກສາ ໄດ້ນຳໃຊ້ພື້ນທີ່ດັ່ງກ່າວ ຈັດສັນເພື່ອປູກຕົ້ນໄມ້ ໂດຍຕິດພັນກັບການຮຽນ-ການສອນ ຕົວຈິງໃນແຕ່ລະປີ ກໍຄື ການປູກໃນປີນີ້ ບໍ່ໄດ້ປູກສະເພາະຢູ່ໃນວິທະຍາເຂດດົງໂດກເທົ່ານັ້ນ, ຍັງປູກອີກຫລາຍວິທະຍາເຂດຂອງ ມຊ ແລະ ບໍ່ແມ່ນປູກແຕ່ສະເພາະວັນທີ 1 ເດືອນມິຖຸ ນາ ເທົ່ານັ້ນ, ຍັງໄດ້ປູກທຸກໄລຍະທີ່ມີຄວາມເໝາະສົມ ເນື່ອງຈາກມີການແຜ່ລະບາດຂອງພະຍາດໂຄວິດ ການປູກຕົ້ນໄມ້ ຢູ່ມະຫາວິທະຍາໄລແຫ່ງຊາດປີນີ້ ແມ່ນເນັ້ນໜັກໃຫ້ມີຄວາມກະທັດຮັດແຕ່ເຕັມໄປດ້ວຍເນື້ອໃນ ແລະ ຄວາມໝາຍຢ່າງເລິກເຊິ່ງ ແລະ ໄດ້ເພີ່ມມາດຕະການ ການຄວບຄຸມ ແລະ ປ້ອງກັນໂຄວິດ ຢ່າງເຂັ້ມງວດ.
ຂ່າວ: ສຸກສະຫວັດ ສົມສະໜິດ
ພາບ: ເກດສະໜາ
