ຖະແຫຼງຂ່າວຂອງຄະນະສະເພາະກິດເພື່ອປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ ປະຈຳວັນທີ 26 ພຶດສະພາ 2021 ກວດພົບຜູ້ຕິດເຊື້ອໃໝ່ 5​ ຕົວຢ່າງ. ໃນນັ້ນມີ

– ນະຄອນຫຼວງວຽງຈັນ 3​ ຄົນ

– ສະຫວັນນະເຂດ 2​ ຄົນ (ນໍາເຂົ້າ)

ຟັງຖະແຫຼງຂ່າວ

ສະບາຍດີ ບັນດາທ່ານທີ່ຕິດຕາມຮັບຊົມ ແລະ ຮັບຟັງ.

ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຈະຖະແຫຼງຂ່າວກ່ຽວກັບ ສະພາບການລະບາດໂຄວິດ ສປປ ລາວ ພ້ອມທັງບັນດາຄຳແນະນຳຕ່າງໆ. ພ້ອມດຽວກັນນັ້ນ ທ່ານ ບຸນຂວາງ ຄຳບຸນເຮືອງ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ຈະຖະແຫຼງຂ່າວກ່ຽວກັບ ການປ້ອງກັນ ແລະ ຄວບຄຸມພະຍາດໂຄວິດ ໃນຂະແໜງກະສິກຳ ແລະ ປ່າໄມ້.ຕາງໜ້າກອງເລຂາ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19, ຂໍລາຍງານ ລາຍລະອຽດດັ່ງນີ້:

ສຳ ລັບ ສປປ ລາວ ຮອດປະຈຸບັນ: ມີຜູ້ຕິດເຊື້ອສະສົມ ທັງໝົດ 1,883 ຄົນ (ໃໝ່ 05) ແລະ ເສຍຊິວິດສະສົມທັງໝົດ 2 ຄົນ(ໃໝ່ 00). ວຽກງານການປິ່ນປົວ ແມ່ນມີຜູ້ປິ່ນປົວຫາຍດີທັງໝົດ 1,261 ຄົນ (ໃໝ່ 81 ຄົນ) ແລະ ຍັງຕິດຕາມປິ່ນປົວ ທົ່ວປະເທດທັງໝົດ 620 ຄົນ. ວຽກງານການ ຈຳກັດບໍລິເວນ ປະຈຸບັນທົ່ວປະເທດມີສູນຈໍາກັດບໍລິເວນທີ່ເປີດນຳໃຊ້ຢູ່ທັງໝົດ 44 ສູນ, ມີຜູ້ຈຳກັດບໍລິເວນທັງໝົດ 3,407 ຄົນ. ວຽກງານການກວດວິເຄາະ: ໃນວັນທີ 25 ພຶດສະພາ 2021 ໄດ້ເກັບຕົວຢ່າງມາກວດວິເຄາະທັງໝົດ 1,767 ຕົວຢ່າງ, ໃນນັ້ນ ກວດພົບຜູ້ຕິດເຊື້ອໃໝ 05 ກໍລະນີ

ກ່ຽວກັບກໍລະນີຕິດເຊື້ອໃໝ່ 05 ຄົນ (ກໍລະນີຢັ້ງຢືນທີ 1879 – 1883) ຄົນເຈັບຕິດເຊື້ອໃໝ່ຈາກ ນະຄອນຫຼວງ 03 ຄົນ ແມ່ນເປັນຜູ້ສຳຜັດໃກ້ຊິດກັບຜູ້ຕິດເຊື້ອເກົ່າທີ່ຕິດເຊື້ອໃນຊຸມຊົນ, ຄືດັ່ງນີ້:

1. ເພດຍິງ, ອາຍຸ 33 ປີ, ບ້ານ ຮ່ອງໄກແກ້ວ, ເມືອງຈັນທະບູລີ, ນະຄອນຫຼວງວຽງຈັນ

2. ເພດຊາຍ, ອາຍຸ 45 ປີ, ບ້ານ ຮ່ອງໄກແກ້ວ, ເມືອງຈັນທະບູລີ, ນະຄອນຫຼວງວຽງຈັນ

3. ເພດຍິງ, ອາຍຸ 17 ປີ, ບ້ານອາມອນ, ເມືອງໄຊເສດຖາ, ນະຄອນຫຼວງວຽງຈັນ

ສຳລັບ 2 ຄົນ ຢູ່ແຂວງສະຫວັນນະເຂດ ນັ້ນ ແມ່ນກໍລະນີນຳເຂົ້າ ເຊິ່ງກວດພົບເຊື້ອໃນແຮງງານລາວທີ່ກັບຄືນປະເທດຖືກກົດໝາຍ.

ອີກເທື່ອໜຶ່ງ ຂ້າພະເຈົ້າຂໍແຈ້ງເຖິງ ສະຖານທີ່ສ່ຽງ ທີ່ຜູ້ຕິດເຊື້ອໄດ້ເດີນທາງໄປ ທີ່ໄດ້ຖະແຫຼງຂ່າວ ໃນມື້ວານນີ້ ມີດັ່ງນີ້:

ໂຮງຮຽນປະຖົມສົມບູນຫົວຊຽງ (ວັນທີ 21/5/21), ຕະຫຼາດຫົວຂົວ, ຕະຫຼາດໂນນຄໍ້, ຕະຫຼາດໂອຊິນ, ຕະຫຼາດໂພນຕ້ອງ, ແຄ້ມສ້າງທາງລົດໄຟ ບ້ານດົງຫຼວງ ເມືອງນາຊາຍທອງ, ຕະຫຼາດອົດຊີ (ວັນທີ 17/5/21), ບໍລິສັດຮຸ່ງອາລຸນ ສາຂາສີໄຄ (ວັນທີ 23/5/21), ຫ້ອງແຖວບ້ານໂພນສີນວນ (ຮ່ອມທະນາຄານລາວກໍ່ສ້າງ) ແລະ Lady clinic ບ້ານສີດຳດວນ (ວັນທີ 23/5/21).

ທ່ານ ບຸນຂວາງ ຄຳບຸນເຮືອງ ຮອງ ລັດຖະມົນຕີກະຊວງກະສີກຳ ແລະ ປ່າໄມ້ ເຊິ່ງຈະມາເວົ້າເລື່ອກ່ຽວກັບ ມາດຕະການປ້ອງກັນ, ເຝົ້າລະວັງ ແລະ ໂຕ້ຕອບໂຄວິດ-19 ໃນຂະແໜງກະສີກຳ ແລະ ປ່າໄມ້

ບັນດາທ່ານທີ່ນັບຖື ແລະ ຮັກແພງທັງຫຼາຍ,

ເຖິງແມ່ນວ່າ ສະພາບການລະບາດໃນບາງແຂວງ ມີທ່າອ່ຽງຫຼຸດລົງ ແຕ່ຢູ່ນະຄອນຫຼວງວຽງຈັນ ຍັງສືບຕໍ່ມີການລະບາດໃນຊຸມຊົນເປັນວົງກວ້າງ ເປັນສິ່ງທ້າທາຍໃນການສະກັດກັ້ນ ແລະ ຄວບຄຸມການແຜ່ລະບາດດັ່ງກ່າວ. ບັນຫາສຳຄັນແມ່ນ ສັງເກດເຫັນ ໃນສັງຄົມ ຍັງມີການໄປມາຫາສູ່ລະຫ່ວາງຍາດຕິພີ່ນ້ອງ, ໝູ່ເພື່ອນ, ຊຸມແຊວງສັງສັນກັນ ເຮັດໃຫ້ມີສະພາບການລະບາດເປັນຈຸ້ມໃນຄອບຄົວ, ຍາດຕິພີ່ນ້ອງ ແລະ ຫມູ່ຄູ່.

ນອກຈາກນັ້ນ ຜູ້ຕິດເຊື້ອບາງຄົນບໍ່ສະແດງອາການ ຈີ່ງສືບຕໍ່ໄປເຄື່ອນໄຫວເຮັດວຽກຕາມປົກກະຕິ ເຮັດໃຫ້ການລະບາດເຂົ້າສູ່ບັນດາຫ້ອງການ, ສຳນັກງານອົງການ, ບໍລິສັດ, ໂຮງຈັກໂຮງງານ ເຮັດໃຫ້ມີລາຍງານຜູ້ຕິດເຊື້ອໃໝ່ເກີດຂື້ນຢູ່ເລື້ອຍໆ

ຕໍ່ກັບສະພາບການດັ່ງກ່າວ ຈຶ່ງຂໍຮຽກຮ້ອງມາຍັງທຸກພາກສ່ວນໃນສັງຄົມ ຍົກສູງສະຕິຄວາມຮັບຜິດຊອບ ເອົາໃຈໃສ່ສືບຕໍ່ປະຕິບັດມາດຕະການ ຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 528/ຫສນຍ, ລົງວັນທີ 20 ພຶດສະພາ 2021 ຢ່າງເຂັ້ມງວດ ຄຽງຄູ່ກັນນັ້ນ ກໍ່ສືບຕໍ່ປະຕິບັດມາດຕະການປ້ອງກັນການຕິດເຊື້ອ ທີ່ຄະນະສະເພາະກິດວາງອອກ ເປັນຕົ້ນ ແມ່ນ ການຮັກສາໄລຍະຫ່າງໃນສັງຄົມ, ໃສ່ຜ້າປິດປາກ-ດັງ ແລະ ລ້າງມື ດ້ວຍເຈວ ແລະ ເຫຼົ້າ 70 ເລື້ອຍໆ, ຖ້າບໍ່ມີຄວາມຈຳເປັນ ກໍ່ບໍ່ອອກຈາກບ້ານ ບ່ອນທີ່ມີຊຸມຊົນແອອັດຈຳນວນຫຼາຍ;

ຖ້າຫາກທ່ານ ເປັນຜູ້ສຳພັດໃກ້ຊິດ ກັບ ຜູ້ທີ່ຕິດເຊື້ອພະຍາດໂຄວີດ ຫຼື ໄດ້ເດີນທາງໄປຍັງສະຖານທີ່ ທີ່ມີຄວາມສ່ຽງ ຈົ່ງຮີບຮ້ອນໄປພົບແພດໝໍ ເພື່ອເກັບຕົວຢ່າງກວດຫາເຊື້ອພະຍາດ ແລະ ຈຳກັດໂຕເອງ ແຍກໂຕອອກຈາກຄອບຄົວ ແລະ ຄົນໃກ້ຊິດ ຈົນຄົບ 14ມື້ ເຖິງແມ່ນວ່າຜົນກວດຕົວຢ່າງຈະອອກມາເປັນລົບ (-) ກໍ່ໃຫ້ສືບຕໍ່ຈຳກັດບໍລິເວນຕົນເອງ ຈົນຄົບກຳນນົດ ຈິ່ງອອກມາເຄື່ອນໄຫວປົກກະຕິ ເພື່ອຕັດຈົງຈອນການສົ່ງເຊື້ອພະຍາດໄປຫາຄົນອ້ອມຂ້າງ ແລະ ສູ່ສັງຄົມ

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here