ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດອັກເສບປອດທີ່ ເກີດຈາກເຊື້ອຈຸລະໂລກສາຍພັນໃໝ່ ໂຄວິດ ໄດ້ຖະແຫລງຂ່າວປະຈໍາວັນທີ 24 ພຶດສະພາ ປີ 2021 ໂດຍໄດ້ຢືນຢັນວ່າ: ໃນວັນທີ 23 ເມສາ 2021 ໄດ້ເກັບຕົວຢ່າງມາກວດ ໃນຈໍານວນ 1.126 ຄົນ, ເຊິ່ງຜົນກວດວິເຄາະແມ່ນພົບຜູ້ຕິດເຊື້ອໃໝ່ເພີ່ມທັງໝົດ 21 ຄົນ (ກໍລະນີຢັ້ງຢືນເລກທີ 1802-1822) ຄື: ນະຄອນຫລວງ ກວດ 458 ຕົວຢ່າງ ແລະ ພົບເຊື້ອ 9 ຕົວຢ່າງ, ເຊິ່ງແມ່ນການຕິດເຊື້ອໃນຊຸມຊົນ, ສໍາລັບ ແຂວງຈຳປາສັກ 10 ຕົວຢ່າງ, ສະຫວັນນະເຂດ ແລະ ອຸດົມໄຊ ແຂວງລະ 1 ຕົວຢ່າງ (ສໍາລັບແຂວງຈຳປາສັກ ແລະ ສະຫວັນນເຂດ ທັງໝົດມີ 11 ຕົວຢ່າງ, ເຊິ່ງແມ່ນກໍລະນີນໍາເຂົ້າ ເປັນແຮງງານລາວ ກັບຄືນປະເທດທີ່ຖືກຕາມລະບຽບກົດໝາຍ).
ສໍາລັບລາຍລະອຽດຂອງ 9 ກໍລະນີ ທີ່ຕິດເຊື້ອຢູ່ນະຄອນຫລວງວຽງຈັນ ມີດັ່ງນີ້: ເຂດ ຫລື ສະຖານທີ່ສ່ຽງທີ່ຜູ້ຕິດເຊື້ອໄດ້ໄປ High-risk settings, ຕະຫລາດສີວິໄລ (ຕາມການບອກເລົ່າຂອງກໍລະນີ 1.745 ແມ່ນໄດ້ໄປຊື້ອາຫານທຸກມື້ແຕ່ຊ່ວງຕົ້ນເດືອນ 5 ເປັນຕົ້ນມາ), ຕະຫລາດໄຮ່ຄຳ (ຕາມການບອກເລົ່າຂອງກໍລະນີ 1.744 ແມ່ນໄດ້ໄປຊື້ເຄື່ອງຕອນປະມານ 3-4 ໂມງເຊົ້າ ປະມານວັນທີ 14-15/5/2021), ບໍລິສັດແອນນາ ບ້ານສະພານທອງ (ຮ່ອມຕະຫລາດສະພານທອງ), ບໍລິສັດພັດທະນາບໍ່ແຮ່ຈຳກັດ, ບ້ານໄຊສະຫວ່າງ ເມືອງໄຊທານີ ນະຄອນຫລວງວຽງຈັນ, ບ້ານຫົວຊຽງ ເມືອງ ໄຊທານີ (ກໍລະນີຕິດເຊື້ອ 1.743 ໄດ້ໄປໃນວັນທີ 22 ແລະ 23/5/2021), ແລະ ບ້ານຈັນສະຫວ່າງ ໜ່ວຍ 43 ເມືອງສີໂຄດຕະບອງ (ກໍລະນີຕິດເຊື້ອ 1.745 ໄດ້ໄປໃນວັນທີ 21/5/2021).
ທ່ານ ດຣ ນາງ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມ ແລະ ພະຍາດຕິດຕໍ່, ກະ ຊວງສາທາລະນະສຸກ ໄດ້ໃຫ້ຮູ້ວ່າ: ມາຮອດປັດຈຸບັນ ສປປ ລາວ ມີຕົວເລກຜູ້ຕິດເຊື້ອສະສົມທັງໝົດ 1.822 ຄົນ, ເສຍຊີວິດ 2 ຄົນ, ປິ່ນປົວຫາຍດີ 1.133 ຄົນ ແລະ ຍັງນອນຕິດຕາມປິ່ນປົວທັງໝົດ ໃນຂອບເຂດທົ່ວປະເທດ 687 ຄົນ. ສະນັ້ນ, ເພື່ອຫລຸດຜ່ອນ ແລະ ສະກັດກັ້ນ ການລະບາດບໍ່ໃຫ້ຂະ ຫຍາຍເປັນວົງກວ້າງ ຂໍຮຽກຮ້ອງມາຍັງພໍ່ແມ່ປະຊາຊົນ, ທຸກພາກສ່ວນໃນສັງຄົມ ຈົ່ງຮ່ວມແຮງຮ່ວມໃຈກັນ ປະຕິບັດມາດຕະການທີ່ຄະນະສະເພາະກິດວາງອອກແຕ່ລະໄລຍະຢ່າງເຄັ່ງຄັດ. ສໍາລັບການແບ່ງເຂດ ທີ່ຖືກກໍານົດໄວ້ເປັນເຂດແດງ (ເຂດທີ່ມີການຕິດເຊື້ອ) ຫລື ເຂດເຫລືອງ (ເຂດທີ່ມີຄວາມສ່ຽງ) ແມ່ນຫ້າມບຸກຄົນເດີນທາງເຂົ້າ-ອອກ ທ້ອງຖິ່ນ ຍົກເວັ້ນຜູ້ທີ່ໄດ້ຮັບອະນຸຍາດຈາກອຳນາດການປົກຄອງທ້ອງຖິ່ນທີ່ກ່ຽວຂ້ອງ ດ້ວຍເງຶື່ອນໄຂ ແລະ ເຫດຜົນທີ່ຈຳເປັນ ເຊັ່ນ: ການຂົນສົ່ງສິນຄ້າ, ສົ່ງສະບຽງອາຫານ, ໄປໂຮງໝໍ, ໄປຮັບວັກແຊງ ແຕ່ໃຫ້ຂະແໜງສາທາລະນະສຸກ ແລະ ເຈົ້າໜ້າທີ່ກ່ຽວຂ້ອງ ເກັບກຳຂໍ້ມູນຢ່າງຮັດກຸມ.
ຂ່າວ: ມະນີທອນ
