ແຫລ່ງຂ່າວຈາກເມືອງປະທຸມພອນ ໃຫ້ຮູ້ວ່າ: ໃນວັນທີ 5 ພຶດສະພາ 2021 ນີ້, ທ່ານ ວຽງສະໄໝ ສີລິພອນພັນ ເຈົ້າເມືອງປະທຸມພອນ ຈຳປາສັກ, ພ້ອມຄະນະກຳມະການຄວບຄຸມໄພພິບັດຂັ້ນເມືອງ ລົງເຄື່ອນໄຫວຕິດຕາມ ຊີວິດການເປັນຢູ່ຂອງປະຊາຊົນ ທີ່ຖືກຜົນກະທົບຈາກລົມພະຍຸລະດູຮ້ອນຢູ່ກຸ່ມສະໜິງ ແລະ ກຸ່ມພະໂພ ເມືອງປະທຸມພອນ ໃນວັນທີ 4 ພຶດສະພາ ຜ່ານມາ.
ໂອກາດນີ້, ຄະນະກໍາມະການຄວບຄຸມໄພພິບັດຂັ້ນເມືອງ ໄດ້ລາຍງານໃຫ້ຮູ້ວ່າ: ໃນວັນທີ 4 ພຶດສະພາ ຜ່ານມາ ເກີດມີລົມພະຍຸລະດູຮ້ອນ ພັດເຂົ້າໃສ່ ເຮືອນຂອງປະຊາຊົນ ໃນ 2 ກຸ່ມ ຄື: ກຸ່ມພະໂພ ປະກອບມີ ບ້ານໜອງໝາກເອກ, ພະລາຍ ແລະ ບ້ານຜັກຂະ. ກຸ່ມສະໜິງ ປະກອບມີ ບ້ານແກແລ ແລະ ບ້ານຄອນທູດ, ເຊິ່ງເຮືອນຊານ ທີ່ ຢູ່ອາໃສ ຂອງ ປະຊາຊົນ 5 ບ້ານດັ່ງກ່າວ ໄດ້ຮັບຜົນເສຍຫາຍ 97 ຫລັງຄາເຮືອນ, ປະເມີນຜົນເສຍຫາຍ 60% ຂຶ້ນໄປ ມີ 2 ຫລັງ ແລະ ເສຍຫາຍ 50% ມີ 03 ຫລັງ, 30% ລົງມາມີ 92 ຫລັງ. ນອກຈາກນີ້ຍັງມີ ໂຮງຮຽນ 3 ຫລັງ, ສຸກສາລາ 1 ຫລັງ, ວັດ1 ຫລັງ ແລະ ເລົ້າເຂົ້າ 1 ຫລັງ ແລະ ບໍ່ມີຜູ້ບາດເຈັບ ຫລື ເສຍຊີວິດ. ປະເມີນມູນຄ່າເສຍຫາຍທັງໝົດເບື້ອງຕົ້ນ 108 ລ້ານກວ່າກີບ, ໃນນັ້ນ ບ້ານໜອງໝາກເອກ 4,2 ລ້ານກວ່າກີບ, ບ້ານພະລາຍ 2,5 ລ້ານກວ່າກີບ, ບ້ານຜັກຂະ 11 ລ້ານກວ່າກີບ, ບ້ານແກແລ 61 ລ້ານກວ່າກີບ ແລະ ບ້ານຄອນທູດ 28 ລ້ານກວ່າກີບ.
ໂອກາດນີ້, ທ່ານ ວຽງສະໄໝ ສີລິພອນພັນ ກໍໄດ້ໂອ້ລົມຕໍ່ການຈັດຕັ້ງ, ອຳນາດ ການປົກຄອງ ແລະ ພໍ່ແມ່ປະຊາຊົນ 2 ກຸ່ມດັ່ງກ່າວ ທີ່ໄດ້ຮັບຜົນກະທົບຈາກ ໄພພິບັດ ໃນຄັ້ງນີ້ ໃຫ້ມີຄວາມອຸ່ນອ່ຽນທຸ່ນທ່ຽງ ແລະ ດຳລົງຊີວິດຢ່າງມີສະຕິ.
.
ຂ່າວ: ຖວທ ປະທຸມພອນ.
