ພະນັກງານ-ລັດຖະກອນ ກອງຄຸ້ມຄອງພາສີ 7 ຮ່ວມກັບ ບໍລິສັດຂາເຂົ້າ-ຂາອອກ ຜູ້ປະ ກອບການ ທີ່ດຳເນີນທຸລະກິດ ຢູ່ແຂວງຈຳປາສັກ ໄດ້ພ້ອມກັນລະດົມທຶນຊື້ຕຽງນອນຄົນເຈັບ ຈຳນວນ 175 ຊຸດ, ມູນຄ່າ 800 ລ້ານກວ່າກີບ ໃຫ້ແຂວງຈຳປາສັກ ເພື່ອປະກອບສ່ວນໃນການສະກັດກັ້ນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-.
ພິທີມອບ-ຮັບດັ່ງກ່າວ, ໄດ້ມີຂຶ້ນໃນວັນທີ 4 ພຶດສະພາ 2021 ທີ່ຫ້ອງວ່າການແຂວງຈໍາປາສັກ, ຕາງໜ້າກ່າວມອບໂດຍ ທ່ານ ບຸນເພັງ ເຂັມມາລາ ຫົວໜ້າກອງຄຸ້ມຄອງພາສີ 7, ເປັນກຽດກ່າວຮັບ ໂດຍ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ມີ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ ຂັ້ນແຂວງ, ມີ ຜູ້ປະກອບການນັກລົງທຶນ ທີ່ດຳເນີນທຸ ລະກິດ ຢູ່ແຂວງຈຳປາສັກ ຜູ້ທີ່ໃຫ້ການສະໜອງທຶນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ ເປັນສັກຂີພິຍານ.
ໂອກາດນີ້, ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ສະແດງຄວາມຂອບໃຈ ແລະ ຊົມເຊີມມາຍັງ ພະນັກງານ-ລັດຖະກອນ ກອງຄຸ້ມຄອງພາສີ 7 ແລະ ຜູ້ປະກອບການ ທີ່ດຳເນີນທຸລະກິດ ຢູ່ແຂວງຈຳປາສັກ ທີ່ພ້ອມກັນລະດົມທຶນຊື້ຕຽງນອນຄົນເຈັບ ຈຳນວນ 175 ຊຸດ, ມູນຄ່າ 800 ລ້ານກວ່າກີບ ໃຫ້ແຂວງຈຳປາສັກ ເພື່ອປະກອບເຂົ້າໃສ່ໂຮງໜໍພາກສະໜາມ ເປັນການປະກອບສ່ວນທີ່ສຳຄັນ ເພື່ອຮັບໃຊ້ໃຫ້ແກ່ວຽກງານອັນຮີບດ່ວນ ແລະ ຈຳເປັນທີ່ສຸດ ເພື່ອຮັບມືກັບການລະບາດພະຍາດໂຄວິດ ທີ່ກຳລັງເກີດຂຶ້ນຢູ່ໃນປັດຈຸບັນ ເນື່ອງຈາກສະພາບລວມການລະບາດຖືວ່າເປັນວົງກວ້າງ ແລະ ຍັງມີທ່າອ່ຽງທີ່ຈະເພີ່ມສູງຂຶ້ນ. ສະນັ້ນ, ການສະໜັບສະໜູນປະກອບສ່ວນ ຈາກພາກສ່ວນຕ່າງໆຂອງສັງຄົມ ຈຶ່ງເປັນທຶນຮອນທີ່ຈຳເປັນໃນວຽກງານດັ່ງກ່າວ.
ຂ່າວ-ພາບ: ທັດຊະນະ
