ວັນທີ 20 ເມສາ 2021 ນີ້ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື ປະທານຄະນະສະເພາະກິດ ເພື່ອປ້ອງ ກັນ,ຄວບຄຸມ ແລະ ແກ້ໄຂ ການລະບາດຂອງພະຍາດໂຄວິດ 19 ຂັ້ນແຂວງ,ພ້ອມຄະນະ ໄດ້ລົງເຄື່ອນໄຫວຕິດ ຕາມ,ຊຸກຍູ້ການຈັດຕັ້ງປະຕິບັດມາດຕະການກວດກັ່ນກອງ ຄົນເຂົ້າ-ອອກພາຍໃນແຂວງ ຢູ່ 3 ດ່ານຊາຍແດນຈຸດເຊື່ອມຕໍ່ລະຫວ່າງແຂວງອັດຕະປື ແລະ ແຂວງຈໍາປາສັກ ຄື: ດ່ານບ້ານພອນມະນີ ຈຸດເຊື່ອມຕໍ່ລະຫວ່າງເມືອງສະ ໜາມໄຊ ກັບເມືອງປະທຸມພອນ ແຂວງຈໍາປາສັກ,ດ່ານບ້ານໄຊດອນໂຂງ ຈຸດເຊື່ອຕໍ່ລະຫວ່າງເມືອງສະໜາມໄຊ ກັບເມືອງປາກຊ່ອງ ແຂວງຈໍາປາສັກ ແລະດ່ານຫຼັກ 52 ບ້ານແບ່ງພູຄຳ ຈຸດເຊື່ອມຕໍ່ລະຫວ່າງເມືອງສາມັກຄີໄຊ ກັບເມືອງປາກຊ່ອງ ແຂວງຈໍາປາສັກ.
ໂອກາດນີ້ທ່ານຮອງເຈົ້າແຂວງອັດຕະປື ປະທານຄະນະສະເພາະກິດຂັ້ນແຂວງ ໄດ້ຮັບຟັງການລາຍງານສະພາບການຈັດຕັ້ງປະຕິບັດຕົວຈິງຢູ່ທ້ອງຖິ່ນ ຈາກຄະນະສະເພາະກິດຂັ້ນເມືອງ,ເຊິ່ງພາຍຫຼັງທີ່ໄດ້ມີການແຕ່ງຕັ້ງຄະນະກໍາມະການ ເພື່ອປ້ອງກັນ ແລະ ຄວບຄຸມພະຍາດໂຄວິດ19ຂັ້ນເມືອງ ແຕ່ລະຄະນະກໍາມະການກໍ່ໄດ້ເອົາໃຈໃສ່ເຄື່ອນໄຫວ ແລະ ປະຕິບັດມາດຕະການປ້ອງກັນ ແລະ ຄວບຄຸມພະຍາດດັ່ງກ່າວຢ່າງເຂັ້ມງວດ,ໂດຍໄດ້ອອກແຈ້ງການຕ້ານ ແລະ ຄວບຄຸມພະຍາດໂຄວິດ 19 ໃຫ້ຂະແໜງການອ້ອມຂ້າງເມືອງ,ບັນດາສຸກສາລາແຕ່ລະບ້ານໃນທົ່ວເມືອງ ຮ່ວມກັບຫ້ອງການສາທາລະນະສຸກເມືອງ ລົງຜັນຂະຫຍາຍ ເຜີຍແຜ່ຊຸກຍູ້ໃຫ້ອໍານາດການປົກຄອງບ້ານ ແລະ ປະຊາຊົນ ໂດຍສະເພາະບ້ານທີ່ຢູ່ລຽບຕາມຊາຍແດນໃຫ້ເອົາໃຈໃສ່ ໃກ້ຊິດຕິດຕາມຜູ້ທີ່ມາຈາກແຂວງທີ່ມີການຕິດເຊື້ອ ແລະ ຜູ້ທີ່ເດີນທາງມາຈາກປະເທດທີ່ມີການລະບາດ,ພ້ອມທັງໃຫ້ອົງການຈັດຕັ້ງບ້ານເກັບກໍາຂໍ້ມູນລະອຽດແລ້ວລາຍງານສຸກສາລາ ຫຼື ຫ້ອງການສາທາເມືອງ ແລະ ຍັງໄດ້ໃຫ້ຄວາມຮູ້ຂັ້ນພື້ນຖານ ວິທີການປ້ອງກັນການສະກັດກັ້ນພະຍາດໂຄວິດ19 ແກ່ພໍ່ແມ່ປະຊາຊົນຕື່ມອີກ
ນອກນີ້ຍັງໄດ້ແຕ່ງຕັ້ງພະນັກງານແພດ-ໝໍ,ກໍາລັງເຈົ້າໜ້າທີ່ ປກສ- ປກຊ ອອກເວນຍາມປະຈໍາຢູ່ສູນກັກກັນ ແລະ ປະຈໍາຢູ່ດ່ານກວດກັ່ນກອງຢູ່ຕາມຈຸດເຂດເຊື່ອມຕໍ່ລະຫວ່າງເມືອງກັບເມືອງ,ພ້ອມທັງໄດ້ລົງໂຄສະນາສຸຂະສຶກສາແບບເຄື່ອນທີ່ຮ່ວມກັບແຂວງ ໃນເທສະບານເມືອງ ກ່ຽວກັບການຕ້ານ ແລະ ຄວບຄຸມພະຍາດໂຄວິດ 19,ໄດ້ລົງເກັບກໍາຂໍ້ມູນແຮງງານທີ່ມາຈາກຕ່າງປະເທດທີ່ມີກຸ່ມສ່ຽງໃນແຕ່ລະບ້ານ,ໄດ້ລົງເຄື່ອນໄຫວເກັບກໍາຂໍ້ມູນຄົນເຂົ້າ-ອອກໃນທົ່ວເມືອງ ໂດຍສະເພາະແມ່ນບ້ານຢູ່ຕາມລຽບຊາຍແດນເຂດເຊື່ອມຕໍ່,ລົງຕິດຕາມກວດກາການຊຸມແຊວ,ການຈັດງານຕ່າງໆ ທີ່ມີຈໍານວນຄົນຫຼາຍ ແລະໄດ້ອອກແຈ້ງການ ເຖິງຫົວໜ່ວຍທຸລະກິດ,ຮ້ານອາຫານ,ບ້ານພັກ,ຮ້ານບັນເທີງ ໃຫ້ຢຸດຕິບໍລິການຊົ່ວຄາວພ້ອມທັງລົງກວດກາຢ່າງຕໍ່ເນື່ອງ.
ໂອກາດນີ້ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື ປະທານຄະນະສະເພາະກິດຂັ້ນແຂວງ ກໍ່ໄດ້ໂອ້ລົມ ແລະໃຫ້ທິດຊີ້ນຳ ຕໍ່ພະນັກງານແພດໝໍ,ເຈົ້າໜ້າທີ່ປະຈຳຢູ່ຈຸດກວດກັ່ນກອງ ໃຫ້ເອົາໃຈໃສ່ເປັນເຈົ້າການ ກວດກາຄົນເຂົ້າ-ອອກເມືອງ ຕ້ອງໄດ້ກວດວັດແທກອຸນຫະພູມ,ໃສ່ແໝັດອັດປາກ-ດັງ, ຖ້າເປັນຄົນຕ່າງແຂວງຫຼືຕ່າງປະເທດທີ່ເຄື່ອນໄຫວເຮັດທຸລະກິດພາຍໃນແຂວງ-ຕ່າງແຂວງ ຕ້ອງມີໜັງສືຢັ້ງຢືນຈາກຄະນະສະເພາະກິດຂັ້ນແຂວງ-ເມືອງ ເພື່ອມາແຈ້ງໃຫ້ພະນັກງານແພດໝໍ,ເຈົ້າໜ້າທີ່ ທີ່ປະຈຳຢູ່ຈຸດກວດກັ່ນກອງຮັບຊາບວ່າ ຜູ້ກ່ຽວໄດ້ກວດແຊັກສຸຂະພາບແລ້ວບໍ່ມີອາການໃດໆຜິດປົກກະຕິຕໍ່ສຸຂະພາບ ຖ້າເປັນຄົນຕ່າງປະເທດຕ້ອງມີ ພັດສະປອດແຈ້ງຕໍ່ເຈົ້າໜ້າທີ່.
