ໃນວາລະປະຊຸມສະພາແຫ່ງຊາດຫວຽດນາມ ທີ່ໄດ້ດໍາເນີນໃນຕອນບ່າຍວັນທີ 5 ເມສານີ້, ບັນດາຜູ້ແທນສະພາແຫ່ງຊາດ ໄດ້ເລືອກຕັ້ງ ທ່ານ ຟ້າມມິງຈິງ ຫົວໜ້າຄະນະຈັດຕັ້ງສູນກາງພັກ ໃຫ້ດຳລົງຕຳແໜ່ງເປັນນາຍົກລັດຖະມົນຕີ ດ້ວຍບັດສະໜັບສະໜູນ 96,25% ໃນຈຳນວນສະມາຊິກສະພາແຫ່ງຊາດທັງໝົດ.
ໃນພິທີສາບານຕົວຂຶ້ນຮັບຕໍາແໜ່ງ, ທ່ານ ຟ້າມມິງຈິງ ໄດ້ຢັ້ງຢືນວ່າ: ສະພາແຫ່ງຊາດມີຄວາມໄວ້ເນື້ອເຊື່ອໃຈ ເລືອກຕັ້ງທ່ານ ດຳລົງຕຳແໜ່ງເປັນນາຍົກລັດຖະມົນຕີ ແຫ່ງ ສສ ຫວຽດນາມ ແມ່ນຄວາມເປັນກຽດ, ພ້ອມທັງແມ່ນພາລະບົດບາດທີ່ໜັກໜ່ວງ ຊຶ່ງພັກ, ລັດ ແລະ ປະຊາຊົນເຊື່ອໝັ້ນມອບໝາຍໃຫ້. ຕໍ່ໜ້າຄວາມຮຽກຮ້ອງຕ້ອງການສືບຕໍ່ຍູ້ແຮງຢ່າງຮອບດ້ານ, ຄົບຊຸດພາລະກິດແຫ່ງການປ່ຽນແປງໃໝ່ ຕາມຈິດໃຈຂອງມະຕິກອງປະຊຸມໃຫຍ່ຄັ້ງທີ XIII ຂອງພັກ, ທ່ານ ນາຍົກລັດຖະມົນຕີຄົນໃໝ່ ໄດ້ສະເໜີແນະບາງໜ້າທີ່ ຊຶ່ງລັດຖະບານ, ນາຍົກລັດຖະມົນຕີ ຈະຜັນຂະຫຍາຍຈັດຕັ້ງປະຕິບັດໃນໄລຍະຈະມາເຖິງ, ທ່ານ ກ່າວວ່າ: ໜຶ່ງ; ແມ່ນສ້າງໂຄງການກະທຳເພື່ອຫັນການປະຕິບັດມະຕິກອງປະຊຸມໃຫຍ່ຄັ້ງທີ XIII ຂອງພັກ ເປັນລະອຽດ. ໃນນັ້ນ ສຸມໃສ່ 6 ໜ້າທີ່ຈຸດສຸມ ແລະ 3 ບຸກທະລຸຍຸດທະສາດ. ສອງ; ສືບຕໍ່ຍູ້ແຮງການສ້າງລັດແຫ່ງອຳນາດກົດໝາຍສັງຄົມນິຍົມ ຂອງປະຊາຊົນ, ໂດຍປະຊາຊົນ, ເພື່ອປະຊາຊົນ; ເປັນເຈົ້າການໃນການປ້ອງກັນ, ສະກັດກັ້ນ, ເດັດດ່ຽວ, ຢຶດໝັ້ນກັບການຍູ້ແຮງວຽກງານປ້ອງກັນ, ຕ້ານການສໍ້ລາດບັງຫຼວງ, ຕ້ານການຟຸ່ມເຟືອຍ, ອາດຍາສິດ, ປະກົດການຫຍໍ້ທໍ້. ສາມ; ຄຸ້ມຄອງບໍລິຫານ, ປຸກລະດົມ ແລະ ນຳໃຊ້ບັນດາແຫຼ່ງກຳລັງຢ່າງມີປະສິດທິຜົນ ເພື່ອພັດທະນາປະເທດຊາດ. ສີ່; ເດັດດ່ຽວ, ຢຶດໝັ້ນກັບການປົກປັກຮັກສາເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນຢ່າງໝັ້ນຄົງ, ຮັບປະກັນການປ້ອງກັນຊາດ, ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມ.
