ຂປລ. ວັນທີ 4 ເມສາ 2021, ການນຳແຂວງຈຳປາສັກ ນຳໂດຍ ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ, ທ່ານ ປະດິດ ວັນນະລັດສະໝີ ປະທານກວດກາພັກ-ລັດ ແຂວງຈຳປາສັກ, ທ່ານ ແກ້ວລັດຕະນະ ສີຫາວົງ ສະມາຊິກສະພາແຫ່ງຊາດ ເຂດເລືອກຕັ້ງທີ 15 ໄດ້ລົງເຄື່ອນໄຫວ ຕິດຕາມ ຊີວິດການເປັນຢູ່ຂອງປະຊາຊົນ ທີ່ຖືກຜົນກະທົບຈາກ ໄພພິບັດ ລົມພະຍຸລະດູຮ້ອນ ພັດ ເຮືອນ ຢູ່ອາໄສ ທີ່ ບ້ານ ນໍ້າໃສເທິງ ແລະ ນໍ້າໃສທ່າ ກຸ່ມ 2 ບ້ານມ່ວງ ເມືອງປະທຸມພອນ ແຂວງຈຳປາສັກ ໂດຍມີ ທ່ານ ວຽງສະໄໝ ສີລິພອນພັນ ເຈົ້າເມືອງປະທຸມພອນ, ຄະນະກໍາມະການຄວບຄຸມໄພພິບັດຂັ້ນແຂວງ ແລະ ເມືອງ ເຂົ້າຮ່ວມ.
.
ການຈັດຕັ້ງ, ອຳນາດ ການປົກຄອງ ກຸ່ມ 2 ບ້ານມ່ວງ ເມືອງປະທຸມພອນ ໄດ້ລາຍງານໃຫ້ຮູ້ວ່າ: ໃນວັນທີ 2 ເມສາ 2021, ເວລາ ປະມານ 17:30 ໂມງ ໄດ້ເກີດມີລົມພະຍຸລະດູຮ້ອນ ພັດເຂົ້າໃສ່ ເຮືອນຂອງປະຊາຊົນ ໃນ 2 ບ້ານ ຄື ບ້ານ ນໍ້າໃສເທິງ ແລະ ບ້ານ ນໍ້າໃສທ່າ ກຸ່ມ 2 ບ້ານມ່ວງ ເມືອງປະທຸມພອນ ແຂວງຈຳປາສັກ, ໄດ້ສ້າງຜົນເສຍຫາຍ ເຮັດໃຫ້ ເຮືອນຊານ ທີ່ ຢູ່ອາໄສ ຂອງ ປະຊາຊົນ ໃນ 2 ບ້ານ ດັ່ງກ່າວ ເປ່ເພ ລວມມີ 18 ຫຼັງ, ປະເມີນຜົນເສຍຫາຍ 60% ຂຶ້ນໄປ ມີ 7 ຫຼັງ ແລະ ເສຍຫາຍ 40% ລົງມາ ມີ 11 ຫຼັງ, ບໍ່ມີຕົວເລກບາດເຈັບ ຫຼືເສຍຊີວິດ. ປະເມີນມູນຄ່າເສຍຫາຍ ເບື້ອງຕົ້ນ ບໍ່ຕ່ຳກວ່າ 40 ລ້ານກີບ. ບ້ານ ນໍ້າໃສເທິງ ແລະ ບ້ານ ນໍ້າໃສທ່າ ແມ່ນຢູ່ ກຸ່ມ 2 ບ້ານມ່ວງ ເມືອງປະທຸມພອນ ແຂວງຈຳປາສັກ ມີຈຳນວນພົນລວມ 1.857 ຄົນ, ຍິງ 906 ຄົນ, ມີ 371 ຫຼັງຄາເຮືອນ, ມີ 425 ຄອບຄົວ.
ໂອກາດນີ້, ທ່ານ ສົມບູນ ເຮືອງວົງສາ ຮອງເຈົ້າແຂວງຈຳປາສັກ ກໍ່ໄດ້ພົບປະ ໂອ້ລົມ ການຈັດຕັ້ງ, ອຳນາດ ການປົກຄອງ ແລະພໍ່ແມ່ ປະຊາຊົນ ໃນ 2 ບ້ານ ດັ່ງກ່າວທີ່ຖືກ ຜົນກະທົບຈາກ ໄພພິບັດ ລົມພະຍຸລະດູຮ້ອນ ພັັດ ໃນເທື່ອນີ້ໃຫ້ມີຄວາມອຸ່ນອຽນ ທຸ່ນທ່ຽງ ໃນການດຳລົງຊີວິດ ຢ່າງມີສະຕິ, ພ້ອມກັນນັ້ນ ກໍໃຫ້ພ້ອມກັນ ປົກປັກຮັກສາ ສິ່ງແວດລ້ອມ, ຮັກສາພື້ນທີ່ ປ່າ ກໍຄື ປ່າສະຫງວນ ດົງເຊປຽນ ແລະດົງຫົວສາວ ໃຫ້ມີຄວາມອຸດົມສົມບູນ ແລະການລົງເຄື່ອນໄຫວ ຄັ້ງນີ້ ກໍ່ເພື່ອຕິດຕາມສະຖານະການຢ່າງໃກ້ຊິດ, ທັງເປັນການອົບອຸ່ນໃຫ້ກຳລັງໃຈ ສະແດງໃຫ້ເຫັນເຖິງຄວາມເປັນຫ່ວງເປັນໃຍ ຂອງ ຄະນະ ພັກ-ອົງການປົກຄອງ ຕໍ່ກັບຊີວິດການເປັນຢູ່ຂອງປະຊາຊົນ. ພ້ອມກັນນີ້ ກໍ່ ໄດ້ນໍາເອົານ້ຳສະອາດ, ເຂົ້າສານ, ເຄື່ອງອຸປະໂພກ-ບໍລິໂພກ ແລະ ປັດໄຈອື່ນໆທີ່ຈຳເປັນ ລວມມູນຄ່າ 50 ລ້ານກວ່າກີບ ມາມອບໃຫ້ປະຊາຊົນ 2 ບ້ານ ທີ່ຖືກຜົນກະທົບ ເພື່ອເປັນການແບ່ງເບົາ ແກ້ໄຂການເປັນຢູ່ ຂອງປະຊາຊົນ ເບື້ອງຕົ້ນ ຈາກໄພພິບັດ ດັ່ງກ່າວ.
ຂ່າວ-ຮູບ: ທັດຊະນະ
