ໝູປ່າແຄະ (Pigmy hog) ມີຊື່ທາງວິທະຍາສາດແມ່ນ Porcula salvania ແມ່ນໝູທີ່ມີຂະໜາດນ້ອຍທີ່ສຸດໃນໂລກ ລຳໂຕຍາວ 60ຊມ ສູງ 25ຊມ ແລະມີນ້ຳໜັກປະມານ 8ກິໂລກຳ ໝູປ່າແຄະຢູ່ໃນຕະກຸນ Porcula ແລະເປັນສັດພຽງຊະນິດດຽວຂອງຕະກຸນນີ້ ໂດຍຢູ່ໃນວົງຕະກຸນ Suidae ເຊິ່ງເປັນວົງຕະກຸນຂອງໝູຊະນິດຕ່າງໆ. ປະຈຸບັນໝູປ່າແຄະມັກພົບເຫັນແຕ່ສະເພາະໃນພາກໃຕ້ຂອງພູຖານ ແລະ ລັດອັດຊຳຂອງອິນເດຍ ໂດຍອາໄສຢູ່ໃນທົ່ງຫຍ້າໃກ້ກັບເທືອກເຂົາຫິມະໄລ.
ໝູ່ປ່າແຄະມັກຫາກິນຕາມລຳພັງ ຍົກເວັ້ນໝູແມ່ລູກອ່ອນ ອາຫານຂອງມັນໄດ້ແກ່ ຮາກພຶດ, ຫົວພຶດ ແມງໄມ້, ສັດເລື້ອຍຄານ ແລະສັດແຂ້ວແທະຂະໜາດນ້ອຍ ພວກມັນຈະຈັບຄູ່ມາປະສົມພັນໃນຊ່ວງປາຍເດືອນມີຖຸນາ ໝູ່ປ່າແຄະໂຕເມຍຈະຕັ້ງທ້ອງນານ100ວັນ ອອກລູກຄັ້ງລະ 3-6ໂຕ ໝູ່ປ່າແຄະໃຫຍ່ເຕັມໄວ 2ປີ ໂດຍມີອາຍຸຍືນປະມານ 8ປີ ສັດຕູຕາມທຳມະຊາດຂອງມັນຄື ເສືອ ແລະງູໃຫຍ່.
ການບຸກລຸກປ່າເພື່ອຂະຫຍາຍການກະສິກຳ ແລະ ການຈູບທົ່ງຫຍ້າເພື່ອໃຫ້ຕົ້ນຫຍ້າແຕກຍອດໃໝ່ເພື່ອເປັນອາຫານຂອງຟູງສັດ ລວມໄປເຖິງການລ່າເພື່ອເອົາເນື້ອ ເປັນໄພທີ່ຄຸກຄາມໝູປ່າແຄະ ແລະ ການທີ່ມີຖິ່ນອາໄສສະເພາະບາງພື່ນທີ່ ຈິ່ງເຮັດໃຫ້ໝູ່ປ່າແຄະລົດຈຳນວນລົງຢ່າງໄວວາ. ແຕ່ເນື່ອງຈາກໝູປ່າແຄະນັ້ນ ບໍ່ຄ່ອຍເປັນທີ່ສົນໃຈຂອງສາທາລະນະຊົນຄືກັບສັດປ່າຂະໜາດໃຫຍ່ເຊັ່ນ ເສືອບັງກໍ ຫຼື ແຮດອິນເດຍ ຈິ່ງເຮັດໃຫ້ບໍ່ມີການສະນັບສະໜູນການສຶກສາ ແລະ ອານຸລັກພໍເທົ່າໃດ ໃນຂະນະທີ່ການຂະຫຍາຍພັນໃນສວນສັດກໍປະສົບຄວາມສຳເລັດພຽງບາງແຫ່ງເທົ່ານັ້ນ.
ຢ່າງໃດກໍຕາມ ນັບແຕ່ປີ ຄສ 1995 ກໍໄດ້ມີການສຶກສາກ່ຽວກັບສັດຊະນິດນີ້ຫຼາຍຂຶ້ນ ລວມທັງມີການຕັ້ງສູນວິໄຈ ແລະ ເພາະລ້ຽງໝູປ່າແຄະໃນລັດ ອັດຊຳ ປະເທດອິນເດຍ ແຕ່ເຖິງວ່າຈະເປັນເຊັ່ນນັ້ນອານະຄົດຂອງພວກມັນກໍຍັງບໍ່ຄ່ອຍຈະດີ ໂດຍໃນປັດຈຸບັນນີ້ ປະມານການວ່າ ມີໝູປ່າແຄະໃຫຍ່ເຕັມໄວເຫຼືອຢູ່ປະມານ 250ໂຕ ໃນທົ່ວໂລກເທົ່ານັ້ນ ເຊິ່ງທາງ IUCN ໄດ້ຈັດໃຫ້ພວກມັນຢູ່ໃນສະຖານະສັດໃກ້ສູນພັນ(Endangered) .
