Home Uncategorized ປະທານສະພາແຫ່ງຊາດ, ປະທານປະເທດ ແລະ ນາຍົກລັດຖະມົນຕີ ຂຶ້ນປະຕິຍານຕົນ ເພື່ອຮັບໃຊ້ຊາດ ຮັບໃຊ້ປະຊາຊົນ

ປະທານສະພາແຫ່ງຊາດ, ປະທານປະເທດ ແລະ ນາຍົກລັດຖະມົນຕີ ຂຶ້ນປະຕິຍານຕົນ ເພື່ອຮັບໃຊ້ຊາດ ຮັບໃຊ້ປະຊາຊົນ

0
557

ກອງປະຊຸມ ຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ໄຂຂຶ້ນໃນເຊົ້າວັນທີ 22​ ມີນາ 2021 ເຊິ່ງເປັນມືສັນວັນດີ ກົງກັບ ວັນສ້າງຕັ້ງ ພັກປະຊາຊົນ ປະຕິວັດລາວ ເຊິ່ງປີນີ້ ຄົບຮອບ 66 ປີ ພໍດີ. ກອງປະຊຸມຄັ້ງນີ້ ໄດ້ມີການເລືອກຕັ້ງ ເອົາປະທານສະພາແຫ່ງຊາດ ຜູ່ໃໝ່ ໂດຍການເຫັນດີ ເປັນເອກະພາບ ເລືອກເອົາ ທ່ານ ໄຊສົມພອນພົມວິຫານ ເປັນ ປະທານ ສະພາແຫ່ງຊາດ ຊຸດທີ IX ແທນ ທ່ານ ນາງ ປານີ ຢາທໍ້ຕູ້ ທີ່ໄດ້ໝົດວາລະ.

ທ່ານປະທານສະພາແຫ່ງຊາດ ຜູ່ໃໝ່ ໄດ້ກ່າວປະຕິຍານຕົນວ່າ: ”ຂ້າພະເຈົ້າ ຂໍໃຫ້ຄໍາໝັ້ນສັນຍາວ່າ: ຈະຊື່ສັດບໍລິສຸດຕໍ່ຜົນປະໂຫຍດຂອງຊາດ ແລະ ປະຊາຊົນ, ຈະສຸມສະຕິປັນຍາ, ເຫື່ອແຮງ, ຄວາມຮູ້, ຄວາມສາມາດທີ່ມີຮ່ວມກັບໝູ່ຄະນະ ກໍຄື ສະມາຊິກສະພາແຫ່ງຊາດ ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ໂດຍສະເພາະ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມສະພາແຫ່ງຊາດ ເຂົ້າໃນການປະຕິບັດສິດ ແລະ ໜ້າທີ່ ຂອງສະພາແຫ່ງຊາດ ຊຸດທີ IX ຕາມທີ່ກໍານົດໃນລັດຖະທໍາມະນູນ ແລະ ກົດໝາຍ ໃຫ້ມີໝາກຜົນຕົວຈິງ; ຍົກສູງບົດບາດການເຄື່ອນໄຫວວຽກງານຂອງບັນດາກົງຈັກເສນາທິການ ໃຫ້ມີຄວາມໜັກແໜ້ນເຂັ້ມແຂງ, ປັບປຸງການເຄື່ອນໄຫວວຽກງານ ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ໃຫ້ກົມກຽວກັບການເຄື່ອນໄຫວວຽກງານ ຂອງສະພາປະຊາຊົນແຂວງ, ນະຄອນຫລວງ ເພື່ອຮັບປະກັນການຈັດຕັ້ງປະຕິບັດກົດໝາຍ, ມະ ຕິກອງປະຊຸມສະພາແຫ່ງຊາດ ຢູ່ທ້ອງຖິ່ນ ໃຫ້ໄດ້ຮັບຜົນດີຂຶ້ນ; ຈະເພີ່ມທະວີຄວາມເອົາໃຈໃສ່ໃນການ ຈັດຕັ້ງປະຕິບັດພາລະບົດບາດ ດ້ານນິຕິບັນຍັດ, ການຕິດຕາມກວດກາ, ການຕົກລົງບັນຫາສໍາຄັນພື້ນ ຖານຂອງປະເທດຊາດ ສອດຄ່ອງກັບແນວທາງນະໂຍບາຍຂອງພັກ, ລັດຖະທໍາມະນູນ, ກົດໝາຍ ແລະ ຕອບສະໜອງຄວາມມຸ່ງມາດປາຖະໜາຂອງປະຊາຊົນລາວບັນດາເຜົ່າ. ທັງນັ້ນ, ກໍເພື່ອເພື່ອແນໃສ່ສ້າງລັດປະຊາທິປະໄຕປະຊາຊົນ ໃຫ້ກາຍເປັນລັດທີ່ປົກຄອງດ້ວຍກົດໝາຍ ທີ່ມາຈາກປະຊາຊົນ ໂດຍປະຊາຊົນ ແລະ ເພື່ອປະຊາຊົນ ແລະ ປະກອບສ່ວນສ້າງປະເທດຊາດໃຫ້ມັ່ງຄັ່ງ, ເຂັ້ມແຂງ, ປະຊາຊົນມີຄວາມຜາສຸກ, ສັງຄົມມີຄວາມສາມັກຄີເປັນປຶກແຜ່ນ, ມີປະຊາທິປະໄຕ, ຍຸຕິທຳ ແລະ ສີວິໄລ.”

ກອງປະຊຸມ ຍັງໄດ້ ຮັບຮອງເອົາການແຕ່ງຕັ້ງ ຮອງ ປະທານ ສະພາແຫ່ງຊາດ ຈໍານວນ 5 ທ່ານ. ດັ່ງລາຍລະອຽດຂ້າງລຸ່ມ.

ກອງປະຊຸມ ຍັງໄດ້ ເຫັນດີ ເປັນເອກະພາບ ດ້ວຍຄະແນນສຽງສ່ວນຫຼາຍ, ຮັບຮອງເອົາການແຕ່ງຕັ້ງ ທ່ານ ທອງລຸນ ສີສຸລິດ, ເລຂາທິການໃຫຍ່ສູນກາງພັກ ດໍາລົງຕໍາແໜ່ງ ເປັນ ປະທານປະເທດ ແຫ່ງ ສປປ ລາວ. ພ້ອມກັບ ແຕ່ງຕັ້ງຮອງ ປະທານ ປະເທດ 2 ທ່ານ ຄື ທ່ານນາງ ປານີ ຢາທໍ້ຕູ້ ແລະ ທ່ານ ບຸນທອງ ຈິດມະນີ.

ທ່ານປະທານປະເທດ ໄດ້ຂຶ້ນປະຕິຍານຕົນ ແລະ ກ່າວຕໍ່ສະພາແຫ່ງຊາດ ດັ່ງນີ້

ພ້ອມດຽວກັນນັ້ນ, ກອງປະຊຸມສະພາແຫ່ງຊາດ ຄັ້ງທີ IX ຍັງລົງຄະແນນສຽງຮັບຮອງ ການແຕ່ງຕັ້ງ ນາຍົກລັດຖະມົນຕີ ແລະ ຄະນະລັດຖະບານ, ເຊິ່ງ ທ່ານ ພັນຄໍາ ວິພາວັນ ໄດ້ຮັບການແຕ່ງຕັ້ງ ເປັນນາຍົກລັດຖະມົນຕີ, ແລະ ຮອງນາຍົກລັດຖະມົນຕີ ອີກ 3 ທ່ານ ຄື ທ່ານ ພົນເອກ ຈັນສະໝອນ ຈັນຍາລາດ, ທ່ານ ສອນໄຊ ສີພັນດອນ ແລະ ທ່ານ ກິແກ້ວ ໄຂຄໍາພິທູນ.

ທ່ານນາຍົກລັດຖະມົນຕີ ຄໍາພັນ ວິພາວັນ ກໍ່ໄດ້ ຂຶ້ນປະຕິຍານຕົນ ແລະ ຮັບຕໍາແໜ່ງ ດັ່ງລຸ່ມນີ້

ພາຍຫລັງໄດ້ຮັບເລືອກເປັນນາຍົກລັດຖະມົນຕີ ແຫ່ງ ສປປ ລາວ ຢູ່ກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ໃນຕອນເຊົ້າວັນທີ 22 ມີນາ 2021 ທີ່ຫໍສະພາແຫ່ງຊາດຫລັງໃໝ່ ທ່ານ ພັນຄໍາ ວິພາວັນ ໄດ້ຂຶ້ນສະເໜີກ່ຽວກັບໂຄງປະ ກອບກົງຈັກຂອງລັດຖະບານ, ເປົ້າໝາຍແຕ່ງຕັ້ງເປັນຮອງນາຍົກລັດຖະມົນຕີ ແລະ ສະມາຊິກລັດຖະບານ ໂດຍກົງຈັກການຈັດຕັ້ງຂອງລັດຖະບານ ຊຸດທີ IX ປະກອບມີ 17 ກະຊວງ ແລະ 2 ອົງການທຽບເທົ່າກະຊວງ.

ຜ່ານການພິຈາລະນາ ແລະ ປະກອບຄໍາເຫັນ ຢ່າງເລິກເຊີ່ງ ສະມາຊິກສະພາແຫ່ງ ຊາດ ໄດ້ພ້ອມກັນ ລົງຄະແນນສຽງເຫັນດີຮັບຮອງເອົາການແຕ່ງຕັ້ງສະມາຊິກລັດຖະ ບານຕາມການສະເໜີຂອງນາຍົກລັດຖະມົນຕີ ຈໍານວນ 20 ທ່ານ ດັ່ງນີ້:

  • 1. ພົນເອກ ຈັນສະໝອນ ຈັນຍາລາດ ເປັນຮອງນາຍົກລັດຖະມົນຕີ ທັງເປັນລັດ ຖະມົນຕີກະຊວງປ້ອງກັນປະເທດ
  • 2. ທ່ານ ສອນໄຊ ສີພັນດອນ ເປັນຮອງນາຍົກລັດຖະມົນຕີ ທັງເປັນລັດຖະມົນຕີກະຊວງແຜນການ ແລະ ການລົງທຶນ
  • 3. ທ່ານ ກິແກ້ວ ໄຂຄໍາພິທູນ ເປັນຮອງນາຍົກລັດຖະມົນຕີ.
  • 4. ທ່ານ ວິໄລ ຫຼ້າຄໍາຟອງ ເປັນລັດຖະມົນຕີກະຊວງປ້ອງກັນຄວາມສະຫງົບ
  • 5. ທ່ານ ສະເຫຼີມໄຊ ກົມມະສິດ ເປັນລັດຖະມົນຕີກະຊວງການຕ່າງປະເທດ
  • 6. ທ່ານ ຄໍາແພງ ໄຊສົມແພງ ເປັນລັດຖະມົນຕີກະຊວງອຸດສາຫະກໍາ ແລະ ການຄ້າ
  • 7. ທ່ານ ຄຳເຈນ ວົງໂພສີ ເປັນລັດຖະມົນຕີ ຫົວໜ້າຫ້ອງວ່າການສໍານັກງານນາຍົກລັດຖະມົນຕີ
  • 8. ທ່ານ ບໍ່ວຽງຄຳ ວົງດາລາ ເປັນລັດຖະມົນຕີກະຊວງເຕັກໂນໂລຊີ ແລະ ການສື່ສານ
  • 9. ທ່ານ ເພັດ ພົມພິທັກ ເປັນລັດຖະມົນຕີກະຊວງກະສິກໍາ ແລະ ປ່າໄມ້
  • 10. ທ່ານ ນາງ ບຸນຄໍາ ວໍລະຈິດ ເປັນລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລອ້ມ
  • 11. ທ່ານ ສອນໄຊ ສິດພະໄຊ ເປັນຜູ້ວ່າການທະນາຄານແຫ່ງ ສປປ ລາວ
  • 12. ທ່ານ ນາງ ໃບຄໍາ ຂັດຕິຍະ ເປັນລັດຖະມົນຕີກະຊວງແຮງງານ ແລະ ສະຫວັດດີການສັງຄົມ
  • 13. ທ່ານ ນາງ ສວນສະຫວັນ ວິຍາເກດ ເປັນລັດຖະມົນຕີກະຊວງຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ
  • 14. ທ່ານ ບຸນໂຈມ ອຸບົນປະເສີດ ເປັນລັດຖະມົນຕີກະຊວງການເງິນ
  • 15. ທ່ານ ວຽງສະຫວັດ ສີພັນດອນ ເປັນລັດຖະມົນຕີກະຊວງໂຍທາທິການ ແລະ ຂົນສົ່ງ
  • 16. ທ່ານ ພຸດ ສິມມາລາວົງ ເປັນລັດຖະມົນຕີກະຊວງສຶກສາທິການ ແລະ ກິລາ
  • 17. ທ່ານ ບຸນແຝງ ພູມມະໄລສິດ ເປັນລັດຖະມົນຕີກະຊວງສາທາລະນະສຸກ
  • 18. ທ່ານ ໄພວີ ສີບົວລິພາ ເປັນລັດຖະມົນຕີກະຊວງຍຸຕິທໍາ
  • 19. ທ່ານ ທອງຈັນ ມະນີໄຊ ເປັນລັດຖະມົນຕີກະຊວງພາຍໃນ
  • 20. ທ່ານ ດາວວົງ ພອນແກ້ວ ເປັນລັດຖະມົນຕີກະຊວງພະລັງງານ ແລະ ບໍ່ແຮ່

ຮຽບຮຽງໂດຍ: All in LAOS

NO COMMENTS

LEAVE A REPLY

Please enter your comment!
Please enter your name here