ພິທີເຊັນສັນຍາລະຫວ່າງ ກົມຂົວທາງ ກະຊວງໂຍທາທິການ ແລະ ຂົນສົ່ງ ແລະ ບໍລິສັດ ຮ່ວມ ທັງລ໋ອງຈ່ອຍສະໂຕກ ກໍໂປເຣຊັນ ແລະ ບໍລິສັດ ສຸພາພອນ ກໍ່ສ້າງ, ສຳຫຼວດ-ອອກແບບ ແລະ ຂົວ ທາງ ຈຳກັດຜູ້ດຽວ ໄດ້ຈັດຂຶ້ນໃນວັນທີ 11 ມີນານີ້ ທີ່ກະຊວງໂຍທາທິການ ແລະ ຂົນສົ່ງ, ຮ່ວມລົງ ນາມລະຫວ່າງ ທ່ານ ສີສົມພັນ ພິມສີປະສົມ ຫົວໜ້າໂຄງການປັບປຸງ ແລະ ສ້ອມແປງທາງ 13 ໃຕ້ ແລະ ທ່ານ ສຸກສະໝອນ ດານຸວົງ ຫົວໜ້າ ບໍລິສັດ ສຸພາພອນ ກໍ່ສ້າງ, ສຳຫຼວດ-ອອກແບບ ແລະ ຂົວທາງ ຈຳກັດຜູ້ດຽວ ມີພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ໂຄງການປັບປຸງ ແລະ ສ້ອມແປງທາງ 13 ໃຕ້ (ໄລຍະສັນຍາ 1) ກິໂລແມັດ (ກມ) 71 ຫາ ກມ 111 ມີ ຄວາມຍາວ 40 ກມ ແມ່ນນອນຢູ່ໃນໂຄງການປັບປຸງ ແລະ ສ້ອມແປງທາງ 13 ໃຕ້ ແຕ່ ກມ 71 (ແຂວງບໍລິຄໍາໄຊ) ຫາ ກມ 346 (ແຂວງຄໍາມ່ວນ) ມີຄວາມຍາວທັງໝົດ 275 ກມ, ຊຶ່ງໃດ້ແບ່ງອອກເປັນ 4 ໄລຍະສັນຍາ, ໄດ້ຮັບການສະໜັບສະໜູນເງິນກູ້ດອກເບ້ຍຕ່ຳ ຈາກສາມສະຖາ ບັນຄື: ທະນາຄານໂລກ (WB), ທະນາຄານລົງທຶນເອີຣົບ (EIB), ທະນາຄານການລົງທຶນໂຄງລ່າງ ພື້ນຖານອາຊີ (AIB) ແລະ ງົບປະມານຈາກກອງທຶນທາງ ລວມທັງໝົດ 157,5 ລ້ານໂດລາ, ໃນນີ້ຄ່າ ກໍ່ສ້າງ ແລະ ປັບປຸງເສັ້ນ ທາງ 275 ກມ ຈໍານວນ 125 ລ້ານໂດລາ, ຄ່າຊົດເຊີຍສິ່ງກີດຂວາງ ແລະ ເວນຄືນທີ່ດິນ 1,7 ລ້ານໂດລາ, ຄ່າວ່າຈ້າງທີ່ປຶກສາ 5 ລ້ານໂດລາ ແລະ ຄ່າບູລະນະຮັກສາ 25,8 ລ້ານໂດລາ, ໄລຍະປະຕິບັດໂຄງການແມ່ນ 10 ປີ ແຕ່ປີ 2021-2031, ໃນນີ້ ໄລຍະກໍ່ສ້າງ 2-3 ປີ ແລະ ບູລະນະຮັກສາ 7-8 ປີ.
ໂຄງການນີ້ຈຸດປະສົງ ເພື່ອປັບປຸງ ແລະ ຍົກລະດັບຕອນທາງດັ່ງກ່າວໃຫ້ສາມາດຮັບນ້ຳໜັກ ບັນທຸກ ໄດ້ 11 ໂຕນ/ເພົາ ໂດຍການຍົກລະດັບໂຄງສ້າງຂອງທາງໄລຍະທີ່ຕໍ່າທີ່ມີນໍ້າຖ້ວມໃນໄລຍະ ຜ່ານມາ, ຂະຫຍາຍໜ້າທາງເກົ່າໃຫ້ກວ້າງອອກຕື່ມ, ເສີມຄວາມແຂງແກ່ນ ໂດຍການເສີມຊັ້ນພື້ນທາງອີກ 10-20 ຊມ ແລະ ປູທັບໜ້າທາງດ້ວຍຢາງຂົວ, ສໍາລັບໄລຍະສັນຍາ 1 ແມ່ນເລີ່ມແຕ່ ກມ 71 ຫາ ກມ 111, ລວງຍາວ 40 ກມ, ແມ່ນນໍາໃຊ້ທຶນກູ້ຢືມຈາກທະນາຄານໂລກ ເພື່ອປັບປຸງຍົກລະດັບຈຸດນ້ຳຖ້ວມ ແລະ ຂະຫຍາຍໜ້າທາງເກົ່າ ຈາກ 9 ແມັດ ເປັນ 12 ແມັດ, ມີ 2 ຊ່ອງທາງຈາລະຈອນ (2X3,5 ມ) ແລະ ບ່າທາງເບື້ອງລະ 2,5 ມ ພ້ອມທັງກໍ່ສ້າງຂົວໃໝ່ 2 ແຫ່ງ ແທນໃສ່ຈຸດເກົ່າ ລວງຍາວແຫ່ງລະປະ ມານ 25 ມ, ກ້ວາງ 12 ມ, ໂຄງສ້າງທາງ ແມ່ນໄດ້ອອກແບບເປັນໜ້າທາງແບບປູຢາງຂົ້ວ (ເບຕົງອັສ ຟານ)
ໃນການຈັດຕັ້ງປະຕິບັດໂຄງການດັ່ງກ່າວ ໄດ້ຄັດເລືອກເອົາບໍລິສັດຮັບເໝົາໂດຍການປະມູນສາກົນໃນ ຮູບແບບສັນຍາແບບມອບເໝົາ (Output–and Performances-Base Road ContractOPBRC) ຄື ຜູ້ຮັບເໝົາຈະເປັນຜູ້ດໍາເນີນການກໍ່ສ້າງສໍາເລັດພາຍໃນ 2 ປີ ແລະ ສືບຕໍ່ບູລະນະຮັກສາໄປ ຕື່ມອີກ 8 ປີ, ຈຶ່ງມອບໃຫ້ເຈົ້າຂອງໂຄງການ.
ມູນຄ່າຂອງສັນຍາຜ່ານການປະມູນ ສໍາລັບສັນຍານີ້ແມ່ນ 17,5 ລ້ານໂດລາ, ສ່ວນຮູບການຊໍາ ລະໃຫ້ແກ່ໂຄງການແບ່ງອອກເປັນ 2 ໄລຍະຄື: ໄລຍະທີ 1: ແມ່ນໄລຍະດໍາເນີນການກໍ່ສ້າງ 2 ປີ, ມີມູນ ຄ່າປະມານ 14 ລ້ານໂດລາ ໂດຍແມ່ນທະນາຄານໂລກເປັນຜູ້ຊຳລະ, ໄລຍະທີ 2: ແມ່ນໄລຍະການນໍາ ໃຊ້ ແລະ ບູລະນະຮັກສາເສັ້ນທາງ 8 ປີ, ແບ່ງຈ່າຍເປັນງວດໆ ໂດຍນໍາໃຊ້ເງິນຈາກກອງທຶນທາງ (ຂອງ ລັດຖະບານລາວ) ຈໍານວນ 3,5 ລ້ານໂດລາ.
ຂ່າວ-ພາບ: ບຸນອູ້ມ
