ໃນລະຫວ່າງການຖືພາ ແມ່ທ້ອງຄວນໄດ້ຮັບອາຫານຄົບ 5 ໝູ່ ເພື່ອໃຫ້ຮ່າງກາຍມີສານອາຫານທີ່ຈໍາ ເປັນແລະພຽງພໍ ສຳລັບແມ່ ແລະ ເດັກໃນທ້ອງ. ແຕ່ມີອາຫານອື່ນໆອີກຫລາຍຢ່າງທີ່ແມ່ຖືພາຄວນຫຼີກລ້ຽງໃນໄລຍະຖືພາ. ໃຫ້ເຮົາເບິ່ງວ່າມີຫຍັງແດ່ທີ່ແມ່ທ້ອງບໍ່ຄວນກິນໃນຊ່ວງຖືພາ.
ອາຫານ 10 ຢ່າງທີ່ບໍ່ຄວນກິນສຳລັບແມ່ຍິງຖືພາແມ່ນມີດັ່ງຕໍ່ໄປນີ້.
1. ຄາເຟອີນ
ຄົນຖືພາຄວນຫລີກລ້ຽງເຄື່ອງດື່ມທີ່ມີຄາເຟອີນ, ຊາ, ກາເຟ, ເຄື່ອງດື່ມທີ່ມີພະລັງງານ. ເພາະເຄື່ອງດື່ມເຫລົ່ານີ້ຈະກະຕຸ້ນການສູບຊີດຂອງເລືອດ ເພີ່ມການຂັບປັດສະວະ ເຮັດໃຫ້ແມ່ຍ່ຽວເລື້ອຍໆ. ເຊິ່ງໃນລະຫວ່າງການຖືພາ ແມ່ທ້ອງ ກໍມັກຈະຍ່ຽວເລື້ອຍໆຢູ່ແລ້ວ ແລະມີຜົນກະທົບທາງອ້ອມທີ່ເຮັດໃຫ້ຫົວໃຈຂອງແມ່ເຮັດວຽກໜັກກວ່າເກົ່າ ມັນຍັງໄປລະລາຍແຄວຊ້ຽມແລະເກືອແຮ່ໃນຮ່າງກາຍຫຼາຍຂຶ້ນອີກ.
.
2. ໄຂ່ດິບ ຫລື ສຸກໆດີບໆ
ແມ່ຖືພາຄວນກິນໄຂ່ທີ່ປຸງແຕ່ງໃຫ້ສຸກເຊັ່ນ: ໄຂ່ຕົ້ມ, ໄຂ່ຈືນ, ໄຂ່ຕຸນ ເປັນຕົ້ນ. ເພາະວ່າໄຂ່ດິບຫຼື ໄຂ່ເຄິ່ງສຸກເຄິ່ງດີບ ສົ່ງຜົນສ່ຽງຕໍ່ການຕິດເຊື້ອ Salmonella ເປັນກຸ່ມເຊື້ອແບັກທີເລຍທີ່ສາມາດເຮັດໃຫ້ ຜະໜັງລຳໄສ້ເປັນແຜ ແລະ ເປັນສ່ວນໜຶ່ງເຮັດໃຫ້ເກີດ ອາຫານເປັນຜິດໄດ້.
3. ອາຫານທີ່ຍັງບໍ່ໄດ້ປຸງແຕ່ງສຸກ.
ປາ, ຊີ້ນແດງ, ໄກ່, ຫລືຊີ້ນທຸກປະເພດ ທີ່ຍັງດີບ ຫຼື ບໍ່ໄດ້ປຸງແຕ່ງໃຫ້ສຸກ ເຊັ່ນ: ສະເຕັກ, ອາຫານປີ້ງ, , ລາບ, ກ້ອຍ, ຫອຍນາງລົມ, ກຸ້ງໃນແຊ່ນ້ຳປາ ຫຼື ຊູຊິ ເຂົ້າປັ້ນຊູຊິກັບປາດິບຫລືຊີ້ນດິບ ກະບໍ່ຄວນກິນ.
.
4. ນົມ ແລະ ຊີສບາງຊະນິດ
ນົມສົດແລະຊີສບາງຊະນິດ ທີ່ບໍ່ໄດ້ຜ່ານຂະບວນການດ້ວຍຍຄວາມຮ້ອນຫລືການຂ້າເຊື້ອ ເຊັ່ນ: ຄໍາມັງແບຣ,, ບູຣຊີສຊະນິດຕ່າງໆ ເພາະວ່າຊີດເຫຼົ່ານີ້ອາດຈະເຈືອປົນເຊື້ອແບັກທີເຣັຍທີ່ມີຊື່ວ່າ ລີສເທີເລຍ(listeria) ອາດຈະເປັນອັນຕະລາຍຕໍ່ແມ່ແລະລູກ.
.
5.ຖົ່ວດິນ
ຖ້າພໍ່ຫຼືແມ່ມີປະຫວັດການແພ້ ຄວນຫຼີກຖົ່ວດິນ ເພາະວ່າທາງການແພດເຊື່ອວ່າມີສ່ວນກະຕຸ້ນໃຫ້ໂລກພູມແພ້ຜ່ານໄປຫາເດັກໃນທ້ອງທາງພັນທຸກຳໄດ້.
.
6. ມີ່ເຄິ່ງສຳເລັດຮູບ
ບໍ່ແນະນຳ ໃຫ້ຜູ້ເປັນແມ່ຕົ້ມມີ່ກິນຄືດັ່ງທີ່ເຄີຍມີມາກ່ອນຖືພາ. ເພາະວ່າມີ່ມີສານປຸງລົດຊາດ ແລະ ແປ້ງນົວໃນປະລິມານສູງ ເຮັດໃຫ້ໄດ້ຮັບສານໂຊດຽມ ແລະ ເກືອ ຫຼາຍເກີນຮ່າງກາຍຕ້ອງການ ເຮັດໃຫ້ລະບົບການໝູນວຽນ ເລືອດ ແລະລະບົບຂັບຖ່າຍເຮັດວຽກໜັກ.
.
7. ປາທະເລບາງຊະນິດ
ປາໃນທະເລບາງຊະນິດບໍ່ຄວນກິນເຊັ່ນ: ປາດາບ, ປາສະຫຼາມ ເຊິ່ງເປັນປາທີ່ມີລະດັບທາດບາຫຼອດທີ່ສູງຕາມທຳມະຊາດ ທີ່ສາມາດເປັນອັນຕະລາຍຕໍ່ເດັກໃນທ້ອງ. ແມ່ນແຕ່ປາທູ ຫຼືປາກະປ່ອງ ກໍ່ສູງເຊັ່ນກັນ ຄວນຈຳກັດໃນການກິນ ບໍ່ເກີນ2ຄັ້ງຕໍ່ອາທິດ.
.
8. ອາຫານຊາດຈັດ
ອາຫານທີ່ມີລົດຊາດເຄັມຈັດ, ຫວານຈັດ. ຖ້າເຄັມເກີນໄປ ເຮັດໃຫ້ຫົວໃຈແລະ ໝາກໄຂ່ຫຼັງເຮັດວຽກໜັກ. ລົດຊາດຫວານເກີນໄປຈະເພີ່ມພາລະໃຫ້ກັບຕັບອ່ອນຕ້ອງຜະລິດ ອີນຊູລິນເພື່ອຄວບຄຸມນ້ຳຕານຫຼາຍຂຶ້ນ ແລະເຮັດໃຫ້ນ້ຳໜັກແມ່ເພິ່ມຂຶ້ນອີກ. ນອກຈາກນີ້, ລົດຊາດສົ້ມແລະເຜັດຈັດ ຈະເພີ່ມພາລະໃຫ້ກະເພາະເຮັດວຽກໜັກ, ເຮັດໃຫ້ເກີດອາການທ້ອງອືດ ແລະ ກົດໃນກະເພາະອາຫານ ຕໍ່ລັບແມ່.
9. ອາຫານເສີມວິຕາມິນທຸກຊະນິດ
ການກິນວິຕາມິນເສີມໃນເວລາຖືພາຄວນປຶກສາທ່ານໝໍກ່ອນ. ເນື່ອງຈາກວ່າວິຕາມິນເສີມຖ້າທ່ານໄດ້ຮັບຫຼາຍເກີນໄປຈະມີຜົນກະທົບທີ່ບໍ່ດີຫຼາຍກ່ວາທີ່ດີ. ຕັບຕ້ອງເຮັດວຽກໜັກເພາະມັນກຳຈັດວິຕາມິນສ່ວນເກີນອອກຈາກຮ່າງກາຍ ເທົ່າກັບການເພີ່ມພາລະການເຮັດວຽກຂອງຕັບ ຍິ່ງໄປກວ່ານັ້ນ, ຮ່າງກາຍບໍ່ໄດ້ຮັບປະໂຫຍດຈາກວິຕາມິນສ່ວນເກີນ, ເທົ່າກັບວ່າເສຍເງິນຊື້ວິຕາມິນມາກິນແຕ່ບໍ່ໄດ້ຮັບປະໂຫຍດຫຍັງ.
.
10. ເຄື່ອງດື່ມປະເພດເຫຼົ້າທຸກຊະນິດລວມທັງການສູບຢາ.
ຂໍ້ນີ້ແມ່ທຸກຄົນຮູ້ເລື່ອງນີ້ດີວ່າເພາະເຄື່ອງດື່ມປະເພດເຫຼົ້າທຸກປະເພດ ເຖິງແມ່ນວ່າໃນປະລິມານທີ່ເຈືອປົນໜ້ອຍຫຼາຍກໍຕາມ , ເບຍ, ເຫຼົ້າແວງ, ເຫລົ້າຂາວ, ເຫລົ້າທີ່ທີ່ມີສວ່ນປະສົມຂອງເຄື່ອງດື່ມທຸກຊະນິດ ຖ້າແມ່ທ້ອງດື່ມໃນປະລິມານໃດໜຶ່ງໃນຂະນະຕັ້ງທ້ອງໃນໄລຍະສອງເດືອນ ທຳອິດຂອງການຖືພາ, ກໍມີຄວາມສ່ຽງແທ້ງລູກໄດ້ ເຮັດໃຫ້ເກີດກ່ອນກຳນົດ ມີພັດທະນາການບໍ່ສົມບູນ, ສະໝອງ ເຊື່ອມ ແຕ່ກຳເນີດ ແລະການສູບຢາເປັນສາເຫດເຮັດໃຫ້ແທ້ງລູກໄດ້ ເຊັ່ນກັນ.
ເມື່ອຮູ້ແບບນີ້ແລ້ວແມ່ໆທັງຫຼາຍທີ່ກໍາລັງຖືພາ ໃຫ້ອົດທົນເອົາກ່ອນ ໄວ້ເກີດລູກແລ້ວ ຈັງຄ່ອຍດື່ມ ຫຼື ກິນອາຫານທີ່ຕ້ອງການກິນກໍໄດ້ ຊ່ວງຖືພາເຮົາຕ້ອງໄດ້ອົດທົນຫຼິກລ້ຽງອາຫານ ແລະ ເຄື່ອງດືມ ທີ່ເປັນອັນຕະລາຍຕໍ່ລູກໃນທ້ອງ ແລະ ເພື່ອສຸຂະພາບຂອງແມ່ອີກດ້ວຍ.
