ເມື່ອບໍ່ດົນມານີ້, ສະຫາຍ ນາງ ດວງຕາ ໄຊຍະຫົງ ກໍາມະການພັກແຂວງ ກໍາມະການສູນ ກາງຊາວໜຸ່ມ ເລຂາຄະນະບໍລິຫານງານຊາວໜຸ່ມ ປປລ ແຂວງບໍ່ແກ້ວ ພ້ອມດ້ວຍພະນັກງານຫຼັກ ແຫຼ່ງຫ້ອງການຊາວໜຸ່ມແຂວງ ໄດ້ນໍາເອົາຊຸດນັກຮຽນ, ອຸປະກອນການຮຽນ ແລະ ເຄື່ອງ ນຸ່ງຫົ່ມ ມູນຄ່າ 27.960.000 ກີບ ໄປມອບໃຫ້ຄະນະຊາວໜຸ່ມ ປປລ ເມືອງຫ້ວຍຊາຍ ໂດຍໄດ້ຮັບການຕ້ອນຮັບຈາກ ສະຫາຍ ວຽງຄໍາ ມະນີສອນ ຄະນະບໍລິຫານງານຊາວໜຸ່ມແຂວງ ເລຂາຄະນະບໍລິຫານ ງານຊາວໜຸ່ມເມືອງຫ້ວຍຊາຍ ແລະ ພະນັກງານຫຼັກແຫຼ່ງຫ້ອງການຊາວໜຸ່ມເມືອງເຂົ້າຮ່ວມ.
ໂອກາດນີ້, ສະຫາຍ ນາງ ດວງຕາ ໄຊຍະຫົງ ໄດ້ກ່າວວ່າ: ເຄື່ອງທີ່ນໍາມາມອບໃນຄັ້ງນີ້, ແມ່ນໄດ້ຈາກການປຸກລະດົມຈາກນັກທຸລະກິດໜຸ່ມແຂວງ ຈຸດປະສົງແມ່ນເພື່ອໃຫ້ຄະນະຊາວໜຸ່ມ ປປລ ເມືອງໄປມອບໃຫ້ສະມາຊິກຊາວໜຸ່ມ, ນັກຮຽນເຂດຫ່າງໄກ, ຜູ້ທຸກຍາກຢູ່ເມືອງຫ້ວຍຊາຍ.
ພ້ອມດຽວກັນນີ້, ສະຫາຍ ສຸວັດ ເພັງພະຈັນ ກໍາມະການປະຈໍາພັກເມືອງ ຮອງເຈົ້າເມືອງ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຊາວໜຸ່ມ ປປລ ແຂວງ ທີ່ໄດ້ເຫັນຄວາມສໍາຄັນ ຊຸກຍູ້ສົ່ງ ເສີມ ແລະ ສ້າງຜູ້ສືບທອດທີ່ດີໃຫ້ແກ່ເມືອງຫ້ວຍຊາຍ ກໍຄືພັກ – ລັດ ແລະ ປະເທດຊາດ.
(ຂ່າວ: ສົມຫວັງ ພອນວິໄລ)
