ດັ່ງທີ່ມີລາຍງານຂ່າວຢ່າງຕໍ່ເນື່ອງ ກ່ຽວກັບວັກແຊັງປ້ອງກັນໂຄວິດ ທີ່ ສປປ ລາວເຮົາໄດ້ຮັບການຊ່ວຍເຫຼືອຈາກ ສປ ຈີນ ແລະ ສ.ຣັດເຊຍ ເຊິ່ງພາຍຫຼັງພິທີສົ່ງ – ມອບຄະນະສະເພາະກິດໄດ້ເລັ່ງກຳນົດບຸລິມະສິດກຸ່ມເປົ້າໝາຍທີ່ຄວນໄດ້ຮັບການສັກວັກແຊັງດັ່ງກ່າວ.
ທ່ານ ດຣ. ພອນປະເສີດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ, ກະຊວງສາທາລະນະສຸກ ກ່າວໃນກອງປະຊຸມແນະນຳກ່ຽວກັບການແຈກຢາຍວັກແຊັງ ໃນວັນທີ 2 ມີນາ 2021 ນີ້ວ່າ: ມາຮອດປັດຈຸບັນວັກແຊັງທີ່ໄດ້ຮັບການຊ່ວຍເຫຼືອໄດ້ສັ່ງໃຫ້ບັນດາແຂວງເປັນທີ່ຮຽບຮ້ອຍແລ້ວ ຄາດວ່າພາຍໃນອາທິດທີສອງຂອງເດືອນມີນາ ໃຫ້ສຳເລັດການສັກເຂັມທີ 1 ແລະ ແລະ ເຂັມທີສອງບໍ່ໃຫ້ກາຍວັນທີ 10 ເມສາທີ່ຈະມາເຖິງນີ້.
ສຳລັບກຸ່ມເປົ້າໝາຍທີ່ຈະໄດ້ຮັບການສັກຢາວັກແຊັງ ເນື່ອງຈາກຈຳນວນວັກແຊັງທີ່ມີຢູ່ຍັງຈຳກັດ ຄະນະສະເພາະກິດຈຶ່ງໄດ້ພິຈາລະນາໃຫ້ສັກແກ່ 3 ກຸ່ມຄົນ ດັ່ງລຸ່ມນີ້ກ່ອນ:
1 ກຸ່ມພະນັກງານແພດໝໍທີ່ມີຄວາມສ່ຽງ, ຜູ້ເຮັດວຽກໃກ້ຊິດກັບຄົນເຈັບທີ່ເປັນພະຍາດໂຄວິດ – 19 ຢູ່ແຕ່ລະໂຮງໝໍຂັ້ນສູນກາງ ແລະ ທ້ອງຖິ່ນ.
2 ກຸ່ມທີ່ປະຕິບັດໜ້າທີ່ຢູ່ຕາມຈຸດຜ່ານແດນສາກົນຕ່າງໆໃນຂອບເຂດທົ່ວປະເທດ.
3 ກຸ່ມທີ່ເຮັດວຽກຢູ່ຈຸດສຸມຈຳກັດບໍລິເວນ ເຊິ່ງນັບແຕ່ຜູ້ເຮັດອະນາໄມໄປຮອດຜູ້ບໍລິຫານ.
ສາເຫດທີ່ຕ້ອງສັກວັກແຊັງໃຫ້ 3 ກຸ່ມຄົນດັ່ງກ່າວນີ້ກ່ອນ ກໍເນື່ອງຈາກວ່າທຸກສາຂາອາຊີບທີ່ເຮັດວຽກຢູ່ຕາມຈຸດທີ່ລະບຸໄວ້ນັ້ນແມ່ນຢູ່ໃນຄວາມສ່ຽງຫຼາຍກວ່າກຸ່ມອື່ນໆ.
ມາຮອດປັດຈຸບັນລາວເຮົາໄດ້ຮັບວັກແຊັງທັງໝົດ 303.000 ໂດສ, ໃນນັ້ນໄດ້ຮັບຈາກຊິໂນຟາມຂອງ ສປ ຈີນ ຈຳນວນ 302.000 ໂດສ ແລະ ສະປຸດນິກວີ ຂອງສະຫະພັນຣັດເຊຍ ຈຳນວນ 1.000 ໂດສ, ຜ່ານການສັກນັບແຕ່ວັນທີ 25 ພະຈິກມາຮອດປັດຈຸບັນໄດ້ສັກໄປແລ້ວທັງໝົດ 1.758 ຄົນ, ມີຜູ້ສັກຄົບສອງເຂັມແລ້ວ 749 ຄົນ.
ກ່ຽວກັບການສັກວັກແຊັງປ້ອງກັນໂຄວິດ – 19 ດັ່ງກ່າວນີ້ ແມ່ນຍັງບໍ່ພົບຜູ້ມີຜົນຂ້າງຄຽງທີ່ຮຸນແຮງເທື່ອ, ຄະນະສະເພາະກິດຜູ້ໄດ້ຮັບວັກແຊັງເອງກໍຢືນຢັນວ່າພາຍຫຼັງສັກແລ້ວພຽງແຕ່ຮູ້ສຶກເຈັບບໍລິເວນສັກ ແລະ ອາການປວດຕາມຕົນຕົວເລັກໜ້ອຍ ເຊິ່ງເປັນອາການປົກກະຕິຫຼັງມີການສັກວັກແຊັງເທົ່ານັ້ນ.
ສະນັ້ນ, ຈຶ່ງເຊີນຊວນຜູ້ທີ່ຢູ່ໃນກຸ່ມເປົ້າໝາຍຕາມແຂວງ ຕ່າງໆທົ່ວປະເທດ ຈົ່ງຕື່ນຕົວໄປຂຶ້ນບັນຊີຮັບການສັກວັກແຊັງຢູ່ພະແນກສາທາລະນະສຸກແຂວງ ໃຫ້ສຳເລັດໂດຍໄວທັນຕາມກຳນົດເວລາທີ່ກຳນົດໄວ້ຄືວັນທີ 10 ເມສາ 2021 ໃຫ້ສໍາເລັດເຂັມທີສອງໃນທົ່ວປະເທດ. ສ່ວນກຸ່ມອື່ນໆທີ່ມີຄວາມສ່ຽງຖັດລົງມາແມ່ນຈະໄດ້ລໍຖ້າວັກແຊັງໃນຊຸດຕໍ່ໄປທີ່ຄາດວ່າຈະມາຮອດລາວອີກບໍ່ເທົ່າໃດເດືອນຂ້າງໜ້ານີ້.
