ແຫລ່ງຂ່າວຈາກແຂວງຄຳມ່ວນ ໃຫ້ຮູ້ວ່າ: ວັນທີ 27 ກຸມພາ ຜ່ານມາ, ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ພ້ອມດ້ວຍຄະນະພະແນກການ, ຂະແໜງການກ່ຽວຂ້ອງ ລົງເຄື່ອນໄຫວຕິດຕາມ, ກວດກາສະພາບການບໍລິການ, ການຄຸ້ມຄອງຈັດສັນຕະຫລາດ ຢູ່ພາຍໃນເທສະບານແຂວງຄຳມ່ວນ ເປັນຕົ້ນ ແມ່ນຕະຫລາດສຸກສົມບູນຫລັກ 3 ແລະ ຕະຫລາດຫລັກ ໂດຍໄດ້ຕິດຕາມກວດກາບັນຍາກາດການຊື້-ຂາຍຂອງບັນດາຫົວໜ່ວຍທຸລະກິດ, ຫ້າງຮ້ານ, ສິນຄ້າເຄື່ອງອຸປະໂພກ-ບໍລິໂພກຕ່າງໆ ແລະ ສະຖານທີ່ບໍລິການຫ້ອງນໍ້າ, ບ່ອນຈອດລົດ, ສະຖານທີ່ເກັບມ້ຽນຂີ້ເຫຍື້ອຂອງຕະຫລາດ ລວມເຖິງບັນຫາອື່ນໆທີ່ກ່ຽວຂ້ອງກັບການບໍລິການ, ຄຸ້ມຄອງພາຍໃນຕະຫລາດ.
.
ໂອກາດນີ້, ທ່ານເຈົ້າແຂວງຄຳມ່ວນ ກໍໄດ້ຮຽກຮ້ອງມາຍັງຜູ້ຈັດການຕະຫລາດໃຫ້ເພີ່ມທະວີເອົາໃຈໃສ່ ການຮັກສາຄວາມສະຫງົບ, ຄວາມປອດໄພ, ການຈັດສັນພາຫະນະເຂົ້າ-ອອກໃຫ້ມີຄວາມເປັນລະບຽບຮຽບຮ້ອຍ ໄປຄຽງຄູ່ກັບການປົກປັກຮັກສາສິ່ງແວດລ້ອມ ໃຫ້ມີຄວາມສະອາດຈົບງາມ ໂດຍມີການປະສານສົມທົບກັບຂະແໜງການລັດທີ່ກ່ຽວຂ້ອງ ຕິດພັນກັບການເຮັດໜ້າທີ່ການບໍລິການທີ່ດີຕໍ່ລູກຄ້າ ເພື່ອດຶງດູດລູກຄ້າ ແລະ ສ້າງຄວາມປະທັບໃຈຕໍ່ຜູ້ມາໃຊ້ບໍລິການ.
