ສ່ວຍສາອາກອນປະຈໍາແຂວງໄຊຍະບູລີສະຫຼຸບວຽກງານ ປະຈໍາປີ 2020

ກອງປະຊຸມ ສະຫຼຸບຕີລາຄາການຈັດຕັ້ງປະຕິບັດວຽກງານສ່ວຍສາອາກອນ ປະຈໍາປີ 2020 ແລະ ທິດທາງແຜນການປີ 2021 ໄດ້ຈັດຂຶ້ນໃນວັນທີ 26 ກຸມພາ 2021 ນີ້ຢູ່ທີ່ຫ້ອງປະຊຸມຫ້ອງການການເງິນເມືອງໄຊຍະບູລີ. ໂດຍການເປັນປະທານຂອງ ທ່ານ ບຸນເສັງ ວົງສະນິດ ຫົວໜ້າສ່ວຍສາອາກອນປະຈໍາແຂວງ. ໃຫ້ກຽດເຂົ້າຮ່ວມມີ ທ່ານ ຄໍາບູ່ ທອງວັນນາ ຮອງຫົວໜ້າພະແນກການເງິນແຂວງ, ມີຫົວໜ້າ, ຮອງຫົວໜ້າຫ້ອງການການເງິນເມືອງ 11 ເມືອງ, ຫົວໜ້າ, ຮອງຫົວໜ້າສ່ວຍສາອາກອນປະຈໍາເມືອງແຕ່ລະເມືອງ ແລະ ພະນັກງານວິຊາການສ່ວຍສາອາກອນປະຈໍາແຂວງເຂົ້າຮ່ວມ.

ໃນກອງປະຊຸມ ທ່ານ ບຸນເສັງ ວົງສະນິດ ຫົວໜ້າສ່ວຍສາອາກອນປະຈໍາແຂວງ ໄດ້ໃຫ້ຮູ້ວ່າ: ຍ້ອນໄດ້ຮັບການຊີ້ນໍາ-ນໍາພາຈາກຄະນະພັກ, ອົງການປົກຄອງຂັ້ນແຂວງ-ຂັ້ນເມືອງ ໄດ້ຖືສໍາຄັນໃນການຂຸດຄົ້ນຈັດເກັບລາຍຮັບເຂົ້າງົບປະມານ ສະແດງອອກແຕ່ລະເມືອງໃນທົ່ວແຂວງ ແມ່ນເກີນແຜນ, ຍ້ອນລາຍຮັບບັງເອີນເກີດຂຶ້ນ ເມື່ອທຽບໃສ່ແຜນການເພີ່ມຂຶ້ນ ເຊັ່ນ: ການນໍາເຂົ້ານໍ້າມັນເຊື້ອໄຟ, ລາຍຮັບຈາກວິສາຫະກິດໄຟຟ້າລາວສາຂາແຂວງໄຊຍະບູລີ, ລາຍຮັບຈາກບໍລິສັດຕ່າງແຂວງທີ່ມາເຄື່ອນໄຫວຢູ່ແຂວງ, ລາຍຮັບຂອງແຂວງທີ່ອານຸມັດຢູ່ສູນກາງ, ລາຍຮັບຈາກສູນກາງຮັບຊ່ວຍທີ່ບໍ່ນອນຢູ່ແຜນ ປະຕິບັດໄດ້ 8,8 ຕື້ກວ່າກີບ, ຍ້ອນວ່າມີການນະໂຍບາຍໂຄວິດ ໄດ້ດັດແກ້ແຜນ 6 ເດືອນລົງໃຫ້ ຈາກແຜນເບື້ອງຕົ້ນ 251,10 ຕື້ກີບ ມາເປັນ 174,51 ຕື້ກີບ ສະນັ້ນໃນໄລຍະປີ 2020 ຜ່ານມາ ການປະຕິບັດເກັບລາຍຮັບຕາມແຜນດັດແກ້ 6 ເດືອນຕົ້ນປີ ປະຕິບັດໄດ້ລື່ນຄາດໝາຍ 16,16% ເປັນເງິນ 28,19 ຕື້ກວ່າກີບ

ແຕ່ເຖິງຢ່າງໃດກໍ່ຕາມຄຽງຄູ່ກັບສິ່ງທີ່ພົ້ນເດັ່ນ ແຕ່ກໍ່ຍັງມີບາງດ້ານທີ່ເປັນສິ່ງທ້າທາຍ ແລະ ຄົງຄ້າງເຊັ່ນ: ບັນຫາທະບຽນວິສາຫະກິດ ແລະ ທະບຽນສ່ວຍສາອາກອນບໍ່ກົງກັນ, ການຂຶ້ນ ແລະ ຕໍ່ທະບຽນປີ 2020 ເມື່ອທຽບໃສ່ປີ 2019 ເຫັນວ່າປະຕິບັດບໍ່ໄດ້ຄາດໝາຍ; ສັງລວມແລ້ວປີ 2019 ມີຫົວໜ່ວຍທີ່ຂຶ້ນ ແລະ ຕໍ່ທະບຽນທັງໝົດ 2.949 ຫົວໜ່ວຍ, ປີ 2020 ປະຕິບັດໄດ້ 2.266 ຫົວໜ່ວຍ, ຍັງຄ້າງບໍ່ທັນຕໍ່ທະບຽນມີເຖິງ 1.594 ຫົວໜ່ວຍ. ທ່ານຍັງໃຫ້ຮູ້ຕື່ມວ່າ: ຄາດໝາຍສູ້ຊົນແຜນການເກັບລາຍຮັບສ່ວຍສາອາກອນ ປີ 2021 ຕາມການແຈ້ງແຜນຂອງກົມ ມີຈໍານວນ 220 ຕື້ກີບ, ທ່ານເຈົ້າແຂວງໃຫ້ສູ້ຊົນຕື່ມ 5,5 ຕື້ກີບ, ພະແນກການເງິນມອບໃຫ້ອາກອນສູ້ຊົນ 5 ຕື້ກີບ, ຊັບສິນສູ້ຊົນຕື່ມ 500 ລ້ານກີບ, ທຽບໃສ່ແຜນດັດແກ້ເພີ່ມຂຶ້ນ 29,31% ຫຼື ເທົ່າກັບ 51 ຕື້ກີບ.

ຂ່າວ: ມະໄລວັນ.