ພິທີເປີດຊຸດອົບຮົມ – ຫັດແອບ ການທະຫານ, ການເມືອງ ແລະ ພະລາທິການ – ເຕັກນິກ ປະຈຳປີ 2021 ຂອງກອງພົນທີ 4 ໄດ້ຈັດຂື້ນໃນ ວັນທີ 9 ກຸມພາ 2021 ນີ້, ໂດຍການເປັນປະທານຂອງ ສະຫາຍ ພັນເອກ ຕາງຕາ ຕາດເວີນຄຳ ຫົວໜ້າການທະຫານກອງພົນທີ 4, ມີ ສະຫາຍ ພັນເອກ ສົມຈິດ ກິດຕິຍະລາດ ຫົວໜ້າການເມືອງກອງພົນທີ 4, ມີຄະນະພັກ – ຄະນະບັນຊາກອງພົນ, ອົງການ 5 ຫ້ອງ, ພະແນກການ, ກອງພັນໃຫຍ່ 401, ກອງພັນນ້ອຍ, ກອງຮ້ອຍເອກະລາດ, ພ້ອມດ້ວຍພະນັກງານ – ນັກຮົບ ທົ່ວກອງພົນທີ 4 ເຂົ້າຮ່ວມຢ່າງພ້ອມພຽງ.
.
ສະຫາຍ ພັນໂທ ສົມສະໄໝ ສີດາວັນ ຫົວໜ້າພະແນກອົບຮົມ ຫ້ອງເສນາທິການກອງພົນທີ 4 ໄດ້ຂຶ້ນຜ່ານແຜນການອົບຮົມການທະຫານ – ຫັດແອບ ການເມືອງ ແລະ ພາລາທິການ – ເຕັກນິກ ປະຈຳປີ 2021 ໂດຍປະຕິບັດຕາມຄໍາສັ່ງອົບຮົມ – ຫັດແອບ ຂອງກົມໃຫຍ່ເສນາທິການ ເລກທີ 2462/ກສນ ລົງວັນທີ 11 ທັນວາ 2020 ແລະ ແຜນການອົບຮົມຫັດແອບ ປັບປຸງລະບຽບແບບແຜນ, ຝຶກຝົນກຳລັງແຮງກາຍ ປະຈຳປີ 2021 ຂອງກອງພົນທະຫານຮາບທີ 4 ສະບັບເລກທີ 114/ກສນ ລົງວັນທີ 12 ມັງກອນ 2021 ວ່າດ້ວຍເນື້ອໃນກໍານົດເວລາ ແລະ ວິທີ ຈັດຕັ້ງປະຕິບັດ, ສິລະປະຢຸດ – ຢຸດທະວິທີ ມີລະບຽບວິໃນເຂັ້ມງວດ, ໃນນີ້ພາກການເມືອງ 10 ວັນ, ການທະຫານ 140 ວັນ, ພະລາທິການ – ເຕັກນິກ 10 ວັນ, ອົບຮົມວິຊາສະເພາະເຫຼົ່າຮົບຕ່າງໆ 100 ວັນ, ໃນການອົບຮົມ – ຫັດແອບຈະໄດ້ດຳເນີນໄປເປັນເວລາ 160 ວັນ ແບ່ງອອກເປັນ 2 ໄລຍະຄື: ໄລຍະທີ I ເລີ່ມແຕ່ຕົ້ນເດືອນ ກຸມພາ ຫາ ເດືອນພຶດສະພາ ປີ 2021, ໄລຍະທີ II ເລີ່ມແຕ່ເດືອນ ກໍລະກົດ ຫາເດືອນ ພະຈິກ ປີ 2021 ການອົບຮົມເພື່ອເຮັດໃຫ້ນາຍ ແລະ ພົນທະຫານກຳໄດ້ພາກທິດສະດີ ແລະ ພາກປະຕິບັດຕົວຈິງ, ເຮັດໃຫ້ພະນັກງານ – ນັກຮົບ ມີຄວາມເຂັ້ມແຂງ ສຳນິສຳນານໃນການກຽມພ້ອມສູ້ຮົບ ແລະ ຕອບສະໜອງກັບຄວາມຮຽກຮ້ອງຕ້ອງການຂອງຂັ້ນເທິງ.
ໂອກາດນີ້ ສະຫາຍ ພັນເອກ ຕາງຕາ ຕາດເວີນຄຳ ຫົວໜ້າການທະຫານກອງພົນທີ 4 ໄດ້ ຍ້ອງຍໍຊົມເຊີຍຕໍ່ຜົນສຳເລັດທີ່ຍາດມາໄດ້ໃນການຈັດຕັ້ງປະຕິບັດແຜນການອົບຮົມ – ຫັດແອບ ປະຈຳປີ 2020 ຜ່ານມາ, ພ້ອມເນັ້ນໜັກໃຫ້ຄະນະພັກ – ຄະນະບັນຊາ ແຕ່ລະຂັ້ນ ຈົ່ງຍົກສູງຄວາມຮັບຜິດຊອບໜ້າທີ່ການເມືອງຂອງຕົນໃຫ້ສູງກວ່າເກົ່າ, ກຳແໜ້ນທິດສະດີຫຼັກການໃຫ້ເລິກເຊິ່ງເຖີງຖອງ, ເອົາຄຸນນະພາບເປັນກົກ ປະລິມານເປັນສຳຄັນ, ເພື່ອສູ້ຊົນເຮັດໃຫ້ການອົບຮົມການເມືອງ – ຫັດແອບການທະຫານ ແລະ ພາລາທິການ – ເຕັກນິກ ປະຈຳປີ 2021 ໃຫ້ບັນລຸໝາກຜົນສູງ, ຕາມແຜນການທີ່ກົມໃຫຍ່ເສນາທິການກອງທັບວາງອອກ ສາມາດຮັບປະກັນຄວາມປອດໄຟ 100 %.
ຕອນທ້າຍພິທີ ຍັງຮັບຊົມການສວນສະໜາມ, ການສະແດງຂອງກອງພັນ 426, ກອງພັນໃຫຍ່ 401, ກອງພັນ 9, ສູນຝຶກທະຫານຮາບທີ 4, ກອງຮ້ອຍ 305 ຢ່າງເປັນຂະບວນການຟົດຟື້ນມ່ວນຊື່ນ ຂອງນາຍ ແລະ ພົນທະຫານ ທົ່ວກອງພົນທະຫານຮາບທີ 4.
ຂ່າວ – ພາບໂດຍ. ອານຸສັກ ຈູມມະນີວົງ, ບົວຄຳ ທອງລັດສະໝີ ນັກຂ່າວກອງພົນທີ 4
