ນາງ ຄໍາຈອນ ອາຍຸ 38 ປີ ອະດີດພະນັກງານທີ່ພົບບັນຫາທາງດ້ານການເງິນ ໃຊ້ໜີ້ຄ່າງວດລົດ ແລະ ໃຊ້ຈ່າຍພາຍໃນຄອບຄົວ ຈຶ່ງໃຊ້ເລ່ລ່ຽມເພື່ອຕົວະຍົວະ ເຮັດໃຫ້ຄົນອື່ນເຊື່ອໃຈ ໂດຍອ້າງວ່າສາມາດແລ່ນເຂົ້າເປັນທະຫານໄດ້ ແລະ ກິນເງິນບໍານານ, ນັບແຕ່ປີ 2012-2020 ມີຜູ້ເສຍຫາຍຕົກເປັນເຫຍື່ອ ຫຼາຍກວ່າ 20 ຄົນ ລວມມູນຄ່າເສຍ ຫາຍເກືອບ 300 ລ້ານກີບ.
ເຈົ້າໜ້າທີ່ປກສ ເມືອງໄຊເສດຖາ ໃຫ້ຮູ້ວ່າ: ມີປະຊາຊົນ ເຂົ້າມາແຈ້ງຄວາມວ່າ ນາງ ຄໍາຈອນ ຢູ່ບ້ານໂພນສະອາດ ເມືອງໄຊເສດຖາ ນະຄອນຫຼວງວຽງຈັນ ໄດ້ຕົວະເອົາເງິນໂດຍອ້າງວ່າ ສາມາດ ແລ່ນເຂົ້າເປັນທະຫານ ແລະ ກິນເງິນບໍານານ ໄດ້ສູນເສຍເງິນຄ່າຈ້າງເປັນຈໍານວນຫຼວງຫຼາຍ,ແຕ່ບໍ່ສາມາດເອົາເຂົ້າທະຫານ ແລະ ກິນເງິນບໍານານໄດ້; ດັ່ງນັ້ນ,ຈຶ່ງແຕ່ງຕັ້ງເຈົ້າໜ້າທີ່ວິຊາສະເພາະລົງກັກ ຕົວຜູ້ກ່ຽວມາສອບສວນ ໃນວັນທີ28 ທັນວາທີ່ຜ່ານມາ.
ນາງ ຄໍາຈອນ ສາລະພາບວ່າ: ໃນປີ 1997, ໄດ້ເຂົ້າສັງກັດເປັນພະນັກງານລັດ. ຕໍ່ມາໃນລະຫວ່າງປີ 2005-2009, ສາມາດແລ່ນເອົາຄົນເຂົ້າທະຫານ ໄດ້ ໂດຍຮ່ວມກັບປ້າຂອງຕົນເອງ ຈໍານວນ 7-8 ຄົນ; ຕໍ່ມາໃນຊ່ວງປີ 2012, ໄດ້ມີບັນຫາທາງດ້ານການເງິນໃນການໃຊ້ຈ່າຍສ່ວນຕົວ ແລະ ເງິນຈ່າຍຄ່າງວດລົດບໍ່ພຽງພໍ ແລະ ເກີດມີໜີ້ສິນຕາມມາ ຈຶ່ງຄິດຢາກໄດ້ເງິນ ໂດຍໃຊ້ເລ່ລ່ຽມເພື່ອຕົວະຍົວະເຮັດໃຫ້ຄົນອື່ນເຊື່ອໃຈວ່າ ມີໂກຕ້າເຂົ້າກໍາລັງທະຫານ ແລະ ສາມາດແລ່ນໃຫ້ພະນັກງານທະຫານເຂົ້າກິນເງິນບໍານານໄດ້.
ວິທີການຕົວະ ແມ່ນໄດ້ໄປຫາຄົນຮູ້ຈັກທີ່ຕ້ອງ ການໃຫ້ຍາດພີ່ນ້ອງ ເຂົ້າກໍາລັງທະຫານ ຫຼື ແລ່ນກິນເງິນບໍານານ ໃນເມື່ອມີຄົນຫຼົງເຊື່ອ ກໍໄດ້ເອົາຄ່າມັດຈໍາ 3.000.000 – 40.000.000 ກີບ ເພື່ອແລ່ນເອກະສານ ແຕ່ບໍ່ສາມາດແລ່ນເຂົ້າໄດ້ ຈຶ່ງນໍາເງິນທີ່ມັດຈໍາ ໄປໃຊ້ຈ່າຍສ່ວນຕົວ ແລະ ຄອບຄົວຈົນໝົດ.
ຜ່ານມາ, ໄດ້ຕົວະເອົາເງິນ ເພື່ອແລ່ນເຂົ້າກິນເງິນບໍານານຂອງກຳລັງທະຫານໄດ້ 3 ຄັ້ງ ຄື:ຄັ້ງ ທຳອິດ ໄດ້ເອົາເງິນນໍາ ທ້າວ ບຸນຈົ້ງ ຢູ່ບ້ານລາດຮ້ວງ ເມືອງແປກ ແຂວງຊຽງຂວາງ ຈໍານວນ 40.000.000 ກີບ ແຕ່ບໍ່ສາມາດແລ່ນບໍ່ໄດ້ ຈຶ່ງສົ່ງເງິນຄືນຈໍານວນ 5.200.000 ກີບ; ຄັ້ງຕໍ່ມາ, ຕົວະເອົາເງິນນໍານາງ ດອນຄໍາ ຢູ່ບ້ານໂນນສະຫວ່າງ ເມືອງສີໂຄດຕະ ບອງ ນວ ຈໍານວນ16.000.000 ກີບ ເປັນຄ່າແລ່ນ ເຂົ້າກິນບຳນານຂອງກໍາລັງທະຫານ; ຕໍ່ມາ, ໄດ້ເອົາເງິນນໍາ ນາງ ຄໍາເພົາ ຢູ່ບ້ານແສງສະຫວ່າງ ເມືອງໄຊເສດຖາ ນະຄອນຫຼວງວຽງຈັນ 3.000.000 ກີບ ກັບ 4.000 ບາດ ແລ່ນເຂົ້າກິນເງິນບໍານານຂອງກໍາລັງທະຫານ. ນອກນັ້ນ, ຕົວະເອົາເງິນນໍາ ນາງ ສາຍຄໍາ ບ້ານລາດຮ້ວງ ເມືອງແປກ ແຂວງຊຽງຂວາງ ເພື່ອແລ່ນເອົາລູກຊາຍໄປຮຽນຕໍ່, ແລ່ນເອົາຜົວເຂົ້າກິນເງິນບໍານານ ແລະ ເອົາລູກສາວເຂົ້າກໍາລັງທະຫານເປັນເງິນມັດຈໍາ 14.285.000 ກີບ.
ສ່ວນຕົວະເອົາເງິນແລ່ນເຂົ້າສັງກັດເປັນກຳລັງທະຫານແມ່ນ ຈໍານວນ 20 ກວ່າຄັ້ງ ຄື: ໄດ້ຕົວະເອົາເງິນນໍາ ນາງ ດອນ ຢູ່ບ້ານນາຄວາຍໃຕ້ ເມືອງໄຊເສດຖາ ນະຄອນຫຼວງວຽງຈັນ ຈໍານວນ 19.000.000 ກີບ ແລ່ນບໍ່ໄດ້ສົ່ງເງິນຄືນ ຈໍານວນ 9.000.000 ກີບ; ທ້າວ ແພງນະພາ ບ້ານນາຄວາຍໃຕ້ ເມືອງໄຊເສດຖາ ນະຄອນຫຼວງວຽງຈັນ ຈໍານວນ 34.000.000 ກີບ ສົ່ງເງິນຄືນ ຈໍານວນເງິນ 28.400.000 ກີບ;ຈາກນັ້ນ, ກໍໄດ້ໃຊ້ຮູບການເດີມ ເພື່ອຕົວະຍົວະຫຼອກລວງເອົາເງິນນຳປະຊາຊົນທີ່ຕ້ອງການເຂົ້າກຳລັງທະຫານ ໂດຍມີຜູ້ເສຍຫາຍຢູ່ພາຍໃນນະຄອນຫຼວງວຽງຈັນ ແລະ ບັນດາຕ່າງ ແຂວງອີກ ຈໍານວນ 20 ກວ່າຄົນ ລວມເປັນເງິນທັງປະມານ 294.685.000 ກີບ ກັບ 4000 ບາດ.
ໃນປັດຈຸບັນ, ມີຜູ້ທີ່ເຂົ້າມາແຈ້ງຄວາມກັບເຈົ້າ ໜ້າທີ່ແລ້ວ 20 ກວ່າຄົນ ແລະ ຄາດວ່າ ຍັງຈະມີປະຊາຊົນອີກຈໍານວນໜຶ່ງ ທີ່ຈະເຂົ້າມາແຈ້ງຄວາມໃນຮູບການດຽວກັນ. ຈາກການເກັບກໍາຂໍ້ມູນ, ນາງ ຄໍາຈອນ ແມ່ນມີເຈດຕະນາສວຍໂອກາດສໍ້ ໂ ກ ງເອົາຊັບສິນຂອງບຸກຄົນອື່ນແທ້; ເຊິ່ງການກະທໍາດັ່ງກ່າວ ເຮັດໃຫ້ຊັບສິນຂອງບຸກຄົນອື່ນໄດ້ຮັບຄວາມເສຍຫາຍຢ່າງຫຼວງຫຼາຍ ແລະ ເຮັດໃຫ້ສັງ ຄົມບໍ່ມີຄວາມສະຫງົບ. ສະນັ້ນ, ກໍຈະໄດ້ດຳເນີນຄ ະດີ ໄປຕາມຂັ້ນຕອນຂອງກົດໝາຍ.
