ແຫລ່ງຂ່າວຈາກໄຊຍະບູລີ ໃຫ້ຮູ້ວ່າ: ເມື່ອບໍ່ດົນມານີ້, ທ່ານ ບຸນແທນ ທີແກ້ວ ເຈົ້າເມືອງໄຊຍະບູລີ, ພ້ອມດ້ວຍຄະນະ ໄດ້ລົງຊຸກຍູ້ວຽກງານກະສິກຳຢູ່ພາຍໃນເມືອງ ໂດຍສະເພາະແມ່ນລົງຕິດຕາມການປູກເຂົ້ານາແຊງ, ການປູກໝາກຖົ່ວເຫລືອງ ຢູ່ທົ່ງນາລາ ແລະ ທົ່ງນາຫລາ ຂອງບໍລິສັດຫລົງເຊີນ ແລະ ບໍລິສັດລຸຍເຊີນ, ເຊິ່ງໃນປີນີ້ ເມືອງໄຊຍະບູລີ ໄດ້ປູກເຂົ້ານາແຊງໃນເນື້ອທີ່ 130 ເຮັກຕາ, ມາຮອດປະຈຸບັນແມ່ນສຳເລັດ 100%
ສ່ວນການປູກໝາກຖົ່ວເຫລືອງ ມີເນື້ອທີ່ແຜນການທັງໝົດ 432,79 ເຮັກຕາ, ມີ 769 ຄອບຄົວ, ມີເນື້ອທີ່ດິນ 919 ຕອນ ໂດຍມີສອງບໍລິສັດ ຄື: ບໍລິສັດຫລົງເຊີນ ໃນເນື້ອທີ່ 170,49 ເຮັກຕາ ມີທັງ 305 ຄອບຄົວ ມີເນື້ອທີ່ດິນ 339 ຕອນ. ມາຮອດປະຈຸບັນ ການກະກຽມດີນປັ່ນດີນສໍາເລັດ 100% ຍົກໜານສໍາເລັດ 150 ເຮັກຕາ ແລະ ການປູກສໍາເລັດ 90 ເຮັກຕາ ແລະ ບໍລິສັດລຸຍເຊີນ ເຂົ້າມາລົງທຶນຮ່ວມກັບປະຊາຊົນໃນຮູບແບບ 2+3 ໃນເຂດ 3 ໂຄງການໃຫຍ່ຄື: ໄດສູບນໍ້າບ້ານນາລາ ແລະ ຊົນລະປະທານຫ້ວຍແຄ່ນບ້ານນາຫລາ ແລະ ຄອງເໝືອງ 6R ຊົນລະປະທານອ່າງນໍ້າຕຽນ ມີເນື້ອທີ່ການປູກທັງໝົດ 262,30 ເຮັກຕາ, ມີ 464 ຄອບຄົວ, ມີເນື້ອທີ່ດິນ 580 ຕອນ, ການກະກຽມດີນປູກສໍາເລັດ 100% ໄດສູບນໍ້າບ້ານນາລາ, ມີເນື້ອທີ່ທັງໝົດ 42,97 ເຮັກຕາ, ມີ 42 ຄອບຄົວ, ມີເນື້ອທີ່ດິນ 47 ຕອນ ປູກສໍາເລັດ 10 ເຮັກຕາ ໃນນີ້ມີ: ທົ່ງນາແລງ ປູກສໍາເລັດ 10 ເຮັກຕາ, ທົ່ງນາລາ ແມ່ນບໍ່ສາມາດປູກໄດ້ເນື່ອງຈາກນໍ້າບໍ່ພຽງພໍ ໃນເນື້ອທີ 16,80 ເຮັກຕາ, ເຂດບ້ານນາຫລາ ມີເນື້ອທີ່ປູກທັງໝົດ 119,72 ເຮັກຕາ, ມີ 211 ຄອບຄົວ, ມີເນື້ອທີດິນ 244 ຕອນ ໃນນີ້ມີ: ທົ່ງນາຂົມ, ທົ່ງນາຄູນ, ທົ່ງນາດອນ ແລະ ທົ່ງນາຫລວງ.
ມາຮອດປະຈຸບັນແມ່ນປູກສໍາເລັດ 75 ເຮັກຕາ, ທົ່ງນາໄໝ ມີເນື້ອທີ່ 99,61 ເຮັກຕາ, ມີ 211 ຄອບຄົວ, ມີເນື້ອທີ່ດິນ 289 ຕອນ. ມາຮອດປັດຈຸບັນ ແມ່ນສໍາເລັດ 59 ເຮັກຕາ, ສາມາດສ້າງລາຍຮັບໃຫ້ປະຊາຊົນໃນຊ່ວງການກຽມດິນ ແລະ ປູກຖົ່ວເຫລືອງໄດ້ 800 ຄົນຕໍ່ວັນ, ພ້ອມນີ້ບໍລິສັດຍັງໄດ້ເຊົ່າດິນຂອງປະຊາຊົນ 1 ເຮັກຕາຕໍ່ 3 ລ້ານ5ແສນກີບຕໍ່ລະດູການໃນໂອກາດດຽວກັນ, ທ່ານເຈົ້າເມືອງໄຊຍະບູລີ ພ້ອມດ້ວຍຄະນະ ກໍໄດ້ລົງຕິດຕາມກວດກາໂຄງການກໍ່ສ້າງໄດສູບນໍ້າ ບ້ານນາຍາວ ຕື່ມອີກ.
ຂ່າວ-ພາບ: ລັດດາວອນ ແກ້ວໄພທູນ
