ໃນຕອນແລງຂອງວັນທີ 2 ກຸມພາ 2021, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ນາຍົກລັດຖະມົນຕີແຫ່ງ ສປປ ລາວ ໄດ້ສົນທະ ນາທາງໂທລະສັບກັບ ສະຫາຍ ຫງວຽນຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ສະໄໝທີ XIII, ປະທານປະເທດ ແຫ່ງ ສສ ຫວຽດນາມ.

ໃນການສົນທະນາຄັ້ງນີ້, ສະຫາຍເລຂາທິການໃຫຍ່, ນາຍົກລັດຖະມົນຕີ ທອງລຸນ ສີສຸລິດ ໄດ້ສະແດງຄວາມປິຕິຊົມຊື່ນເປັນຢ່າງຍິ່ງ ທີ່ໄດ້ມີໂອກາດສົນທະນາທາງໂທລະສັບກັບ ສະຫາຍ ຫງວຽນຟູຈ້ອງ ທີ່ໄດ້ຖືກເລືອກເປັນເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມອີກສະ ໄໝໜຶ່ງ ພາຍຫລັງທີ່ພັກກອມມູນິດຫວຽດນາມ ຫາກໍສໍາເລັດການດໍາເນີນກອງປະຊຸມໃຫຍ່ຜູ້ແທນທົ່ວປະ ເທດ ຄັ້ງທີ XIII ຂອງຕົນ. ຕາງໜ້າຄະນະບໍລິຫານງານສູນກາງພັກປະຊາຊົນ ປະຕິວັດລາວ, ສະຫາຍ ທອງລຸນ ສີສຸລິດ ໄດ້ສະແດງຄວາມຊົມເຊີຍຢ່າງສຸດອົກສຸດໃຈ ຕໍ່ພັກກອມມູນິດຫວຽດນາມ ທີ່ໄດ້ດໍາເນີນກອງປະຊຸມໃຫຍ່ ຄັ້ງທີ XIII ດ້ວຍຜົນສໍາເລັດອັນຈົບງາມ; ສະແດງຄວາມປິຕິຍິນດີເປັນຢ່າງຍິ່ງ ແລະ ຊົມເຊີຍຢ່າງຈິງໃຈຕໍ່ ສະຫາຍ ຫງວຽນຟູຈ້ອງ ສືບຕໍ່ໄດ້ຮັບຕໍ່າແໜ່ງສູງສຸດຂອງພັກ ເຊິ່ງເປັນການສະແດງເຖິງຄວາມໄວ້ເນື້ອເຊື່ອໃຈ ແລະ ການຕີລາຄາສູງຂອງທົ່ວພັກ, ລັດ ແລະ ປະຊາຊົນຫວຽດນາມ ຕໍ່ບົດບາດອັນພົ້ນເດັ່ນພຽບພ້ອມໄປດ້ວຍບົດຮຽນ ແລະ ປະສົບການໃນການຊີ້ນໍາ-ນໍາພາ ໃນຖານະເປັນເລ ຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ຕະຫລອດໄລຍະທີ່ຜ່ານມາ.

May be an image of 2 people and people standing

ກອງປະຊຸມໃຫຍ່ຜູ້ແທນທົ່ວປະເທດຄັ້ງ XIII ຂອງພັກກອມມູນິດຫວຽດນາມ ເປັນເຫດການການ ເມືອງທີ່ສໍາຄັນຂອງທົ່ວພັກ, ລັດ ແລະ ປະຊາຊົນຫວຽດນາມ, ເປັນຂີດໝາຍແຫ່ງການພັດທະນາທີ່ເຂັ້ມ ແຂງຂອງການປະຕິວັດຫວຽດນາມ ໃນໄລຍະໃໝ່ຕາມທິດສາມັກຄີ, ປະຊາທິປະໄຕ, ເດັດດ່ຽວ, ປະດິດສ້າງ, ພັດທະນາດ້ວຍການສືບຕໍ່ເພີ່ມທະວີການກໍ່ສ້າງ, ປັບປຸງພັກ ແລະ ລະບອບການເມືອງໃຫ້ປອດໃສ, ເຂັ້ມແຂງ; ເສີມຂະຫຍາຍຄວາມມຸ້ງຫວັງໃນການພັດທະນາປະເທດຊາດ, ເສີມຂະຫຍາຍມານະຈິດປະຕິ ວັດ, ເຫງົ້າພະລັງແຫ່ງມະຫາສາມັກຄີທົ່ວທັງຊາດ ໄປຄຽງຄູ່ກັບການສົມທົບແໜ້ນກັບກໍາລັງແຮງຂອງຍຸກສະໄໝ; ສືບຕໍ່ຊຸກຍູ້ພາລະກິດປ່ຽນແປງໃໝ່ຢ່າງຮອບດ້ານເປັນລະບົບ; ສ້າງສາ ແລະ ປົກປັກຮັກສາປະ ເທດຊາດໃຫ້ໜັກແໜ້ນ; ຮັກສາສະພາບແວດລ້ອມສັນຕິພາບ, ສະຖຽນລະພາບ; ສູ້ຊົນເພື່ອໃຫ້ປະເທດກາຍເປັນປະເທດພັດທະນາຕາມທິດສັງຄົມນິຍົມ ໃນກາງສະຕະວັດທີ 21.

ພ້ອມທັງສະແດງຄວາມເຊື່ອໝັ້ນຢ່າງໝັກແໜ້ນວ່າ ພາຍໃຕ້ການນໍາພາອັນສະຫລາດສ່ອງໃສ, ຖືກ ຕ້ອງ ແລະ ປະດິດສ້າງຂອງພັກກອມມູນິດຫວຽດນາມ ໂດຍມີ ສະຫາຍ ຫງວຽນຟູຈ້ອງ ເປັນເລຂາທິ ການໃຫຍ່, ປະຊາຊົນຫວຽດນາມອ້າຍນ້ອງ ຈະສືບຕໍ່ຍາດໄດ້ຜົນສໍາເລັດໃໝ່, ໃຫຍ່ຫລວງກວ່າເກົ່າໃນພາລະກິດປ່ຽນແປງໃໝ່, ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກ ບັນລຸຕາມເປົ້າໝາຍທີ່ວາງໄວ້ຢ່າງມີໄຊ.

ສະຫາຍ ທອງລຸນ ສີສຸລິດ ຍັງໄດ້ຖືໂອກາດນີ້ ສົ່ງຄວາມອວຍພອນໄຊອັນປະເສີດໄປຍັງ ຄະນະບໍລິຫານງານສູນກາງພັກ, ສະມາຊິກພັກ ແລະ ປະຊາຊົນຫວຽດນາມອ້າຍນ້ອງ ເນື່ອງໃນໂອກາດວັນສ້າງ ຕັ້ງພັກກອມມູນິດ ຫວຽດນາມ ຄົບຮອບ 91 ປີ (3/2/1930-3/2/2021).

ສະຫາຍ ຫງວຽນ ຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດ ນາມ, ປະທານປະເທດ ແຫ່ງ ສສ ຫວຽດນາມ ໄດ້ສະແດງຄວາມຂອບໃຈຕໍ່ ສະຫາຍເລຂາທິການໃຫຍ່, ນາຍົກລັດຖະມົນຕີ ທອງລຸນ ສີສຸລິດ ທີ່ໄດ້ສະແດງຄວາມຊົມເຊີຍຜົນສໍາເລັດຂອງ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XIII ຂອງພັກກອມມູນິດຫວຽດນາມ, ອວຍພອນເນື່ອງໃນໂອກາດ ວັນສ້າງຕັ້ງພັກກອມມູນິດຫວຽດນາມ ຄົບຮອບ 91 ປີ ແລະ ໃນໂອກາດທີ່ໄດ້ຮັບເລືອກຕັ້ງເປັນເລຂາທິການໃຫຍ່ ຄະນະບໍລິຫານງານສູນກາງພັກກອມູນິດຫວຽດນາມ ສະໄໝທີ XIII; ສະແດງຄວາມຂອບໃຈຕໍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ບັນດາຄະນະຂອງສູນກາງພັກ; ບັນດາກະຊວງ, ຂະແໜງການ, ແນວລາວສ້າງຊາດ, ບັນດາອົງການຈັດຕັ້ງມະຫາຊົນ ແລະ ສະມາຄົມ ທີ່ໄດ້ສົ່ງໂທລະເລກ, ຈົດ ໝາຍອວຍພອນເຖິງຄູ່ຮ່ວມຕໍາແໜ່ງຂອງຫວຽດນາມ, ສິ່ງດັ່ງກ່າວເປັນການສະແດງເຖິງຄວາມມີຊີວິດຊີວາແຫ່ງ ສາຍພົວພັນສາມັກຄີພິເສດ ຫວຽດນາມ-ລາວ, ປະກອບສ່ວນເຂົ້າໃນຜົນສໍາເລັດລວມຂອງກອງປະ ຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ.

ສະຫາຍ ເລຂາທິການໃຫຍ່, ປະທານປະເທດ ຫງວຽນ ຟູຈ້ອງ ໄດ້ແຈ້ງໃຫ້ຊາບກ່ຽວກັບຜົນສໍາເລັດຂອງກອງປະຊຸມໃຫຍ່ ຄັ້ງທີ XIII ເຊິ່ງເປັນຂີດໝາຍສໍາຄັນແຫ່ງການເຕີບໃຫຍ່ຂອງພັກ ແລະ ການພັດທະນາຂອງປະເທດຊາດຫວຽດນາມ, ກອງປະຊຸມໃຫຍ່ ໄດ້ກໍານົດທິດທາງ ແລະ ວິໄສທັດຍຸດທະສາດ ທັງສະເພາະໜ້າ ແລະ ຍາວນານ ໃຫ້ແກ່ການສ້າງສາພັດທະນາປະເທດຊາດຫວຽດນາມ ຕາມທິດສັງຄົມນິຍົມ; ສະແດງຄວາມຊົມເຊີຍ ຕໍ່ຜົນສໍາເລັດ ທີ່ ສປປ ລາວ ຍາດມາໄດ້ຕະຫລອດໄລຍະທີ່ຜ່ານມາ ແລະ ເຊື່ອໝັ້ນວ່າ ພາຍໃຕ້ການນໍາພາອັນສະຫລາດສ່ອງໄສຂອງພັກປະຊາຊົນ ປະຕິວັດລາວ ໂດຍມີ ສະຫາຍ ທອງລຸນ ສີສຸລິດ ເປັນເລຂາທິການໃຫຍ່, ປະຊາຊົນລາວຈະສືບຕໍ່ຍາດໄດ້ຜົນສໍາເລັດໃໝ່, ໃຫຍ່ຫລວງກວ່າເກົ່າໃນພາລະກິດປ່ຽນແປງໃໝ່, ປົກປັກຮັກສາ ແລະ ສ້າງສາພັດທະນາປະເທດຊາດ, ຈັດຕັ້ງປະຕິ ບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ສໍາເລັດຜົນຢ່າງມີໄຊ; ຢືນຢັນວ່າ ສສ ຫວຽດນາມ ຈະສະໜັບສະໜູນຢ່າງແຂງແຮງ ແລະ ຮອບດ້ານ ຕໍ່ພາລະກິດປ່ຽນແປງໃໝ່, ປົກປັກຮັກສາ ແລະ ສ້າງສາພັດ ທະນາປະເທດ ສປປ ລາວ.

ເລຂາທິການໃຫຍ່ທັງສອງ ໄດ້ສະແດງຄວາມປິຕິຍິນດີ ຕໍ່ສາຍພົວພັນພິເສດ ລະຫວ່າງ ລາວ-ຫວຽດນາມ ແລະ ຫວຽດນາມ-ລາວ ທີ່ນັບມື້ໄດ້ຮັບການເສີມຂະຫຍາຍທັງທາງກວ້າງ ແລະ ເລິກເຊິ່ງ, ໄດ້ຢືນຢັນວ່າ ເຖິງວ່າສະພາບການພາກພື້ນ ແລະ ໂລກ ຈະມີການຜັນແປໄປແນວໃດກໍຕາມ, ສອງພັກ, ສອງລັດ ຈະສືບຕໍ່ພ້ອມກັນປົກປັກຮັກສາ, ຖະນຸຖະໜອມ ແລະ ເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ແລະ ຫວຽດ ນາມ-ລາວ ທີ່ການນໍາຮຸ່ນກໍ່ຕັ້ງໄດ້ສ້າງ ແລະ ຖະນຸຖະໜອມມານັ້ນ ໃຫ້ນັບມື້ແຕກດອກອອກຜົນແລະ ມີປະສິດທິຜົນຍິ່ງໆຂຶ້ນ ແລະ ສືບທອດໃຫ້ຮຸ່ນຄົນໝຸ່ມຕໍ່ໄປ.

ສະຫາຍ ເລຂາທິການໃຫຍ່, ນາຍົກລັດຖະມົນຕີ ທອງລຸນ ສີສຸລິດ ໄດ້ເຊື້ອເຊີນ ສະຫາຍເລຂາ ທິການໃຫຍ່, ປະທານປະເທດ ຫງວຽນ ຟູຈ້ອງ ຊັບຊ້ອນເວລາຢ້ຽມຢາມ ສປປ ລາວ ໃນຕໍ່ໜ້າ ແລະ ສະຫາຍເລຂາທິການໃຫຍ່, ປະທານປະເທດ ຫງວຽນ ຟູຈ້ອງ ກໍໄດ້ເຊື້ອເຊີນ ສະຫາຍເລຂາທິການໃຫຍ່, ນາຍົກລັດຖະມົນຕີ ທອງລຸນ ສີສຸລິດ ຢ້ຽມຢາມ ສສ ຫວຽດນາມ ໃນເວລາທີ່ເໝາະສົມ ແລະ ເນື່ອງໃນໂອກາດ ປີໃໝ່ປະຈໍາຊາດຫວຽດນາມ, ສະຫາຍເລຂາທິການໃຫຍ່, ນາຍົກລັດຖະມົນຕີ ທອງລຸນ ສີສຸລິດ ໄດ້ສົ່ງຄວາມອວຍພອນໄຊອັນປະເສີດໄປຍັງ ສະຫາຍເລຂາທິການໃຫຍ່, ປະທານປະເທດ ຫງວຽນ ຟູຈ້ອງ, ບັນດາສະຫາຍການນໍາຂັ້ນສູງ ພັກ, ລັດ ແລະ ປະຊາຊົນຫວຽດນາມອ້າຍນ້ອງທຸກຖ້ວນໜ້າ.

ພາບ: ຂັນໄຊ

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here