ແຫລ່ງຂ່າວຈາກແຂວງສາລະວັນ ໃຫ້ຮູ້ວ່າ: ວັນທີ 26 ມັງກອນນີ້, ຢູ່ທີ່ວັດໂພສີສຸວັນນະຣາມ, ບ້ານສະນຶມນອກ ເມືອງເລົ່າງາມ ແຂວງສາລະວັນ ໄດ້ມີພິທີຫລໍ່ພະພຸດທະຮູບ ທອງເຫລືອງ ປາງໄຊຊະນະມານ 1 ອົງ ເພື່ອຕົວແທນຂອງອົງພະສັມມາສັມພຸດທະເຈົ້າ ເພື່ອໃຫ້ພຸດທະສາຊະນິກະຊົນ ໄດ້ກາບໄຫວ້ສັກກະລະບູຊາ ແລະ ທັງເປັນການປະຕິສັງຂອນວັດວາອາຣາມ, ສືບທອດປົກປັກຮັກສາຮີດຄອງປະເພນີຂອງພຸດທະສາສະໜາ ໃຫ້ຍືນຍົງຕະຫລອດໄປ. ເຂົ້າຮ່ວມໃນພິທີຄັ້ງນີ້ ມີ ພະຫລັກຄຳຣັດຕະນະຄຸນາຈານ ຍາທ່ານໃຫຍ່ ສອນໄຊ ແກ້ວເມືອງໃຕ້ ເຈົ້າຄະນະແຂວງສາລະວັນ, ທ່ານ ໂພໄຊ ໄຊຍະສອນ ເຈົ້າແຂວງສາລະວັນ, ມີການນຳຂັ້ນແຂວງ, ການນໍາຂັ້ນເມືອງ, ພຸດທະສານິກະຊົນ ແລະ ພາກສ່ວນກ່ຽວຂ້ອງ ເຂົ້າຮ່ວມ.

Image may contain: one or more people, people standing and outdoor

ພະອາຈານ ພອນສະຫວັນ ທອງມະນີນິນ ຮອງເຈົ້າຄະນະເມືອງເລົ່າງາມ ເຈົ້າອະທິການວັດໂພສີສຸວັນນະຣາມ ບ້ານສະນຶມນອກ ໄດ້ໃຫ້ຮູ້ວ່າ: ການລົງມືສ້າງພະພຸດທະຮູບ ປາງໄຊຊະມານ ຄັ້ງນີ້ ໄດ້ເລີ່ມມາແຕ່ວັນທີ 22 ມັງກອນ 2021 ຄາດຈະໃຫ້ສໍາເລັດ 100% ໃນອີກ 3 ເດືອນຕໍ່ໜ້າ, ເຊິ່ງອົງພະພຸດທະຮູບມີນໍ້າໜັກ 3 ໂຕນ, ໜ້າຕັກກວ້າງ 2,54 ແມັດ, ສູງເກືອບ 4 ແມັດ ເປັນພະພຸດທະຮູບ ທີ່ມີມາດຕະຖານ, ຖືກຕ້ອງຕາມສິລະປະເອກະລັກຂອງຊາວລາວ. ພະພຸດທະຮູບ ປາງໄຊຊະນະມານ ເປັນພະຈັດຢູ່ໃນອະຣິຍະບົດ ນັ່ງສະມາທິ ມືຂ້າງຊ້າຍວາງໄວ້ເທິງໜ້າຕັກ, ມືຂ້າງຂວາ ຂວໍ້າລົງທີ່ຫົວເຂົ່າ ແລະ ນີ້ວມືຊີ້ລົງພື້ນທໍລະນີ (ແຜ່ນດິນ), ໂດຍໄດ້ກຳນົດເອົາອະຣິຍະບົດ ຕອນພຣະອົງ ຊົງຊະນະມານ.

Image may contain: 2 people, people standing and outdoor

ສໍາລັບທຶນໃນການກໍ່ສ້າງ ແມ່ນໄດ້ຮັບຈາກການປະກອບສ່ວນຂອງ ພຸດທະສາຊະນິກະຊົນ, ສິດ-ສານຸສິດ ຫລາຍພາກສ່ວນໃນທົ່ວສັງຄົມ, ການເທທອງເຫລືອງປະສົມຄຳ ຫລໍ່ພະພຸດທະຮູບ ປາງໄຊຊະນະມານ ອົງນີ້ ແມ່ນໄດ້ມີການປັບປຸງ, ຮູບແບບຕາມລັກສະນະຂອງພະພຸດທະຮູບ ຢູ່ໃນແຂວງສາລະວັນ ເພື່ອໃຫ້ເປັນເອກະລັກສະເພາະ ໂດຍແມ່ນທີມງານໂຮງຫລໍ່ພະມໍລະດົກສິລະປະລາວ ເປັນຜູ້ດຳເນີນການຫລໍ່.

Image may contain: one or more people, people standing and outdoor

.

Image may contain: 2 people, people standing, people on stage, sky and outdoor

ຂ່າວ-ພາບ: ວິໄລວອນ ສິດທິໄຊ

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here