ກອງພັນປ້ອງກັນເຄື່ຶຶອນທີ່ ນວ ຕ້ອງເພີ່ມທະວີ 5 ວຽກງານສໍາຄັນ

ພັອ ຈັນຫອມ ແກ້ວສຸລະໄຊ ຮອງຫົວໜ້າກອງບັນຊາການ ປກສ ນະຄອນຫຼວງວຽງຈັນ ໄດ້ກ່າວໃນກອງປະຊຸມສະຫຼຸບວຽກງານປະຈໍາປີ 2020 ແລະ ວາງທິດທາງແຜນການປະຈໍາປີ 2021 ຂອງກອງພັນປ້ອງກັນເຄື່ອນທີ່ ປກສ ນະຄອນຫຼວງວຽງຈັນ ວ່າ: ໃນປີ 2021 ຄະນະພັກ-ຄະນະບັນຊາ ກອງພັນປ້ອງກັນເຄື່ອນທີ່ ປກສ ນວ

ຕ້ອງເພີ່ມທະວີ 5 ວຽກງານສໍາຄັນຄື:

1 ເອົາໃຈໃສ່ເຊື່ອມຊືມບັນດາມະຕິຄໍາສັ່ງທີ່ສໍາຄັນຕ່າງໆຂອງພັກ-ຂອງຊາດ ໃຫ້ພະນັກງານ-ນັກຮົບ ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີແນວຄິດອຸ່ນອ່ຽນ, ທຸ່ນທ່ຽນ, ມີສະຕິຕໍ່ການຈັດຕັ້ງ ແລະ ປະຕິບັດລະບຽບວິໄນຢ່າງເຂັ້ມງວດ

2 ສືບຕໍ່ປະສານສົບທົບກັບພາກສ່ວນທີ່ກ່ຽວຂ້ອງ ແກ້ໄຂເປົ້າໝາຍປະເພດຕ່າງໆໃນສັງຄົມ ກໍຄືໃນ ນວ ໃຫ້ຫຼຸດລົງ, ເອົາໃຈໃສ່ຝຶກແອບກໍາລັງວິຊາສະເພາະໃຫ້ເຂັ້ມແຂງ ກຽມພ້ອມສູ້ຮົບຕະຫຼອດເວລາ ແລະ ເພີ່ມທະວີໃນການປ້ອງກັນສໍານັກງານ, ອົງການຕ່າງໆ ໃຫ້ມີຄວາມປອດໄພຫຼາຍຂຶ້ນກວ່າເກົ່າ

3. ປັບປຸງແບບແຜນວິທີເຮັດວຽກໃນແຕ່ລະຂັ້ນໃຫ້ມີຄຸນນະພາບ, ມີຄວາມເປັນເອກະພາບ, ກ້າຕັດສິນໃຈ, ກ້າເຮັດ, ກ້າຮັບຜິດຊອບ

4. ສືບຕໍ່ສ້າງເສດຖະກິດໃຫ້ກອງພັນປ້ອງກັນເຄື່ອນທີ່ ສາມາດກຸ້ມຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ

5. ເພີ່ມທະວີຄວາມສາມັກຄີພາຍໃນ-ພາຍນອກ ອ້ອມຂ້າງ ໃຫ້ມີຄວາມແໜ້ນແຟ້ນຍິ່ງໆຂຶ້ນ.

ໃນກອງປະຊຸມ ພັທ ຄໍາຜາຍ ພົມມະຈິດ ຮອງຫົວໜ້າກອງພັນປ້ອງກັນເຄື່ອນທີ່ ປກສ ນວ ໄດ້ຂຶ້ນຜ່ານບົດສະຫຼຸບປະຈໍາປີ 2020 ແລະ ວາງທິດທາງແຜນການປີ 2021 ວ່າ: ໃນ 1 ປີຜ່ານມາ ກອງພັນປ້ອງກັນເຄື່ອນທີ່ ກອງບັນຊາການ ປກສ ນວ ໄດ້ເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດ ໃຫ້ພະນັກງານ-ນັກຮົບຢ່າງເປັນປົກກະຕິ, ມີສະຕິຕໍ່ການຈັດຕັ້ງ, ມີລະບຽບວິໄນເຂັ້ມງວດ ແລະ ໄດ້ເຄື່ອນໄຫວວຽກງານວິຊາສະເພາະຢ່າງຕັ້ງໜ້າ ໂດຍໄດ້ແຕ່ງຕັ້ງຈຸປະຈໍາການຄອຍເຫດຕະຫຼອດ 24 ຊົ່ວໂມງ, ໃນນີ້ ໄດ້ປ້ອງກັນການກໍ່ສ້າງເສັ້ນທາງລົດໄຟລາວ-ຈີນ 3 ຈຸດຄື: ຈຸດບ້ານນາຄູນນ້ອຍ, ຈຸດບ້ານແຈ້ງສະຫວ່າງ, ຈຸດບ້ານດົງຊຽງດີ, ປ້ອງກັນສໍານັກງານອົງການພາກລັດ ແລະ ເອກະຊົນ ແລະ ຫົວໜ່ວຍທຸລະກິດ ຈໍານວນ 44 ຈຸດ, ຕິດຕາມຂຶ້ນບັນຊີກຸ່ມແກ້ງຂີ່ລົດກວນເມືອງໄດ້ທັງໝົດ 18 ກຸ່ມ, ໄດ້ລົງກວດກາຮ້ານບັນເທີງຄາລາໂອເກະ ແລະ ເຮັດບົດບັນທຶກສຶກສາອົບຮົມບັນດາຫ້າງຮ້ານ 50 ຮ້ານ ແລະ ໄດ້ສົມທົບທຸກເລົ່າຮົບອອກແກ້ໄຂກຸ່ມແກ້ງກວນເມືອງ, ນັກເລງອັນຕະພານທຸກປະກົດການຫຍໍ້ທໍ້ຢູ່ໃນ ນວ ສາມາດກັກລົດຈັກໄດ້ທັງໝົດ 275 ຄັນ, ລົດດັດແປງສະພາບເຕັກນິກ 160 ຄັນ, ກັກໄດ້ຈາກກຸ່ມແກ້ງຂີ່ລົດກວນເມືອງ 115 ຄັນ, ລົດບໍ່ຕິດປ້າຍທະບຽນ 64 ຄັນ ແລະ ມອບລົດຄືນໃຫ້ເຈົ້າຂອງຈໍານວນ 248 ຄັນ, ນອກຈາກນີ້ ໄດ້ສຶກສາອົບຮົມກຸ່ມແກ້ງຂີ່ລົດກວນເມືອງ ຈໍານວນ 194 ຄົນ, ຍິງ 59 ຄົນ ແລະ ໄດ້ປະສານສົມທົບກັບພາກສ່ວນທີ່ກ່ຽວຂ້ອງ ແກ້ໄຂເປົ້າໝາຍປະເພດຕ່າງໆໄດ້ 68 ຄົນ, ໃນນີ້ ເປັນຄົນຕ່າງປະເທດ 3 ຄົນ, ພ້ອມຢືດຂອງກາງຢາບ້າໄດ້ 145.387 ເມັດ, ລົດຈັກ 6 ຄັນ, ງ້າວ 6 ດວງ ແລະ ອຸປະກອນເສບຢາເສບຕິດຈໍານວນໜື່ງ.

ກອງປະຊຸມດັ່ງກ່າວ, ໄດ້ຈັດຂຶ້ນໃນຕອນເຊົ້າວັນທີ 26 ມັງກອນ 2021, ຢູ່ຫ້ອງປະຊຸມກອງພັນປ້ອງກັນເຄື່ອນທີ່ ປກສ ນວ ໂດຍການເປັນປະທານຂອງ ພັທ ບຸນຖົມ ແກ້ວມະນີວົງ ຫົວໜ້າກອງພັນປ້ອງກັນເຄື່ອນທີ່ ປກສ ນວ, ມີບັນດາຄະນະພັກ-ຄະນະບັນຊາ , ພະນັກງານຫຼັກແຫຼ່ງ ແລະ ແຂກຖືກເຊີນ ເຂົ້າຮ່ວມຈໍານວນ 72 ຄົນ, ຍິງ 9 ຄົນ.