ໃນວັນທີ 23-24 ມັງກອນ 2021 ທ່ານ ຄຳຮຸ່ງເຮືອງວົງສີ ປະທານອົງການກາແດງລາວ ໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງອັດຕະປື, ພ້ອມໄດ້ນໍາເອົາເຄື່ອງຊ່ວຍເຫລືອບັນເທົາທຸກເພື່ອຕ້ານໄພໜາວຈຳນວນໜຶ່ງ ໄປມອບໃຫ້ປະຊາຊົນ ບ້ານວັງຕັດນ້ອຍ ເມືອງຊານໄຊ ແຂວງ ອັດຕະປື ຈຳນວນ 124 ຄອບຄົວ, 539 ຄົນ, ຍິງ 258 ຄົນ, ເຊິ່ງອາໄສຢູ່ເຂດຫ່າງໄກສອກຫລີກເທິງພູດອຍ. ເຄື່ອງທີ່ມາຊ່ວຍເຫລືອໃນຄັ້ງນີ້, ປະກອບມີ: ຜ້າຫົ່ມ, ເຄື່ອງນຸ່ງຫົ່ມປະສົມ, ເຄື່ອງອຸປະໂພກ ແລະ ເຄື່ອງສຸຂະອະນາໄມ ລວມມູນຄ່າປະມານ 26 ລ້ານກວ່າກີບ, ໂດຍມີອຳນາດການປົກຄອງບ້ານ, ກາແດງແຂວງ, ພໍ່ແມ່ປະຊາຊົນເຂົ້າຮ່ວມ, ໂດຍໄດ້ຮັບການສະໜັບສະໜູນຈາກສັງຄົມພາຍໃນນະຄອນຫລວງວຽງຈັນ, ກາແດງລາວ ແລະ ບໍລິສັດ ສິຮິກິດການຄ້າ.
ໂອກາດດັ່ງກ່າວ, ທ່ານປະທານອົງການກາແດງລາວ ກໍໄດ້ແນະນຳພໍ່ແມ່ປະຊາຊົນ ຈົ່ງຕັ້ງໜ້າສ້າງສາພັດທະນາ, ທຳການຜະລິດເພື່ອໃຫ້ຄອບຄົວຂອງຕົນຫລຸດພົ້ນ ອອກຈາກຄວາມທຸກຍາກ ແລະ ຫວັງວ່າ ເຄື່ອງທີ່ນຳມາມອບໃຫ້ພໍ່ແມ່ປະຊາຊົນໃນຄັ້ງນີ້ ຈະໄດ້ເອົາໄປນຳໃຊ້ໃນຊີວິດປະຈຳວັນ, ໂດຍສະເພາະກໍແມ່ນໃນໄລຍະລະດູໜາວນີ້.
