ເຊກອງ ປະກາດແຕ່ງຕັ້ງຜູ້ພິພາກຊັ້ນ I ສານປະຊາຊົນແຂວງ

ພິທີປະກາດແຕ່ງຕັ້ງ ຜູ້ພິພາກສາຊັ້ນ I ຂອງ ສານປະຊາຊົນ ແຂວງເຊກອງ ໄດ້ຈັດຂຶ້ນໃນວັນທີ 25 ມັງກອນ 2021ນີ້ ທີ່ສະໂມສອນເມືອງລະມາມ ໂດຍໃຫ້ກຽດເຂົ້າຮ່ວມຂອງທ່ານ ຄໍາພາ ແສງດາລາ ປະທານສານປະຊາຊົນສູງສຸດ, ມີທ່ານ ດົງເພັດ ພະຍົນ ຮອງເລຂາພັກແຂວງ, ຮອງປະທານສະພາປະຊາຊົນແຂວງ, ມີກົມຈັດຕັ້ງສານປະຊາຊົນສູງສຸດ ພ້ອມນີ້ຍັງມີປະທານ ແລະພະນັກງານສານປະຊາຊົນແຂວງ, ສານປະຊາຊົນເຂດ I, ພ້ອມດ້ວຍແຂກຖືກເຊີນ ເຂົ້າຮ່ວມ.

ທ່ານ ຄໍາພົນ ແກ້ວ ປະເສີດ ຮອງປະທານສວານປະຊາຊົນແຂວງເຊກອງ ໄດ້ສະລຸບຕີລາຄາການເຄື່ອນໄຫວວຽກງານຂອງສານປະຊາຊົນແຂວງ ແລະສານປະຊາຊົນເຂດ I ໃນໄລຍະ 1 ປີຜ່ານມາ ຊຶ່ງຄະນະນໍາ ໄດ້ເອົາໃຈໃສ່ຊຸກຍູ້ໃຫ້ພະນັກງານຜູ້ພິພາກສາ, ຜູ້ຊ່ວຍຜູ້ພິພາກສາ, ຈ່າສານ ແລະພະນັກງານວິຊາການຄົ້ນຄວ້າ ແລະແກ້ໄຂຄະດີຕ່າງໆຢ່າງມີຄວາມຮັບຜິດຊອບສູງ ເປັນຕົ້ນແມ່ນການເກັບກໍາຂໍ້ມູນ, ລັກຖານຕ່າງໆຕ້ອງໃຫ້ຄົບຖ້ວນ, ຮອບດ້ານ ແລະພາວະວິໄສ, ການຕັດສິນຄະດີ ຕ້ອງຮັບປະກັນໂປ່ງໄສ, ວ່ອງໄວ ແລະຍຸຕິທໍາ.

ທ່ານ ນາງ ປະພອນຈິດ ຈັນທະຈັກ ຮອງຫົວໜ້າກົມຈັດຕັ້ງພະນັກງານສານປະຊາຊົນສູງສຸດ ໃຫ້ກຽດຜ່ານມະຕິຕົກລົງຂອງຄະນະປະຈຳສະພາແຫ່ງຊາດ, ສະບັບເລກທີ 203 ແລະ 204/ຄປຈ, ລົງວັນທີ 10 ພະຈິກ 2020 ວ່າດ້ວຍການແຕ່ງຕັ້ງຜູ້ພິພາກສາຊັ້ນ I , ໂດຍເຫັນດີແຕ່ງຕັ້ງ ທ່ານ ຄຳເປີຍ ເທວີບຸນຍັງ ຜູ້ຊ່ວຍຜູ້ພິພາກສາ ແລະເຫັນດີແຕ່ງຕັ້ງ ທ່ານ ໄພວັນ ຂຸນບັນດິດ ຜູ້ຊ່ວຍຜູ້ພິພາກສາ ເປັນຜູ້ພິພາກສາຊັ້ນ I ສານປະຊາຊົນແຂວງເຊກອງ ເພື່ອພ້ອມກັນສືບຕໍ່ປະຕິບັດໜ້າທີ່ວຽກໃນຂົງເຂດປົກປ້ອງກົດໝາຍໃຫ້ມີຄວາມຖືກຕ້ອງ, ເປັນທຳ ເພື່ອຮັບໃຊ້ປະຊາຊົນຢ່າງເລິກເຊິ່ງ, ໂດຍໃນໄລຍະຜ່ານມາທັງສອງສະຫາຍໄດ້ມີຄວາມບຸກບືນຫ້າວຫັນໃນການຈັດຕັ້ງປະຕິບັດໜ້າທີ່ວຽກງານຕາມການມອບໝາຍຢ່າງມີຜົນສຳເລັດ ຈົນໄດ້ຮັບຄວາມໄວ້ເນື້ອເຊື່ອໃຈຈາກຄະພັກຂັ້ນເທິງໃນທຸກຂັ້ນ.

ໃນໂອກາດນີ້ ທ່ານ ຄຳພາ ແສງດາລາ ປະທານສານປະຊາຊົນສູງສຸດ ຍັງໃຫ້ກຽດປະດັບທະນູບ່າແລະສວມຊຸດຜູ້ພິສາ ໃຫ້ຜູ້ທີ່ໄດ້ຮັບການແຕ່ງຕັ້ງໃຫ່ມ ຢ່າງສົມກຽດ ເພື່ອຢັ້ງຢືນເຖິງໜ້າທີ່ ແລະຄວາມຮັບຜິດຊອບອັນສູງສົ່ງ ເພື່ອເຮັດສຳເລັດໜ້າທີ່ຕາມການມອບໝາຍໃນຕໍ່ໜ້າ, ພ້ອມນີ້ທ່ານຍັງໄດ້ເນັ້ນໜັກໃຫ້ບັນດາຜູ້ພິພາກສາຜູ້ເກົ່າແລະຜູ້ໃຫມ່ ຈົ່ງພ້ອມກັນສືບຕໍ່ສຶກສາອົບຮົມການເມືອງແນວຄິດໃຫ້ຖັນແຖວພະນັກງານຢ່າງເປັນປົກກະຕິ, ເອົາໃຈໃສ່ຕັດສິນພິພາກສາຄະດີໃຫ້ຖືກຕ້ອງ, ວ່ອງໄວ, ສອດຄ່ອງ ແລະເປັນທໍາ, ພັດທະນາອົງການຈັດຕັ້ງໃຫ້ເຂັ້ມແຂງ ພ້ອມທັງປະຕິບັດແຜນງານຂອງສານປະຊາຊົນແຂວງໃຫ້ເຂົ້າສູ່ລວງເລິກ, ເອົາໃຈໃສ່ຕ້ານ ແລະສະກັດກັ້ນຄະດີການຟອກເງິນໃຫ້ໄດ້ຢ່າງເຂັ້ມງວດ; ເອົາໃຈໃສ່ພິຈາລະນາຕັດສິນຄະດີໃຫ້ເລິກເຊິ່ງ ເພື່ອຮັບປະກັນໄດ້ຄວາມຖືກຕ້ອງແລະເປັນທຳ, ເອົາໃຈໃສ່ຝຶກຝົນຫຼໍ່ຫຼອມຕົນເອງໃຫ້ເຂັ້ມແຂງໃນທຸກດ້ານ, ເອົາໃຈໃສ່ປະສານສົມທົບກັນໃນວຽກງານສານປະຊາຊົນຢ່າງເລິກເຊິ່ງ ແນໃສ່ພ້ອມກັນພັດທະນາວຽກງານໃນຂົງເຂດປົກປ້ອງກົດໝາຍໃຫ້ນັບມື້ເຕີບໃຫຍ່, ເຂັ້ມແຂງແລະໜັກແໜ້ນຂຶ້ນເລື້ອຍໆ.

ໂດຍ:ພຸດທະສອນ