ແຕ່ງຕັ້ງ ທ່ານ ວຽງທອງ ຫັດສະຈັນ ຂຶ້ນເປັນເຈົ້ານະຄອນ-ຫຼວງພະບາງ ຜູ້ໃໝ່

ແຫລ່ງຂ່າວຈາກແຂວງຫລວງພະບາງ ໃຫ້ຮູ້ວ່າ: ພິທີ ມອບ-ຮັບໜ້າທີ່ ເລຂາພັກ, ເຈົ້ານະຄອນ-ຫລວງພະບາງ ລະຫວ່າງ ທ່ານ ຈັນສຸກ ພັນໂດລັດ ເລຂາຄະນະພັກ, ເຈົ້ານະຄອນ-ຫລວງພະບາງ ຜູ້ເກົ່າ(ພັກຜ່ອນລໍຖ້າຮັບອຸດໜູນບຳນານ) ແລະ ທ່ານ ວຽງທອງ ຫັດສະຈັນ ກຳມະການປະຈຳພັກແຂວງ ເປັນເລຂາຄະນະພັກ, ເຈົ້ານະຄອນ-ຫລວງພະບາງ ຜູ້ໃໝ່ ໃນວັນທີ 21 ມັງກອນ 2021 ໂດຍເປັນປະທານຂອງ ທ່ານ ຄໍາຂັນ ຈັນທະວີສຸກ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫລວງພະບາງ, ມີຄະນະປະຈຳພັກແຂວງ, ກຳມະການພັກແຂວງ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ຄໍາຂັນ ຈັນທະວີສຸກ ກໍໄດ້ມີຄໍາເຫັນເນັ້ນໜັກໃຫ້ເຈົ້ານະຄອນຜູ້ໃໝ່ ຈົ່ງສືບຕໍ່ຮັກສາມູນເຊື້ອທີ່ຜູ້ເກົ່າຍາດມາໄດ້ ແລະ ສືບຕໍ່ເພີ່ມທະວີຄວາມຮັບຜິດຊອບຕໍ່ໜ້າທີການເມືອງ ໃຫ້ສູງຂຶ້ນ, ເປັນແບບຢ່າງນໍາໜ້າ ໃນການຝຶກຝົນຫລໍ່ຫລອມຕົນເອງ ດ້ານຄຸນທາດການເມືອງ-ຄຸນສົມບັດ ສິນທຳປະຕິວັດໃຫ້ມີຄວາມໜັກແໜ້ນເຂັ້ມແຂງ, ເອົາໃຈໃສ່ປັບປຸງແບບແຜນນຳພາ ແບບແຜນວິທີເຮັດວຽກໃຫ້ສອດຄ່ອງ ແລະ ແທດເໜາະກັບສະພາບຕົວຈິງ, ທັງເພີ່ມທະວີຄວາມສາມັກຄີພາຍໃນໝູູ່ຄະນະ ເພື່ອພັດທະນາວຽກງານຮອບດ້ານ ຂອງນະຄອນ ຫລວງພະບາງໃຫ້ເຂັ້ມແຂງ ໜັກແໜ້ນຂຶ້ນເລື້ອຍໆ.

ພ້ອມນີ້,ຄະນະພັກນະຄອນ ຕ້ອງໄດ້ປະສານສົມທົບກັບພາກສ່ວນທີ່ກ່ຽວຂ້ອງຂອງແຂວງ ໃນການສືບຕໍ່ຮັກສາມູນເຊື້ອ ວັດທະນະທໍາ-ຮີດຄອງປະເພນີ ຂອງຊາວຫລວງພະບາງ ໃຫ້ຄົງຄຸນຄ່າ ຕິດພັນກັບ ການປົກປັກຮັກສາເມືອງມໍລະດົກໂລກ ຫລວງພະບາງ ໃຫ້ມີຄວາມໝັ້ນຄົງ ແລະ ຍືນຍົງຕະຫລອດໄປ.

ຂ່າວ: ແຫລ້ ສຸລີນພອນ