ຂປລ. ໃນໂອກາດລາຍງານຕໍ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ວັນທີ 13 ມັງກອນ 2021, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ໄດ້ກ່າວວ່າ: ບົນພື້ນຖານຄວາມຮັບຮູ້ເປັນເອກະພາບຕໍ່ໝາກຜົນໃນພຶດຕິກໍາຕົວຈິງຕະຫລອດໄລຍະຜ່ານມາ, ເພື່ອຕັດສິນໃຈແກ້ໄຂບັນຫາຕ່າງໆ ທີ່ເປັນຈຸດອ່ອນ ກໍຄືຢືນຢູ່ຕໍ່ໜ້າສະພາບເລັ່ງທວງໃນເງື່ອນໄຂໃໝ່, ພັກເຮົາໃນຖານະເປັນແກນນໍາໃນລະບົບການເມືອງ ກໍຄື ຜູ້ກໍາຊະຕາກໍາຂອງປະເທດຊາດ ຕ້ອງໄດ້ສ້າງການຫັນປ່ຽນໃໝ່ທີ່ເປັນລະບົບຄົບຊຸດ ແລະຕໍ່ເນື່ອງ ໂດຍສຸມໃສ່ແຕ່ລະຂົງເຂດວຽກງານ ໃນຊຸມປີຕໍ່ໜ້າ ດັ່ງນີ້:

1. ເພີ່ມທະວີບົດບາດການນໍາພາເດັດຂາດ, ໂດຍກົງ, ຮອບດ້ານຂອງພັກ ຕໍ່ກໍາລັງປະກອບອາວຸດ, ຕັ້ງໜ້າປະຕິບັດແນວທາງຍຸດທະສາດ ປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ.

2. ເສີມຂະຫຍາຍທຸກຄວາມອາດສາມາດ ແລະທ່າແຮງບົ່ມຊ້ອນ, ສ້າງຖານການຜະລິດ ແລະ ບໍລິການໃຫ້ເຂັ້ມແຂງ, ຮັບປະກັນການພັດທະນາແບບຍືນຍົງ ແລະ ເປັນເຈົ້າຕົນເອງ, ສູ້ຊົນບັນລຸຈັງຫວະການເຕີບໂຕ ຂອງລວມຍອດຜະລິດຕະພັນພາຍໃນ (GDP) 4% ຕໍ່ປີຂຶ້ນໄປ; ສົ່ງເສີມວິສາຫະກິດພາຍໃນ ໃຫ້ຂະຫຍາຍຕົວ ແລະເຂັ້ມແຂງ; ດໍາເນີນການປັບປຸງ ແລະສ້າງສະພາບຄ່ອງໃຫ້ແກ່ງົບປະມານ ແລະສ້າງຄວາມເຂັ້ມແຂງໃນການຄຸ້ມຄອງເງິນຕາ; ດໍາເນີນການສ້າງການຫັນປ່ຽນອັນເປັນພື້ນຖານ ແລະແຂງແຮງ ໃນການດຶງດູດການລົງທຶນຈາກພາຍໃນ ແລະຕ່າງປະເທດ; ສືບຕໍ່ເອົາໃຈໃສ່ ແລະຍົກລະດັບການພັດທະນາພື້ນຖານໂຄງລ່າງ, ລະບົບສາທາລະນູປະໂພກ ແລະການຈັດສັນອາຊີບຂອງປະຊາຊົນ ຢູ່ຊົນນະບົດໃຫ້ມີຈຸດສຸມ, ເຂົ້າສູ່ລວງເລິກ ແລະ ມີປະສິດທິຜົນສູງ.

3. ສືບຕໍ່ສຸມໃສ່ພັດທະນາຊັບພະຍາກອນມະນຸດຢ່າງແຂງແຮງ, ໃນເງື່ອນໄຂໃໝ່ຂອງການພັດທະນາ ຕ້ອງສ້າງຄົນລາວໃຫ້ມີຄວາມພ້ອມໃນທຸກດ້ານ, ສາມາດກາຍເປັນກໍາລັງຊຸກດັນຕົ້ນຕໍ ໃຫ້ແກ່ການປົກປັກຮັກສາ ແລະພັດທະນາປະເທດຊາດ. ເອົາໃຈໃສ່ສົມທົບລະຫວ່າງ ສະຖາບັນການສຶກສາ, ອົງກອນສັງຄົມ ແລະຄອບຄົວ ເພື່ອເຮັດໃຫ້ການຮຽນຮູ້ສາຂາວິຊາຕ່າງໆ ຄຽງຄູ່ກັບການພັດທະນາຄຸນຄ່າວັດທະນະທໍາຂອງຊາດ, ສ້າງທຸກເງື່ອນໄຂ ແລະໂອກາດໃຫ້ຄົນລາວທຸກຄົນ ໄດ້ຮັບການພັດທະນາຮ່ວມກັນ ທັງສາມາດຊົມໃຊ້ໝາກຜົນຂອງການພັດທະນາຢ່າງຍຸຕິທຳ, ສືບຕໍ່ດໍາເນີນການແກ້ໄຂຄວາມທຸກຍາກ ຂອງປະຊາຊົນຢ່າງເປັນລະບົບ. ເພີ່ມທະວີການຝຶກສີມືແຮງງານ ເພື່ອສະໜອງໃຫ້ຕໍາແໜ່ງງານທີ່ເກີດຂຶ້ນຢ່າງພຽງພໍ ແລະມີຄຸນນະພາບ, ຄຸ້ມຄອງແຮງງານຈາກຕ່າງປະເທດຢ່າງຮັດກຸມ, ເຂັ້ມງວດ ເພື່ອຮັບປະກັນຜົນປະໂຫຍດຂອງຜູ້ອອກແຮງງານລາວ.

4. ປັບປຸງລະບົບການຈັດຕັ້ງ, ກົງຈັກ ແລະກົນໄກເຄື່ອນໄຫວ ຂອງບັນດາອົງການອໍານາດລັດໃຫ້ເຂັ້ມແຂງ ແລະມີປະສິດທິພາບ; ຈຸດສຸມໃຫຍ່ ແມ່ນແກ້ໄຂສະພາບຊໍ້າຊ້ອນດ້ານພາລະບົດບາດ ເພື່ອໃຫ້ຈະແຈ້ງ ແລະຮັດກຸມ, ເຮັດໃຫ້ສາຍໃຍການຈັດຕັ້ງມີຄວາມກະທັດຮັດ, ຂະໜາດກົງຈັກບໍ່ໃຫຍ່ໂຕ ແຕ່ເປັນລະບົບໂລ່ງລ່ຽນ ແລະກ້າວສູ່ການເຊື່ອມລະຫວ່າງຂອດບໍລິຫານຕ່າງໆ ດ້ວຍອຸປະກອນທັນສະໄໝ ຄຽງຄູ່ກັບການເຮັດໃຫ້ຖັນແຖວລັດຖະກອນມີຈໍານວນໜ້ອຍລົງ ແຕ່ຄຸນນະພາບເພີ່ມຂຶ້ນ, ໃຊ້ຈ່າຍຢ່າງປະຢັດ; ປັບປຸງກົນໄກການຄຸ້ມຄອງໃຫ້ເປັນລະບົບເອກະພາບ ແລະເຂັ້ມແຂງ ຄຽງຄູ່ກັບຮັບປະກັນປະຕິບັດແບບແຜນ “ໃຫ້ປະຊາຊົນໄດ້ຮູ້, ໄດ້ປຶກສາຫາລື ແລະ ເຂົ້າຮ່ວມຈັດຕັ້ງປະຕິບັດ”; ແກ້ໄຂບັນຫາຫຍໍ້ທໍ້ຕ່າງໆໃນກົງຈັກລັດແຕ່ລະຂັ້ນ; ສະກັດກັ້ນການສວຍໃຊ້ສິດ, ອໍານາດລະເມີດສິດເປັນເຈົ້າຂອງປະຊາຊົນ ໂດຍເຈົ້າໜ້າທີ່ລັດທຸກຂັ້ນ; ສ້າງເງື່ອນໄຂຕົວຈິງ ແລະອໍານວຍຄວາມສະດວກໃຫ້ປະຊາຊົນ ສາມາດເຂົ້າເຖິງຂະບວນຍຸຕິທໍາ.

5. ເພີ່ມທະວີວຽກງານແນວໂຮມ ແລະວຽກງານມະຫາຊົນ ຂອງພັກ ໃນໄລຍະໃໝ່ ຕ້ອງຕອບສະໜອງການຜັນຂະຫຍາຍແນວທາງຂອງພັກ ໃນການເຕົ້າໂຮມກໍາລັງແຮງສັງລວມ ເພື່ອພັດທະນາເສດຖະກິດ-ສັງຄົມ, ປະຕິບັດບັນດາກົນໄກທາງການ ເມືອງ-ສັງຄົມ ຂອງລະບອບປະຊາທິປະໄຕປະຊາຊົນ ຢ່າງແຂງແຮງ, ຮັບປະກັນສິດເປັນເຈົ້າ, ປະຊາທິປະໄຕ ແລະຍຸຕິທໍາໃນສັງຄົມ; ເດັດດ່ຽວແກ້ໄຂ ແລະສະກັດກັ້ນທຸກການເຄື່ອນໄຫວແອບອ້າງບັນຫາປະຊາທິປະໄຕ, ສິດທິມະນຸດ, ສິດເສລີພາບໃນການເຊື່ອຖື ຫລື ບໍ່ເຊື່ອຖືສາສະໜາ ຂອງປະຊາຊົນ.

6. ເພີ່ມທະວີຄວາມເປັນເຈົ້າການ ປະຕິບັດແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ, ການຮ່ວມມືເພື່ອການພັດທະນາ ແລະຖືການທູດປ້ອງກັນເຫດເປັນທິດສໍາຄັນ; ສືບຕໍ່ຂະຫຍາຍການພົວພັນຮ່ວມມືແບບຫລາຍທິດ, ຫລາຍຝ່າຍ, ຫລາຍຮູບແບບ, ຫລາຍລະດັບ ລະຫວ່າງລັດກັບລັດ ແລະລະຫວ່າງພັກເຮົາ ກັບພັກການເມືອງຂອງຕ່າງປະເທດ ບົນພື້ນຖານການເຄົາລົບເອກະລາດ, ອຳນາດອະທິປະໄຕ ເຊິ່ງກັນ ແລະກັນ, ຕ່າງຝ່າຍຕ່າງມີຜົນປະໂຫຍດ.

Image may contain: people on stage

7. ພັກເຮົາ ຍາມໃດກໍຢືນຢັນຢ່າງໜັກແໜ້ນວ່າ ການນໍາພາຂອງພັກ ເປັນປັດໄຈຕັດສິນຜົນສໍາເລັດ ແລະໄຊະນະຂອງການປະຕິວັດ ຢູ່ປະເທດເຮົາ, ພ້ອມນັ້ນ ກໍຮັບຮູ້ຢ່າງເລິກເຊິ່ງວ່າ “ພັກທີ່ບໍ່ມີຄວາມສະດຸ້ງໄວ, ບໍ່ຍອມປັບປຸງຕົນເອງ ໃນທີ່ສຸດຈະກາຍ ເປັນພັກຫລ້າຫລັງ, ສູນເສຍຄວາມເຫລື້ອມໃສສັດທາ ແລະການສະໜັບສະໜູນຈາກມະຫາຊົນ”, ບົນຈິດໃຈນັ້ນ ພັກເຮົາຕ້ອງເດັດດ່ຽວແກ້ໄຂຈຸດອ່ອນ, ຂໍ້ຄົງຄ້າງ ພາຍໃນພັກ, ຮັບປະກັນບົດບາດການເຄື່ອນໄຫວນຳພາຕົວຈິງ ທີ່ເຂັ້ມແຂງຂອງການຈັດຕັ້ງພັກທຸກຂັ້ນ.

8. ສ້າງການຫັນປ່ຽນຢ່າງແຂງແຮງ ແລະເລິກເຊິ່ງໃນວຽກງານພະນັກງານ ກໍເອົາໃຈໃສ່ປັບປຸງລະບອບເລືອກເຟັ້ນ ແລະສັບຊ້ອນພະນັກງານ, ປັບປຸງບູລະນະມາດຕະຖານພະນັກງານນໍາພາຄຸ້ມຄອງ ແຕ່ລະປະເພດໃຫ້ລະອຽດ, ສ່ອງແສງຢ່າງຈະແຈ້ງເຖິງເປົ້າໝາຍຕອບສະໜອງການເລັ່ງທວງ ຂອງສະພາບການໃນໄລຍະໃໝ່ ແລະ ອື່ນໆ.

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here