ຂປລ. ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ແມ່ນຢູ່ໃນໄລຍະທີ່ມີຫລາຍເຫດການສໍາຄັນທັງພາຍໃນ ແລະ ຕ່າງປະເທດ ເຊິ່ງຈະກາຍເປັນທ່າແຮງ ແລະ ໂອກາດໃນການບັນລຸເປົ້າໝາຍການພັດທະນາຂອງ ສປປ ລາວ, ເຊິ່ງປັດໄຈ ທີ່ຈະຊຸກຍູ້ການພັດທະນາໃນ 5 ປີ ຕໍ່ໜ້າ ຄື: ປະຊາກອນໜຸ່ມ, ຄວາມອຸດົມຮັ່ງມີຂອງຊັບພະຍາກອນທໍາມະຊາດ ແລະ ທີ່ຕັ້ງພູມສັນຖານຂອງ ສປປ ລາວ ແລະ ຄວາມຮຸ່ງເຮືອງຂອງທະວີບອາຊີ ໂດຍສະເພາະ ສປ ຈີນ ແລະ ກຸ່ມປະເທດອາຊຽນ.

Image may contain: 3 people, people standing

ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ ໄດ້ກ່າວໃນກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ທີ່ໄຂຂຶ້ນໃນວັນທີ 13 ມັງກອນ 2021 ນີ້ວ່າ:ໂດຍລວມແລ້ວ ສປປ ລາວ ມີທ່າແຮງໄດ້ປຽບດ້ານທີ່ຕັ້ງພູມສັນຖານ ທີ່ຢູ່ໃກ້ຄຽງກັບບັນດາປະເທດທີ່ເສດຖະກິດ ມີການຂະຫຍາຍຕົວດີ,ເຊິ່ງຈະກາຍເປັນຖານການພັດທະນາທີ່ໝັ້ນຄົງ ແລະ ແຫລ່ງສົ່ງເສີມກໍາລັງແຮງງານ ໜຸ່ມທີ່ມີອາຍຸຕ່ໍາກວ່າ 25 ປີ ກວມເຖິງ 60% ຂອງພົນລະເມືອງເຮັດໃຫ້ສາມາດປະກອບສ່ວນເຂົ້າໃນການພັດທະນາໄດ້. ພ້ອມກັນນີ້, ເສດຖະກິດຂອງ ສປປ ລາວ ໃນໄລຍະຜ່ານມາແມ່ນມີຄວາມໝັ້ນທ່ຽງ, ຂະແໜງພະລັງງານສະອາດ ຍັງມີທ່າແຮງບົ່ມຊ້ອນຫລາຍ, ພື້ນທີ່ດິນທີ່ເໝາະສົມໃນການເຮັດກະສິກໍາ ແລະ ດິນແດນທີ່ອຸດົມສົມບູນ ທີ່ເປັນຊັບສິນອັນມີຄ່າ ສາ ມາດກາຍເປັນ ແຫລ່ງພື້ນຖານໃໝ່ຂອງການເຕີບໂຕ ແລະ ສ້າງວຽກເຮັດງານທໍາໃນຕໍ່ໜ້າ.

ສະຫາຍ ທອງລຸນ ສີສຸລິດ ກ່າວຕື່ມວ່າ: ໃນຊຸມປີຕໍ່ໜ້າ, ປະເທດເຮົາຍັງສືບຕໍ່ມີສະຖຽນລະພາບທາງດ້ານການເມືອງ, ມີຄວາມສະຫງົບ, ມີຄວາມເປັນລະບຽບຮຽບຮ້ອຍທາງສັງຄົມ, ປະຊາຊົນບັນດາເຜົ່າ ມີຄວາມເຊື່ອໝັ້ນຕໍ່ແນວທາງນະໂຍບາຍ ແລະ ການນໍາຂອງພັກ-ລັດ, ຕັ້ງໜ້າປະກອບສ່ວນເຂົ້າໃນການສ້າງສາພັດທະນາປະເທດຊາດ, ເຖິງຢ່າງໃດກໍຕາມ ສປປ ລາວ ຍັງມີສິ່ງທ້າທາຍຫລາຍຢ່າງ ເປັນຕົ້ນ ບັນຫາການເງິນພາກລັດ, ການປ່ຽນແປງດິນຟ້າອາກາດ ແລະ ໄພພິບັດທາງທໍາມະຊາດ.

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here