22.1 C
Laos
Thursday, October 28, 2021

ກອງປະຊຸມລັດຖະບານ ເປີດກວ້າງທ້າຍສະໄໝ ຊຸດທີ VIII ພິຈາລະນາຫລາຍບັນຫາສຳຄັນ

ຂ່າວເດັ່ນອາທິດນີ້

ກອງປະຊຸມລັດຖະບານຊຸດທີ VIII ເປີດກວ້າງທ້າຍສະໄໝ ໄດ້ຈັດຂຶ້ນຢ່າງເປັນທາງການໃນລະຫວ່າງ ວັນທີ 7-8 ມັງກອນ 2021 ທີ່ຫໍປະຊຸມແຫ່ງຊາດນະຄອນຫລວງວຽງຈັນ, ໂດຍມີ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີຮອງນາຍົກລັດຖະມົນຕີ, ບັນດາຄະນະລັດຖະບານ, ລັດຖະມົນຕີ, ພ້ອມດ້ວຍເຈົ້າແຂວງ, ຮອງເຈົ້າແຂວງໃນຂອບເຂດທົ່ວປະເທດ ເຂົ້າຮ່ວມ.

Image may contain: one or more people and people standing

ກອງປະຊຸມໃນຄັ້ງນີ້, ໄດ້ພ້ອມກັນຄົ້ນຄວ້າ, ປະກອບຄຳຄິດຄຳເຫັນ ແລະ ພິຈາລະນາ ໃນຫລາຍບັນຫາສຳຄັນທີ່ສະເໜີໂດຍບັນດາກະຊວງອ້ອມຂ້າງສູນກາງເປັນຕົ້ນ, ການຈັດຕັ້ງປະຕິບັດວຽກງານຂອງລັດຖະບານຊຸດທີ VIII (2016-2020), ການສະຫລຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII (2016-2020) ແລະ ຜ່ານຮ່າງເບື້ອງຕົ້ນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025), ຄວາມຄືບໜ້າການປັບປຸງກົນໄກການອຳນວຍຄວາມສະດວກ ແລະ ບັນດາຕົວຊີ້ວັດຕ່າງໆ ໃນການດຳເນີນທຸລະກິດຢູ່ ສປປ ລາວ ແລະ ການຈັດຕັ້ງປະຕິບັດຄຳສັ່ງວ່າດ້ວຍການປັບປຸງວຽກງານບໍລິການການອອກໃບອະນຸຍາດລົງທຶນ ແລະ ການອອກໃບອະນຸຍາດດຳເນີນທຸລະກິດ, ຮ່າງແຜນຍຸດທະສາດການສົ່ງເສີມຜະລິດເປັນສິນຄ້າຕິດພັນກັບກົນໄກການເຂົ້າເຖິງຕະຫລາດຈໍາໜ່າຍສິນຄ້າ ແລະ ການຄ້າຊາຍແດນ.

ພ້ອມນັ້ນ, ຍັງໄດ້ພ້ອມກັນຄົ້ນຄວ້າ, ປະກອບຄຳເຫັນ ກ່ຽວກັບການຄົ້ນຄວ້າການຫັນຊັບສິນ ຂອງລັດເປັນທຶນ, ຜົນການຕິດຕາມ, ຊຸກຍູ້ການຈັດຕັ້ງປະຕິບັດຄໍາສັ່ງ 15/ນຍ, ປີ 2020, ການກະ ກຽມ ໃຫ້ແກ່ການຫລຸດພົ້ນອອກຈາກສະຖານະພາບປະເທດດ້ອຍພັດທະນາ (LDCs), ຜົນການຈັດຕັ້ງປະຕິບັດແຜນແກ້ໄຂບັນຫາຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຕາມກົດໝາຍຂອງ ສປປ ລາວ, ການຈັດຕັ້ງປະຕິບັດການແກ້ໄຂຜົນກະທົບ ແລະ ຜັັນຂະຫຍາຍນະໂຍບາຍ, ມາດຕະການເພື່ອຫລຸດຜ່ອນຜົນກະທົບຈາກການລະບາດຂອງພະຍາດ COVID-19 ຕໍ່ເສດຖະກິດຂອງລາວ, ພ້ອມທັງຜັນຂະຫຍາຍຜົນກອງປະຊຸມຄະນະກຳມະການຮ່ວມມືທະວີພາຄີລະຫວ່າງລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ ຄັ້ງທີ 43 ປະຈຳປີ 2020. ຫລັງຈາກນັ້ນ, ບັນດາຄະນະລັດຖະບານ, ເຈົ້າແຂວງ, ຮອງເຈົ້າແຂວງພ້ອມດ້ວຍພາກສ່ວນກ່ຽວຂ້ອງກໍໄດ້ພ້ອມກັນປະກອບຄຳຄິດຄຳເຫັນໃສ່ຫລາຍບັນຫາສຳຄັນຢ່າງກົງໄປກົງມາ.

ໂອກາດດັ່ງກ່າວ, ທ່ານ ທອງລຸນ ສີສຸລິດ ເນັ້ນໃຫ້ຜູ້ເຂົ້າຮ່ວມກອງປະຊຸມຍົກສູງຄວາມຮັບ ຜິດຊອບ ໃນການລາຍງານໃຫ້ກະທັດຮັດ, ຊັດເຈນ, ໃຫ້ມີຈຸດສຸມໃນຂອບເວລາທີ່ໄດ້ກຳນົດ, ສ່ວນການປະກອບຄຳຄິດຄຳເຫັນ ແມ່ນໃຫ້ລົງເລິກບັນຫາທີ່ເປັນຂໍ້ຄົງຄ້າງ, ພ້ອມທັງວິເຄາະວິໄຈສາເຫດ ແລະ ສະເໜີທິດທາງ, ມາດຕະການໃນການແກ້ໄຂໃນ 6 ເດືອນຕົ້ນປີ 2021.

ຂ່າວ: ທະນູທອງ

ພາບ: ເກດສະໜາ

- Advertisement -
- Advertisement -

ເລື່ອງລາວຫຼ້າສຸດມື້ນີ້