ທ່ານ ປະລິນຍາເອກ ບຸນຍະເດດ ທອງສະຫວັນ ກໍາມະການພັກແຂວງ ຫົວໜ້າພະແນກອຸດສາຫະກຳ ແລະ ການຄ້າແຂວງຈຳປາສັກ ໃຫ້ສໍາພາດວ່າ: ປັດຈຸບັນ ນອກຈາກເຄື່ອນໄຫວກວດກາການນໍາເຂົ້າ ແລະ ຈໍາໜ່າຍ ອາຫານທະເລສົດ ແລະ ແຊ່ແຂງແລ້ວ ພະແນກອຸດສາຫະກໍາ ແລະ ການຄ້າແຂວງພວກເຮົາ ຍັງໄດ້ເອົາໃຈໃສ່ວຽກງານການຄຸ້ມຄອງ-ກວດກາ ການຊື້-ຂາຍ ຊີ້ນໝູ ແລະ ສິນຄ້າອຸປະໂພກ-ບໍລິໂພກ ທີ່ມີຜົນປະທົບໄວ ຕໍ່ຊິວິດການເປັນຢູ່ຂອງພະນັກງານ, ລັດຖະກອນ, ທະຫານ, ຕໍາຫຼວດ ແລະ ພໍ່ແມ່ປະຊາຊົນ ໂດຍຊຸກຍູ້-ແນະນໍາໃຫ້ເຈົ້າໜ້າທີ່ກວດກາການຄ້າ ລົງເຄື່ອນໄກວຕິດຕາມກວດກາຢູ່ຕາມຕະຫຼາດແຫ່ງຕ່າງໆໃນເທດສະບານແຂວງ.
ພ້ອມນີ້ ຍັງໄດ້ອອກແຈ້ງການແນະນໍາໃຫ້ເຈົ້າໜ້າທີ່ກວດກາການຄ້າ ຫ້ອງການອຸດສາຫະກໍາ ແລະ ການຄ້າ 9 ເມືອງ, 1 ນະຄອນ ເອົາໃຈໃສ່ເຄື່ອນໄຫວກວດກາ ແລະ ຄຸ້ມຄອງລາຄາສິນຄ້າດັ່ງກ່າວ ຢ່າງເຂັ້ມງວດ, ຖ້າພົບເຫັນຜູ້ຝ່າຝືນ ກໍໃຫ້ດໍາເນີນຄະດີ ຕາມລະບຽບການທີ່ວາງອອກ ຢ່າງເຄັ່ງຄັດ.
ໃນວັນທີ 5 ມັງກອນ 2021 ທີ່ຜ່ານມາ, ເຈົ້າໜ້າທີ່ໄດ້ລົງເຄື່ອນໄຫວກວດກາການຊື້-ຂາຍຊິ້ນໝູ ຢູ່ຕະຫຼາດໃໝ່ປາກເຊ ນະຄອນປາກເຊ ແລະ ໄດ້ກວດພົບຜູ້ທີ່ຂາຍຊີ້ນໝູ 50.000 ກີບ/ກິໂລກຼາມ 1 ຮ້ານ ເຊິ່ງເກີນກ່ວາລາຄາທີ່ພະແນກອຸດສາຫະກຳ ແລະ ການຄ້າແຂວງກຳນົດໄວ້
ຫຼັງຈາກນັ້ນ, ເຈົ້າໜ້າທີ່ໄດ້ກັກຢຶດຊີ້ນໝູ ພ້ອມທັງສ້າງບົດບັນທຶກ, ສຶກສາອົບຮົມຜູ້ລະເມີດຕາມລະລຽບການ.
ສຳລັບຊີ້ນໝູທີ່ກຳນົດໄວ້ແມ່ນ 40.000-45.000 ກີບ/ກິໂລກຼາມ
ແລະ ຫາກພົບເຫັນການຂາຍເກີນລາຄາ ທ່ານ ສາມາດໂທແຈ້ງເຈົ້າໜ້າທີ່ກວດກາການຄ້າໄດ້ ທີ່ໝາຍເລກໂທລະສັບ 020 2226 6966, 020 5873 5555.
.
.
ພາບຂໍ້ມູນຈາກ: ໜັງສືພິມຈຳປາໃໝ່
