ຕະຫລອດໄລຍະຜ່ານມາ ຄະນະພັກອໍານາດການປົກຄອງ ແຂວງອັດຕະປື ໄດ້ສຸມໃສ່ການພັດທະນາດ້ານພື້ນຖານໂຄງລ່າງ ໂດຍສະເພາະເສັ້ນທາງຈາກຕົວເມືອງລົງໄປຫາຊົນນະບົດ ເຂດຫ່າງໄກສອກຫລີກ ເພື່ອອໍານວຍຄວາມສະດວກໃຫ້ພໍ່ແມ່ປະຊາຊົນ ໄດ້ສັນຈອນໄປມາ ຂົນສົ່ງ ຊື້-ຂາຍແລກປ່ຽນສິນຄ້າ ໄດ້ຢ່າງສະດວກ ແລະ ວ່ອງໄວຂຶ້ນເລື້ອຍໆ.
ທ່ານ ເລັດ ໄຊຍະພອນ ເຈົ້າແຂວງອັດຕະປື ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາປະຊາຊົນ ແຂວງອັດຕະປື ຊຸດທີ 1 ເມື່ອບໍ່ດົນມານີ້ວ່າ: ປັດຈຸບັນທຸກບ້ານພາຍໃນ ແຂວງອັດຕະປື ໄດ້ມີເສັ້ນທາງເຂົ້າເຖິງ ພ້ອມທຽວໄດ້ທັງສອງລະດູໝົດທຸກບ້ານແລ້ວ ເຊິ່ງໃນປີຜ່ານມາຄະນະພັກອໍານາດການປົກຄອງໄດ້ເອົາໃສ່ລົງຊຸກຍູ້-ຕິດຕາມໂຄງການກໍ່ສ້າງ ແລະ ສ້ອມແປງຂົວ-ທາງ ທີ່ໄດ້ຮັບອະນຸມັດຈັດຕັ້ງປະຕິບັດ ເຊິ່ງມີທາງຫລວງແຫ່ງຊາດ, ທາງຫລວງທ້ອງຖິ່ນ ແລະ ວຽກຟື້ນຟູສ້ອມແປງເສັ້ນທາງ, ໃນປີ 2020 ມີທັງໝົດ 23 ໂຄງການ, ມີຄວາມຍາວ 596,34 ກິໂລແມັດ, ມູນຄ່າລວມ 140,75 ຕື້ກີບ, ປະຕິບັດໜ້າວຽກໄດ້ 93,61 ຕື້ກີບ, ເທົ່າກັບ 66%. ມາຮອດປັດຈຸບັນທົ່ວແຂວງມີເສັ້ນທາງຍາວ 1.500,85 ກິໂລແມັດ, ທຽບໃສ່ປີ 2019 ຜ່ານມາ, ເພີ່ມຂຶ້ນ 113,76 ກິໂລແມັດ,ໃນນັ້ນແຍກຕາມປະເພດທາງມີ 5 ເສັ້ນທາງໃຫ່ຍ ຄື: ທາງຄອນກີດຍາວ 0,5 ກິໂລແມັດ, ທາງປູອັດສະຟານຍາວ 114,9 ກິໂລແມັດ, ທາງປູຢາງຍາວ 247,26 ກິໂລແມັດ, ທາງປູຫີນແຮ່ຍາວ 826,85 ກິໂລແມັດ ແລະ ທາງດິນທຳມະຊາດຍາວ 311,84 ກິໂລແມັດ; ໃນນີ້ບ້ານທີ່ມີທາງເຂົ້າເຖິງ ພ້ອມທຽວໄດ້ທັງ 2 ລະດູ ມີ 144 ບ້ານ, ກວມເອົາ 100%.
ທ່ານ ເຈົ້າແຂວງອັດຕະປື ໄດ້ກ່າວຕື່ມວ່າ: ໃນປີ 2021 ແຂວງອັດຕະປື ມີແຜນຈະຍົກລະດັບທາງປູຢາງ 2 ຊັ້ນ ພາຍໃນເທດສະບານແຂວງ, ພ້ອມມີແຜນທຸກເສັ້ນທາງພາຍໃນເທດສະບານຂອງແຂວງ ໃຫ້ໄດ້ນໍາໃຊ້ທາງປູຢາງທັງໝົດ ແລະ ຈະສຸມໃສ່ໂຄງການຕິດຕັ້ງລະບົບ ໄຟຟ້າແສງຕາເວັນ ເຂົ້າ 4 ຕົວເມືອງຂອງແຂວງ ເພື່ອອໍານວຍຄວາມສະດວກໃນການສັນຈອນ ຕາມເສັ້ນທາງແຕ່ແຂວງຫາເມືອງ.
ຂ່າວ: ວັດທະນາ
