ກະຊວງສາທາລະນະສຸກ ຊີ້ແຈງໃຫ້ສັງຄົມຮັບຮູ້ກ່ຽວກັບ ການກວດວິເຄາະພະຍາດໂຄວິດ-19 ໃນໄລຍະຜ່ານມາບໍ່ໄດ້ເສຍຄ່າ, ແຕ່ປັດຈຸບັນໄດ້ເສຍຄ່າ. ທັງນີ້, ກໍເນື່ອງຈາກວ່າອຸປະກອນ ແລະ ເຄມີ ທີ່ນຳໃຊ້ເຂົ້າໃນການກວດວິເຄາະ ຕະຫລອດໄລຍະທີ່ຜ່ານມານັ້ນ ສ່ວນຫລາຍແມ່ນໄດ້ຮັບການຊ່ວຍ ເຫລືອ ຈາກປະເທດເພື່ອນມິດ ແລະ ສາກົນ.
ທ່ານ ດຣ.ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ໂດຍຕາງໜ້າໃຫ້ຄະນະສະ ເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ໄດ້ກ່າວໃນພິທີຖະແຫລງຂ່າວເມື່ອອາທິດຜ່ານມານີ້ວ່າ: ປັດຈຸບັນ ທຶນ ແລະ ອຸປະກອນ ໃຊ້ສຳລັບກວດວິເຄາະພະຍາດໂຄວິດ-19 ທີ່ໄດ້ຮັບການຊ່ວຍເຫລືອຈາກສັງຄົມ ແລະ ສາກົນ ແມ່ນມີຈຳນວນຈຳກັດ, ຂະນະດຽວກັນ ຜູ້ໃຫ້ການຊ່ວຍ ເຫລືອ ກໍຢາກໃຫ້ລາວ ເປັນເອກະລາດ ແລະ ໃຫ້ກຸ້ມຕົນເອງຕໍ່ໄປ. ດັ່ງນັ້ນ, ຈຶ່ງໄດ້ສະເໜີມາຍັງຄະນະສະເພາະກິດ ເພື່ອສະເໜີລັດຖະບານ ວ່າ ເຮົາຄວນຈະຄິດໄລ່ຕົ້ນທຶນເພື່ອມາຊື້ແທນຄືນບໍ, ເພາະວ່າ ການກວດວິເຄາະແຕ່ລະຄັ້ງ ບໍ່ແມ່ນໃຊ້ພຽງແຕ່ນ້ຳຢາເທົ່ານັ້ນ, ຍັງມີເຄື່ອງ PPE ທີ່ພະນັກງານກວດກາຈະຕ້ອງໄດ້ໃຊ້ ເຊິ່ງຊຸດໜຶ່ງແມ່ນ 35 ໂດລາສະຫະລັດ ແລະ ແຕ່ລະມື້ແມ່ນໄດ້ໃຊ້ຈຳນວນຫລາຍຊຸດ, ພ້ອມນັ້ນກໍຍັງມີອຸປະກອນອື່ນໆຕື່ມອີກ.
ສະນັ້ນ, ການກວດວິເຄາະພະຍາດໂຄວິດ-19 ແມ່ນຈໍາເປັນທີ່ຈະຕ້ອງໄດ້ເກັບຄ່າບໍລິການ ນໍາຜູ້ທີ່ພວກເຮົາຄວນຈະຕ້ອງໄດ້ເກັບ ໂດຍສະເພາະແມ່ນນັກທຸລະກິດ ທີ່ຈະອອກໄປຕ່າງປະເທດທີ່ໄປທຸລະກິດຕົນເອງ ແລະ ຜູ້ທີ່ມີເງື່ອນໄຂທີ່ຈະຈ່າຍໄດ້, ແຕ່ກໍລະນີທີ່ສົງໄສ ແລະ ກຸ່ມເປົ້າໝາຍແມ່ນຈະບໍ່ໄດ້ເສຍຄ່າ.
ຕາມຂໍ້ຕົກລົງຂອງກະຊວງສາທາລະນະສຸກ ເລກທີ 3439 ລົງວັນທີ 22 ທັນວາ 2020 ລະບຸວ່າ: ຄ່າບໍລິການກວດວິເຄາະພະຍາດໂຄວິດ-19 ແມ່ນ 1.200.000 ກີບ/ຄັ້ງ, ເຊິ່ງກຸ່ມຄົນທີ່ຈະຕ້ອງໄດ້ຈ່າຍແມ່ນ ບຸກຄົນທີ່ເດີນທາງເຂົ້າ-ອອກຕາມດ່ານສາກົນ ແລະ ທ້ອງຖິ່ນ ທີ່ໄດ້ຮັບອະນຸຍາດ ເຊັ່ນ: ນັກການທູດຕ່າງປະເທດ, ພະນັກງານອົງການຈັດຕັ້ງສາກົນ, ນັກທຸລະກິດ (ລາວ, ຕ່າງປະເທດ) ນັກທ່ອງທ່ຽວ (ລາວ, ຕ່າງປະເທດ), ບຸກຄົນທົ່ວໄປ (ລາວ, ຕ່າງປະເທດ), ແຮງງານຕ່າງປະເທດ ແລະ ຜູ້ສະໝັກໃຈກວດ (ລາວ, ຕ່າງປະເທດ), ລວມທັງແຮງງານຄົນລາວ ທີ່ຈະເດີນທາງອອກໄປຕ່າງປະເທດ.
ສຳລັບຄາລາ 1.200.000 ກີບ/ຄັ້ງ ແມ່ນຄິດໄລ່ຕາມຕົ້ນທຶນ ແລະ ເມື່ອທຽບກັບປະເທດເພື່ອນບ້ານທີ່ເພິ່ນສາມາດຜະລິດເອງໄດ້ ກໍອາດຈະຖືກກວ່າປະເທດເຮົາ, ແຕ່ສຳລັບປະເທດທີ່ບໍ່ສາມາດຜະລິດເອງໄດ້ເຊັ່ນ ປະເທດໄທ ເຫັນວ່າຄ່າບໍລິການແມ່ນແພງກວ່າບ້ານເຮົາ.
ຂ່າວ-ພາບ: ສິງຄຳ
