ເພື່ອອານຸລັກ ແລະ ສົ່ງເສີມສຽງຂັບລໍາທ້ອງຖິ່ນ ທີ່ເປັນມໍລະດົກທາງດ້ານວັດທະນະທໍາຂອງຊາດ ແລະ ຟື້ນຟູລໍາຕັບເຕົ່າພື້ນເມືອງຈາກປູ່ສູ່ຫຼານ ເມືອງແກ່ນທ້າວ ແຂວງໄຊຍະບູລີ ໄດ້ຈັດພິທີເປີດວົງດົນຕີລາວເດີມຂຶ້ນ ໃນວັນທີ 24 ທັນວາ 2020 ນີ້, ຢູ່ທີ່ຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງ. ໂດຍການເປັນກຽດເຂົ້າຮ່ວມຂອງທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ, ມີຫົວໜ້າ, ຮອງຫົວໜ້າຫ້ອງການ, ແລະ ນັກດົນຕີເຂົ້າຮ່ວມ.

Image may contain: 5 people, people on stage, people standing and outdoor

ກ່ອນຈະເຂົ້າສູ່ພິທີບັນດາຜູ້ເຂົ້າຮ່ວມໄດ້ຮັບຊົມການເສບດົນຕີລາວເດີມ ເພງຈໍາປາເມືອງລາວ, ຮັບຊົມຟ້ອນເພງ ຈໍາປາເມືອງລາວ ຈາກຫຼານນ້ອຍໂຮງຮຽນສຸກສະຫວັນ, ຟັງລໍາຕັບເຕົ່າ ປະຫວັດເມືອງເປັງຈານນະຄອນລັດ, ເສບຄົນຕີລາວເດີມ ເພງລາວດວງເດືອນ ຢ່າງເບີກບານມ່ວນຊື່ນ, ຈາກນັ້ນ, ໄດ້ຜ່ານຂໍ້ຕົກລົງຂອງທ່ານເຈົ້າເມືອງ ສະບັບເລກທີ 1119 ວ່າດ້ວຍການອະນຸມັດເປີດວົງດົນລາວເດີມຂອງເມືອງແກ່ນທ້າວ, ຂໍ້ຕົກລົງຂອງທ່ານເຈົ້າເມືອງ ສະບັບເລກທີ 1120 ວ່າດ້ວຍການແຕ່ງຕັ້ງຄະນະຮັບຜິດຊອບວົງດົນຕີລາວເດີມຂອງເມືອງແກ່ນທ້າວ.

ທ່ານ ຈຸ່ນ ບຸນໄທວົງ ຕາງໜ້າໃຫ້ຄະນະວົງດົນຕີລາວເດີມ ໄດ້ຜ່ານບົດລາຍງານການກະກຽມເປີດວົງດົນຕີລາວເດີມ ໂດຍໃຫ້ຮູ້ວ່າ: ຈຸດປະສົງໃນການເປີດວົງດົນຕີລາວເດີມໃນຄັ້ງນີ້, ເພື່ອເປັນການຟື້ນຟູລໍາຕັບເຕົ່າເຊິ່ງລໍາຕັບເຕົ່າເປັນລໍາພື້ນເມືອງ ທີ່ຢູ່ຄູ່ເມືອງແກ່ນທ້າວມາຍາວນານ ເຊິ່ງພໍ່ຕູ້ໝໍ້ເປັນຜູ້ຄົ້ນພົບຢູ່ໃນໜັງສືຜູກໃບລານທີ່ວັດກາງ ຫຼື ວັດສີພູມໃນປັດຈຸບັນ ເພິ່ນນໍາມາຮຽນລໍາໃນເລື່ອງ ສຸລິວົງ ແລະ ທ້າວ ກາລະເກດ ເຫັນວ່າໄດ້ຮັບຄວາມນິຍົມຊົມຊອບຫຼາຍ ເພິ່ນຈຶ່ງໄດ້ຕັ້ງເປັນຄະນະໝໍລໍາຕັບເຕົ່າຂຶ້ນ ໂດຍມີພໍ່ຕູ້ໝໍ້ເປັນຫົວໜ້າແຕ່ພາຍຫຼັງມາ ລໍາຕັບເຕົ່າຖືກຫຼົງລືມໄປໄລຍະໜຶ່ງຍ້ອນບໍ່ມີຜູ້ສືບທອດ. ໃນຊຸມປີ 1990-1995 ລໍາຕັບເຕົ່າໄດ້ນໍາໄປລໍາຮັບໃຊ້ຢູ່ແຂວງ ໂດຍພໍ່ຕູ້ແຫວງ ຈາກນັ້ນກໍ່ຈາງຫາຍໄປອີກ ຈົນມາຮອດປີ 2014 ທາງຫ້ອງການຖະແຫຼງຂ່າວ,ວັດທະນະທໍາ ແລະ ທ່ອງທ່ຽວເມືອງ ຈຶ່ງຄົ້ນຄວ້າຄືນໂດຍສືບປະຫວັດຈາກພໍ່ຕູ້ແຫວງ ດ້ວຍຄວາມພະຍາຍາມດັ່ງກ່າວ ມາຮອດມື້ນີ້ຈຶ່ງໄດ້ຍິນສຽງລໍາຕັບເຕົ່າ ແລະ ວົງດົນຕີລາວເດີມແກ່ນທ້າວ ສືບຕໍ່ເຜີຍແຜ່ໃຫ້ກວ້າງຂວາງກວ່າເກົ່າ ແລະ ຖ່າຍທອດໃຫ້ລູກຫຼານໄດ້ສືບທອດຕໍ່ໄປ.

Image may contain: 5 people, people standing, people on stage and outdoor

ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ໄດ້ກ່າວເປີດວົງດົນຕີລາວເດີມເມືອງແກ່ນທ້າວຢ່າງເປັນທາງການ ແລະ ທ່ານຍັງໄດ້ຮຽກຮ້ອງໃຫ້ຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຕ້ອງໄດ້ຄຸ້ມຄອງໃຫ້ດີ, ພ້ອມທັງປະສານສົມທົບອຳນວຍຄວາມສະດວກໃຫ້ດົນຕີລາວເດີມໄດ້ເຄື່ອນໄຫວຮັບໃຊ້ສັງຄົມຢ່າງທົ່ວເຖິງ, ຄະນະວົງດົນຕີ ຕ້ອງໄດ້ສ້າງແຜນເຄື່ອນໄຫວ, ສ້າງລະບຽບສະເພາະພາຍໃນວົງ ແລະ ສ້າງແຜນຝຶກຊ້ອມກ່ອນການສະແດງທຸກຄັ້ງ, ນັກດົນຕີເຊິ່ງລ້ວນແລ້ວແຕ່ເປັນຜູ້ອາວຸໂສ ມີບົດຮຽນ ແລະ ມີປະສົບການຫຼາຍແລ້ວ ຕ້ອງໄດ້ຖ່າຍຖອດບົດຮຽນ ແລະ ປະສົບການ ດ້ວຍການສິດສອນ, ອົບຮົມໃຫ້ລູກຫຼານເຮົາສືບທອດຕໍ່ໄປ, ຢາກໃຫ້ມີການຂຸດຄົ້ນ ແລະ ປະດິດສ້າງເຄື່ອງດົນຕີພື້ນເມືອງໃຫ້ຫຼາກຫຼາຍຕື່ມ ໂດຍອີງໃສ່ທ່າແຮງ ແລະ ວັດຖຸທີ່ຫາໄດ້ຕາມທຳມະຊາດເຊັ່ນ: ປີ່, ໃບໄມ້, ໄມ້ປ່ອງ ແລະ ອື່ນໆ, ພ້ອມນີ້, ກໍ່ໃຫ້ເຕົ້າໂຮມກັນ ເພື່ອປືກສາຫາລື ແລະ ສ້າງກອງທຶນຂອງວົງດົນຕີເພື່ອບຳລຸງ ແລະ ພັດທະນາວົງໃຫ້ດີຂຶ້ນໄປເລື້ອຍໆ.

(ຂ່າວ ຖວທ ແກ່ນທ້າວ)

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here