ໃນຕອນບ່າຍຂອງວັນທີ 15 ທັນວາ ປີນີ້, ທີ່ສະໂມສອນ ຫ້ອງວ່າການແຂວງ ໄຊຍະບູລີ ໄດ້ຈັດກອງປະຊຸມ ປຶກສາຫາລື ກ່ຽວກັບການກະກຽມຈັດງານບຸນຊ້າງ ປະຈໍາປີ 2021 ຂຶ້ນ, ໂດຍການເປັນປະທານຂອງ ທ່ານ ເພັດພິໄຊ ສູນວິໄລ ຮອງເຈົ້າແຂວງ ໄຊຍະບູລີ, ເຂົ້າຮ່ວມມີ ຫົວໜ້າ, ຮອງຫົວໜ້າ ພະແນກການ, ກົມກອງ ແລະ ພະນັກງານວິຊາການຈາກຫ້ອງວ່າການແຂວງເຂົ້າຮ່ວມ.

ໃນກອງປະຊຸມ ພາຍຫຼັງທີ່ ທ່ານ ພອນສະຫວັນ ໄຊສົມພັນ ຫົວໜ້າຫ້ອງວ່າການແຂວງໄດ້ຂຶ້ນຜ່ານ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການແຕ່ງຕັ້ງຄະນະຮັບຜິດຊອບ ຊີ້ນໍາການກະກຽມ ແລະ ຈັດງານບຸນຊ້າງ ໄຊຍະບູລີ ປະຈໍາປີ 2021, ຈາກນັ້ນບັນດາຜູ້ເຂົ້າຮ່ວມກໍ່ໄດ້ປຶກສາຫາລືກັນເພື່ອຫ້າງຫາກະກຽມໃນການຈັດງານບຸນຊ້າງປະຈໍາປີ, ເປັນຕົ້ນແມ່ນໄດ້ກໍານົດຕາຕະລາງ, ວັນ, ເວລາມື້ຈັດງານບຸນ, ກໍານົດບັນດາກິດຈະກໍາຕ່າງໆ, ເຊັ່ນ:

ການສະແດງຂອງຊ້າງຈໍານວນໜຶ່ງ, ການຂີ່ຊ້າງອ້ອມເມືອງ, ການບາສີສູ່ຂວັນຊ້າງ, ການຕັກບາດ-ຍາດນໍ້າເພື່ອອຸທິດບຸນກູສົນໄປໃຫ້ຊ້າງ, ການສະແດງສິນຄ້າໂອດ໊ອບຂອງທ້ອງຖິ່ນ, ການສະແດງສິລະປະ-ວັນນະຄະດີ ແລະ ອື່ນໆ, ການຈັດງານບຸນຊ້າງປະຈໍາປີ 2021 ນີ້ ແມ່ນຈະໄດ້ເຮັດນ້ອຍຕາມຮີດຄອງປະເພນີ ທັງນີ້ກໍ່ເພື່ອປະຕິບັດຕາມມາດຕະການຂອງໜ່ວຍສະເພາະກິດແຫ່ງຊາດ ໃນການຄວບຄຸມ ແລະ ແກ້ໄຂ ການລະບາດຂອງພະຍາດ ໂຄວິດ-19,

ສ່ວນລາຍລະອຽດຄະນະຮັບຜິດຊອບຈັດງານບຸນ ຈະໄດ້ມີການຖະແຫຼງຂ່າວໃຫ້ຮູ້ໃນທ້າຍເດືອນນີ້ຕື່ມອີກ, ຕອນທ້າຍ ທ່ານ ເພັດພິໄຊ ສູນວິໄລ ຮອງເຈົ້າແຂວງ ກໍ່ໄດ້ຮຽກຮ້ອງ ມາຍັງບັນດາທ່ານທີ່ຖືກແຕ່ງຕັ້ງຮັບຜິດຊອບໃນການກະກຽມຈັດງານບຸນຄັ້ງນີ້ ຈົ່ງເພີ່ມທະວີຄວາມເປັນເຈົ້າການເຮັດໜ້າທີ່-ທີ່ໄດ້ມອບໝາຍໃຫ້ສໍາເລັດ, ທັງນີ້ກໍ່ເພື່ອເຮັດໃຫ້ການຈັດງານບຸນຊ້າງໄດ້ຮັບຜົນສໍາເລັດຕາມລະດັບຄາດໝາຍ ແລະ ຮັບປະກັນຄວາມປອດໄພຮອບດ້ານ.

ຂ່າວ-ພາບ: ອຸ່ນເຮືອນ ໂພທິລັກ. News.XBL

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here