ແຂວງບໍ່ແກ້ວມີຊາຍແດນຕິດກັບປະເທດເພື່ອນບ້ານທີ່ຍາວຢຽດຫຍຸ້ງຍາກໃນການປ້ອງກັນ ການລັກເຂົ້າ-ອອກເມືອງ ຂອງປະຊາຊົນພາຍໃນແຂວງ ແລະ ຄົນຕ່າງປະເທດ ແລະ ຫຍຸ້ງຍາກໃນການຈຳກັດຄົນເຂົ້າ-ອອກ ຊຶ່ງເປັນສິ່ງທ້າທາຍ ແລະ ເປັນອຸປະສັກໃນການປ້ອງ ກັນການແຜ່ລະບາດຂອງພະຍາດໂຄວິດ-19.
ຮອງເຈົ້າແຂວງບໍ່ແກ້ວ ທ່ານ ດຣ. ຄໍາຜະຫຍາ ພົມປັນຍາ ໄດ້ໃຫ້ສໍາພາດຕໍ່ສື່ມວນຊົນເມື່ອວັນວັນທີ 14 ທັນວາ 2020ທີ່ຜ່ານມານີ້ກ່ຽວກັບການປ້ອງກັນພະຍາດໂຄວິດພາຍໃນແຂວງບໍ່ແກ້ວວ່າ: ພາຍຫຼັງທີ່ມີຊາຍຄົນຈີນ 2 ຄົນທີ່ຕິດເຊື້ອພະຍາດໂຄວິດ-19 ທີ່ລັກລອບເຂົ້າມາເມືອງຕົ້ນເຜິ້ງ ໂດຍມາແຕ່ເມືອງທ່າຂີ້ເຫຼັກ ປະເທດມຽນມາໃນວັນທີ 24 ພະຈິກ 2020 ທີ່ຜ່ານມາ, ການຮັບມືກັບການລະບາດຂອງພະຍາດໂຄວິດ-19 ຫຼື ກັບເຫດການດັ່ງກ່າວການນຳແຂວງບໍ່ແກ້ວ ກໍ່ຄື ຄະນະສະເພາະກິດໄດ້ເອົາໃຈໃສ່ຕິດຕາມສະຖານະການຂອງພະຍາດດັ່ງກ່່າວຢ່າງບໍ່ຢຸດຢັ້ງໂດຍສະເພາະໄດ້ເລັ່ງປ້ອງກັນ ແລະ ຕິດຕາມຢູ່ຈຸດທີ່ມີຄວາມສ່ຽງທີ່ຈະມີການແຜ່ລະບາດຂອງພະຍາດນີ້ ເຊັ່ນ: ໄດ້ປິດການເດີນເຮືອ ແລະ ການຂົນສົ່ງສິນຄ້າທຸກປະເພດພາຍໃນເມືອງຕົ້ນເຜິ້ງ, ປິດການເຂົ້າ-ອອກປະຊາຊົນພາຍໃນເມືອງຕົ້ນເຜິ້ງ ແລະ ປິດການເຂົ້າ-ອອກຢູ່ເຂດເສດຖະກິດພິເສດສາມຫຼ່ຽມຄໍາ.
ທ່ານ ດຣ. ຄໍາຜະຫຍາ ໄດ້ກ່າວຕື່ມວ່າ: ແຕ່ວ່າສິ່ງທ້າທາຍຕໍ່ກັບການປ້ອງກັນພະຍາດນີ້ແມ່ນບັນຫາເລື່ອງເສັ້ນຊາຍແດນລະຫວ່າງແຂວງບໍ່ແກ້ວ ແລະ ປະເທດເພື່ອນບ້ານທີ່ຍັງມີການແຜ່ລະບາດຂອງພະຍາດນີ້ຢູ່ນັ້ນ ມີຄວາມຍາວຢຽດຊຶ່ງເປັນອຸປະສັກໃນການປ້ອງກັນການລັກລອບເຂົ້າ-ອອກຂອງປະຊາຊົນ ກໍ່ຄືມີຄວາມຫຍຸ້ງຍາກໃນການປ້ອງກັນການແຜ່ລະບາດຂອງພະຍາດນີ້. ສະເພາະຢູ່ເຂດສາມຫຼ່ຽມຄໍາ ຊຶ່ງເປັນຈຸດສ່ຽງທີ່ສຸດໃນການແຜ່ລະບາດຂອງພະຍາດນີ້, ທາງຄະນະສະເພາະກິດໄດ້ເກັບຕົວຢ່າງພະນັກງານບໍລິການຢູ່ເຂດດັ່ງກ່າວຈໍານວນ 37 ຕົວຢ່າງ, ເກັບຕົວຢ່າງຈາກຜູ້ມີໝວດອາການຄ້າຍຄືກັບເປັນຫວັດ 18 ຕົວຢ່າງ ແລະ ພະນັກງານແພດ 06 ຕົວຢ່າງ ເຊິ່ງຜົນກວດທັງໝົດແມ່ນບໍ່ພົບເຊື້ອ.
ຂ່າວ: ວຽງຈັນທາຍ
ຂໍ້ມູນ: ຄຳພັນ ແກ້ວມະນີ
---------------
ຢ່າລືມກົດຕິດຕາມເພຈ All in LAOS
------------------------------
