22.1 C
Laos
Thursday, October 28, 2021

ທາດນາງສາມຜິວຕໍານານຈາກຈໍາປາສັກ ສູ່ ໄຊຍະບູລີ

ຂ່າວເດັ່ນອາທິດນີ້

ທາດນາງສາມຜິວຕັ້ງຢູ່ ບ້ານທາດ ເມືອງທົ່ງມີໄຊ ແຂວງໄຊຍະບູລີ ເປັນວັດຖຸບູຮານ, ປູຊະນີຍະສະຖານ ແລະ ເປັນທາດເກົ່າແກ່ ທີ່ປະຊາຊົນຊາວເມືອງທົ່ງມີໄຊ ໄດ້ໃຫ້ການເຊື່ອຖື ແລະ ເປັນສິ່ງສັກກະລະບູຊາມາແຕ່ດຶກດຳບັນ. ຕາມຕຳນານຄົນບູຮານກ່າວຂານສືບຕໍ່ກັນມາວ່າ: ຢູ່ເມືອງແຫ່ງຫນຶ່ງທາງພາກໃຕ້ຂອງລາວ (ນະຄອນຈຳປາສັກໃນປັດຈຸບັນ) ໄດ້ມີສາວສະໜົມກົມມະວັງຄົນໜຶ່ງ ຊື່ວ່ານາງຈຳປາ ເປັນຄົນຮັບໃຊ້ຂອງພະຍາຢູ່ໃນເມືອງແຫ່ງນັ້ນ ລາວເປັນຄົນສັດຊື່ບໍລິສຸດ ຕໍ່ເຈົ້າຂຸນມຸນນາຍ ຮັກຄວາມເປັນທຳ ຮັກຄວາມສະຫງົບ.

.

.

ວັນເວລາຜ່ານໄປຫລາຍປີ ນາງຈຳປາໄດ້ເກີດມີຄວາມຮັກກັບນາຍທະຫານຄົນຫນຶ່ງທີ່ຮັບໃຊ້ພະຍາ ແລະ ໄດ້ຕົກລົງປົງໃຈແຕ່ງດອງ ກັບນາຍທະຫານຫນຸ່ມຄົນນັ້ນ ຕໍ່ມານາງຖືພາໄດ້ສາມເດືອນ ແຕ່ບັງເອີນຜູ້ເປັນຜົວກໍໄດ້ຈາກຄອບຄົວໄປຕໍ່ສູ້ ກັບສັດຕູຜູ້ຮຸກຮານ ເພື່ອປົກປ້ອງບ້ານເມືອງຂອງຕົນ ໃນທີ່ສຸດຜົວຂອງນາງກໍໄດ້ເສຍຊີວິດໃນສະຫນາມຮົບ ສ່ວນນາງຈຳປາ ກໍໄດ້ເປັນຫມ້າຍທີ່ຂາດບ່ອນເພິ່ງພາອາໄສ ວັນເວລາຜ່ານໄປ 9 ເດືອນ ນາງກໍໄດ້ເກີດລູກຜູ້ຍິງທີ່ງົດງາມ ທັງມີຄວາມກະຕັນຍູ, ຮູ້ບຸນຄຸນຕໍ່ບ້ານເມືອງ ນາງເປັນຄົນແປກປະຫລາດໃນແຕ່ລະມື້ ຜິວພັນຮ່າງກາຍ ຂອງນາງຈະຜັດປ່ຽນເປັນສາມສີຄື: ຕອນເຊົ້າເປັນສີບົວ , ຕອນທ່ຽງເປັນສີຂາວ ແລະ ຕອນແລງເປັນສີມອນໄຂ່. ຍ້ອນແນວນັ້ນຊາວເມືອງຈຶ່ງຕົກຕະລຶງ ທັງຫາເລື່ອງຫາລາວໃສ່ນາງວ່າ: ເປັນຄົນເຂັດ, ຄົນຂວາງ, ຜິດຮີດຄອງບ້ານເມືອງບໍ່ໃຫ້ຮ່ວມຢູ່ບ້ານເມືອງ.

.

.

ວັນເດືອນປີຜ່ານໄປ ນາງສາມຜິວໄດ້ເກີດເຈັບປ່ວຍ ຊາວເມືອງກໍບໍ່ມີໃຜສາມາດກອບກູ້ເອົາຊີວິດຂອງນາງໄວ້ໄດ້ ແຕ່ກ່ອນນາງຈະຂາດໃຈນັ້ນ ນາງໄດ້ບອກຊາວບ້ານວ່າ : ຖ້າຕາຍແລ້ວໃຫ້ເອົາສົບ ຂອງນາງໄປຝັງໄວ້ໃນປ່າດົງໃຫຍ່ແຫ່ງຫນຶ່ງ (ທິດເຫນືອຕິດກັບທົ່ງໃຫຍ່, ທິດໃຕ້ຕິດກັບລ້ອງເຊີໄຊ, ຍ່ານກາງແມ່ນກ້ອງຫນອງເທົາເອີຍ) ໃຫ້ຝັງໄວ້ບ່ອນນັ້ນ ແລ້ວໃຫ້ກໍ່ສ້າງທາດກວມຂຸມຝັງສົບຂອງນາງໄວ້ ພ້ອມກັນນັ້ນໃນແຕ່ລະປີ ໃຫ້ຊາວບ້ານ, ຊາວເມືອງ ເຮັດບັ້ງໄຟຈູດບູຊາເປັນປະຈຳທຸກປີ ແລ້ວຊາວບ້ານ ຊາວເມືອງທັງຫລາຍຈຶ່ງຈະຢູ່ເຢັນເປັນສຸກ. ນັບແຕ່ມື້ນັ້ນມາຊາວເມືອງທົ່ງມີໄຊ ຈຶ່ງໄດ້ພ້ອມກັນນັບຖື ກາຍເປັນສິ່ງສັກກະລະບູຊາຂອງຄົນທັງຫລາຍ, ໃນທຸກໆປີ ປະຊາຊົນຊາວເມືອງທົ່ງມີໄຊ ແລະ ຊາວລາວຢູ່ຕ່າງເມືອງ, ຕ່າງແຂວງ ແລະ ຕ່າງປະເທດ ທີ່ມີຄວາມເຊື່ອຖື ສັດທາຕໍ່ທາດນາງສາມຜິວ ຕ່າງກໍພາກັນມາບະບົນ, ກາບໄຫ້ວ, ຂໍພອນ, ອະທິຖານຕາມການເຊື່ອຖື.

.

.

ເມື່ອຮອດວັນທີ22-23 ເດືອນເມສາ ຂອງທຸກໆປີຊາວເມືອງທົ່ງມີໄຊ ກໍໄດ້ເຮັດບັ້ງໄຟໄປຈູດ ຖວາຍນາງສາມຜິວບໍ່ໄດ້ຂາດ ກ່ອນຈະຂຶ້ນຈູດບັ້ງໄຟນັ້ນ ຕ້ອງໄດ້ໄປເກືອກຕົມ ໃຫ້ຕົວຕົນມີຄວາມຊຸ່ມເຢັນ ແລ້ວມາກາບໄຫ້ວສີ່ແຈຂອງທາດ ໃຫ້ຄົບສາມຮອບຈຶ່ງຂຶ້ນຈູດ, ຜູ້ຫນຶ່ງສາມາດຂຶ້ນຈູດໄດ້ຫນຶ່ງຄັ້ງຕໍ່ປີ ແລະ ໃຫ້ໄດ້ຂຶ້ນຄົບ 3 ປີ ຈຶ່ງເຊົາໄດ້ ແລະ ກໍໄດ້ສືບຕໍ່ເຮັດຈົນກາຍເປັນຮີດຄອງປະເພນີ ຂອງຊາວເມືອງທົ່ງມີໄຊໄດ້ສືບທອດກັນມາຈົນເຖິງທຸກວັນນີ້.

.

ຫາກທ່ານມັກຮູບພາບການເດີນທາງ ແລະ ຊື່ນຊົມຜົນງານຂອງນັກເດີນທາງ ຄໍາຖາວອນ ສິນມະນີ, ທ່ານສາມາດ ໃຫ້ກໍາລັງໃຈ ແລະ ຊຸກຍູ້ນໍ້າໃຈ ເພື່ອຈະໄດ້ນໍາເອົາພາບງາມໆ ທົ່ວປະເທດລາວມາໃຫ້ທ່ານໄດ້ຊື່ນຊົມ.

Thank you for your tips ຂອບໃຈທີ່ສະໜັບສະໜູນ
- Advertisement -
- Advertisement -

ເລື່ອງລາວຫຼ້າສຸດມື້ນີ້