ພະແນກສຶກສາທິການ ແລະ ກິລາແຂວງ (ສກຂ) ຫຼວງພະບາງ ຈັດກອງປະຊຸມສ້າງຄວາມເຂັ້ມແຂງວຽກງານໂຄ​ສະນາຂ່າວສານ ຂະແໜງການສຶກສາ ແລະ ກິລາທົ່ວແຂວງ ປະຈຳປີ 2020 ໃຫ້ມີຜູ້ຮັບຜິດຊອບຂັ້ນແຂວງ, ບັນດາເມືອງ ແລະ ໂຮງຮຽນອ້ອມຂ້າງແຂວງ ເພື່ອສ້າງເຄືອຂ່າຍຕາໜ່າງວຽກງານໂຄສະນາຂ່າວສານການສຶກສາ ແລະ ກິລາ ໃຫ້ກວ້າງຂວາງທົ່ວເຖິງນັບແຕ່ສູນກາງລົງຮອດທ້ອງຖິ່ນ.

.

ກອງປະຊຸມຄັ້ງນີ້ ໄດ້ເປີດຂຶ້ນໃນວັນທີ 7 ທັນວາ 2020 ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງຫຼວງພະບາງ, ໂດຍພາຍໃຕ້ການເປັນປະທານຂອງທ່ານ ຊາຍສະຫວັນ ຈັນມານິດ ຮັກສາການຫົວໜ້າພະແນກສຶກ ສາທິການ ແລະ ກິລາ ແຂວງຫຼວງພະບາງ, ມີ ທ່ານ ສຸກສາຄອນ ສີປະເສີດ ຜູ້ອຳນວຍການ ສູນໂຄສະນາຂ່າວສານ ການສຶກສາ ແລະ ກິລາ, ສະຖາບັນຄົ້ນຄວ້າວິທະຍາສາດການສຶກສາ, ກະຊວງສຶກສາທິການ ແລະ ກິລາ ແລະ ທ່ານ ວັນທອງ ແພງສະຫວັດ ຫົວໜ້າຫ້ອງການບໍລິຫານ ພະແນກສຶກສາທິການ ແລະ ກິລາ ແຂວງຫຼວງພະບາງ ພ້ອມດ້ວຍວິທະຍາກອນຮັບເຊີນຈາກສູນໂຄສະນາຂ່າວສານການສຶກສາ ແລະ ກິລາ ແລະ ຜູ້ຮັບຜິດຊອບວຽກງານໂຄສະນາຂ່າວສານຂັ້ນພະແນກ ແລະ ບັນດາເມືອງທົ່ວແຂວງຫຼວງພະບາງ ເຂົ້າຮ່ວມ.ໂອກາດນີ້, ທ່ານ ຊາຍສະຫວັນ ຈັນມານິດ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບກອງປະຊຸມ, ວິທະຍາກອນຮັບເຊີນ ແລະ ສຳມະນາກອນທຸກທ່ານທີ່ໄດ້ພ້ອມກັນເອົາໃຈໃສ່ດ້ວຍຄວາມຮັບຜິດຊອບສູງ ເຮັດໃຫ້ກອງປະຊຸມຄັ້ງນີ້ ເປີດຂຶ້ນໄດ້ຕາມລະດັບຄາດໝາຍ, ຊຶ່ງກອງປະຊຸມຝຶກອົບຮົມວຽກງານໂຄສະນາຂ່າວສານການສຶກສາ ແລະ ກິລາທົ່ວແຂວງຄັ້ງນີ້ ສຸດທີ່ມີຄວາມໝາຍສຳຄັນຫຼາຍ ສຳລັບວຽກງານໂຄສະນາຂ່າວສານຂອງແຂວງພວກເຮົາ ເວົ້າລວມ, ເວົ້າສະເພາະແມ່ນໃນຂະແໜງການສຶກສາ ແລະ ກິລາ ເພື່ອຈະໄດ້ເກັບກຳເອົາການເຄື່ອນໄຫວວຽກງານຕ່າງໆພາຍໃນຂະແໜງການສຶກສາ ແລະ ກິລາ ເພື່ອໂຄສະນາເຜີຍແຜ່ໃຫ້ຂັ້ນເທິງກໍຄືສັງຄົມໄດ້ຮັບຮູ້ ແລະ ເຂົ້າໃຈຢ່າງກວ້າງຂວາງ.

.

ຄຽງຄູ່ກັນນັ້ນ, ຍັງເປັນການສ້າງຄວາມເຂັ້ມແຂງໃຫ້ວຽກງານໂຄສະນາຂ່າວສານ ເພື່ອເປັນເຄື່ອງມືໃນການເຜີຍແຜ່ແນວທາງນະໂຍບາຍ ແລະ ແຜນຍຸດທະສາດການພັດທະນາຕ່າງໆໃນຂົງເຂດການສຶກສາ ແລະ ກິລາ ແລະ ແຜນພັດທະນາການສຶກສາ ແລະ ກິລາ ປະຈໍາສົກຮຽນ 2020-2021 ຂອງພະແນກສຶກສາທິການ ແລະ ກິລາແຂວງ ກໍຄືຈັດຕັ້ງປະຕິບັດ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 9 (2021-2025) ຂອງກະຊວງສຶກສາທິການ ແລະ ກິລາ ດ້ວຍຄວາມຮັບຜິດຊອບສູງ ເພື່ອບັນລຸບັນດາຕົວເລກຄາດໝາຍຕ່າງໆທີ່ໄດ້ວາງອອກ. ສະນັ້ນ, ຂໍຮຽກຮ້ອງມາຍັງສຳມະນາກອນທຸກທ່ານ ຈົ່ງພ້ອມກັນເອົາໃຈໃສ່ຄົ້ນຄວ້າບົດຮຽນ, ມີບັນຫາຫຍັງກໍໃຫ້ຍົກມາແລກປ່ຽນກັນ ເພື່ອຍາດແຍ່ງເອົາບົດຮຽນຈາກວິທະຍາກອນໃຫ້ໄດ້ຫຼາຍທີ່ສຸດ ແນໃສ່ເຮັດໃຫ້ວຽກງານໂຄສະນາຂ່າວສານໃນຂະແໜງການສຶກສາ ແລະ ກິລາ ທົ່່ວແຂວງຫຼວງພະບາງ ມີການເຕີບໃຫຍ່ຂະຫຍາຍຕົວທັງດ້ານປະລິມານ ແລະ ຄຸນນະພາບດີຂຶ້ນເທື່ອລະກ້າວ.

.

ຂ່າວໂດຍ: ລູກນ້ຳເຊ

---------------

ຢ່າລືມກົດຕິດຕາມເພຈ All in LAOS


------------------------------

LEAVE A REPLY

Please enter your comment!
Please enter your name here