ຕອນເຊົ້າ ຂອງວັນທີ 1 ທັນວາ 2020 ນີ້ ກອງບັນຊາການທະຫານແຂວງໄຊສົມບູນ ໄດ້ຈັດພິທີ ມອບ-ຮັບ ທະຫານໃໝ່ ພັນທະປ້ອງກັນຊາດປະຈໍາສົກປີ 2020 ຂຶ້ນ ທີ່ກອງພັນນ້ອຍ 597, ໂດຍການເຂົ້າຮ່ວມຂອງ ສະຫາຍ ພັອ. ຄໍາອິ້ງ ກິ່ງແກ້ວ, ຄະນະປະຈໍາພັກແຂວງ, ຫົວໜ້າກອງບັນຊາການທະຫານແຂວງ, ມີສະຫາຍ ຄໍາພູທອນ ວົງພະຈັນ, ເລຂາພັກເມືອງ, ເຈົ້າເມືອງອະນຸວົງ ພ້ອມດ້ວຍຄະນະພັກ-ຄະນະບັນຊາ ກອງບັນຊາການທະຫານແຂວງ, ແຂກຮັບເຊີນຈາກເມືອງອະນຸວົງ, ຕາງໜ້າບ້ານ ແລະ ນ້ອງທະຫານໃໝ່ເຂົ້າຮ່ວມ
.
ໂອກາດດັ່ງກ່າວ ສະຫາຍ ເລຂາພັກເມືອງອະນຸວົງ ໄດ້ຂຶ້ນກ່າວມອບທະຫານໃໝ່ພັນທະປ້ອງກັນ ຊາດ ຈໍານວນ 110 ສະຫາຍ ປະຈໍາປີ 2020 ໃຫ້ກອງບັນຊາການທະຫານແຂວງ ເພື່ອທົດແທນ, ຊັບຊ້ອນ ແລະ ພັດປ່ຽນກໍາລັງຂອງຜູ່ທີ່ຈົບພັນທະ, ອຸດໜູນ ແລະ ບໍານານໃນທົ່ວກອງບັນຊາທະຫານແຂວງໄຊສົມບູນ ເພື່ອໃຫ້ມີກໍາລັງພຽງພໍເຂົ້າໃນການເຄື່ອນໄຫວເຮັດໜ້າທີ່ຂອງຕົນ ຕໍ່ພາລະກິດຮັບໃຊ້ຊາດ ກໍຄື ຮັບໃຊ້ແຂວງໄຊສົມບູນ ເພື່ອເຮັດໃຫ້ແຂວງມີຄວາມສະຫງົບ, ປອດໄພ, ມີສະຖຽນລະພາບທາງດ້ານການ ເມືອງ, ຮັກສາອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນໄວ້ໃຫ້ໝັ່ນຄົງຕະຫລອດໄປ ສອດຮ້ອຍກັບ ການຮັບຟັງແຜນການອົບຮົມ-ຫັດແອບ ການເມືອງ, ການທະຫານພາລາທິການ, ເຕັກນິກ ໃຫ້ທະ ຫານໃໝ່ ເພື່ອຍົກສູງລະດັບຄວາມຮູ້, ຄວາມສາມາດ ໃຫ້ຜູ່ກ່ຽວໄດ້ຮຽນຮູ້ກ່ຽວກັບຄວາມຮູ້ພື້ນຖານ ທາງດ້ານສິນ ລະປະຍຸດ-ຍຸດທະວິທີ, ທະຫານຮາບ ແລະ ວິຊາສະເພາະພາລາທິການ, ເຕັກນິກ ໃຫ້ທຸກສະຫາຍໄດ້ຍົກລະດັບສະຕິ ພ້ອມທັງຕື່ນຕົວຕໍ່ ການປະຕິບັດຂໍ້ກໍານົດ ແລະ ລະບຽບກົດໝາຍຂອງກອງທັບປະຊາຊົນລາວ.
.
ໃນຕອນທ້າຍ ສະຫາຍ ຄໍາອິ້ງ ກິ່ງແກ້ວ, ຫົວໜ້າກອງບັນຊາການທະຫານແຂວງໄຊສົມບູນ ໄດ້ເປັນກຽດໂອ້ລົມຕໍ່ພິທີ ກ່ອນອື່ນ ສະຫາຍໄດ້ເນັ້ນໃຫ້ ບັນດານ້ອງທະຫານໃໝ່ພັນທະປ້ອງກັນຊາດ ຈົ່ງພ້ອມກັນເອົາໃຈໃສ່ປະຕິບັດ ສິດ ແລະ ໜ້າທີ່ ຂອງຕົນເຂົ້າໃນພາລະກິດຢ່າງເຂັ້ມງວດ ພ້ອມທັງຖຶກຕ້ອງ ຕາມກົດໝາຍ ພັນທະ ຂອງວຽກງານປ້ອງກັນຊາດ ໃຫ້ໄດ້ຮັບຜົນສໍາເລັດເປັນກ້າວໆ ແລະ ໃຫ້ກົມກອງມີຄວາມເຕີບໃຫຍ່, ເຂັ້ມແຂງຢ່າງບໍ່ຢຸດຢັ້ງ.
